Vanhu Vo Rhula Va Sirhelela Vito Ra Vona Lerinene

TLANGA

RUNGULA LERI BYERIWEKE VAAKI VA LE RHAXIYA: Rungula leri i vumbhoni bya leswaku vanhu va makume ya timiliyoni ematikweni yo tlula 230 va ta va ni ntshunxeko wa vukhongeri, ku katsa ni le Rhaxiya. Magazini wa Xihondzo xo Rindza hi wona lowu hundzuluxeriwaka wu tlhela wu hangalasiwa ku tlula timagazini leti nga kona emisaveni. Wu ta hundzuluxeriwa hi tindzimi ta 188. Ku ta kandziyisiwa tikopi to tlula 40 wa timiliyoni. Vatirhela-mfumo van’wana swi nga ha endleka leswaku va nga swi tsakeli leswaku vanhu va tiva leswi endlekaka hi Timbhoni ta Yehovha eRhaxiya. Kambe marito ya Yesu ma ta hetiseka: “A ku na nchumu lexi tumbetiweke hi vukheta lexi nga ta ka xi nga hlavuteriwi, ni xihundla lexi nga ta ka xi nga tiviwi.”—LUKA 12:2.

HI December 2009 na hi January 2010, tihuvo timbirhi letikulu ta le Rhaxiya ti vule leswaku Timbhoni ta Yehovha ti lwisana ni mfumo. A swi tikomba onge leswi a swi endleka khale hi Timbhoni swi lava ku tlhela swi endleka. Loko tiko ra Rhaxiya ri fumiwa hi mfumo wa Soviet, Timbhoni ta magidi ti hehliwe hileswaku i valala va tiko. Ti yisiwe evuhlongeni, emakhotsweni ni le tikampeni ta nxaniso. Loko tiko ra Rhaxiya ri nga ha fumiwi hi mfumo wa Soviet, Timbhoni ta Yehovha ti kume ntshunxeko. Hulumendhe yoleyo leyintshwa yi tlhele yi endla leswaku Timbhoni ti va ni vito lerinene. * Kambe vanhu van’wana a va ha tiyimisele ku tlhela va ri thyakisa.

Eku sunguleni ka 2009, valawuri va sungule ku kavanyeta ntshunxeko wa vukhongeri lowu Timbhoni ta Yehovha ti nga na wona. Hi February ntsena, vachuchisi va endle mindzavisiso yo tlula 500 etikweni hinkwaro. A ku ri xihi xikongomelo xa vona? Ku vona loko ku ri ni milawu leyi ti yi tlulaka. Eka tin’hweti leti landzeleke, maphorisa ma kavanyete minhlangano ya tona leyi khomeriwaka eTiholweni ta Mfumo ni le makaya ya vanhu. Ma teke minkandziyiso ya tona ni swilo swin’wana. Valawuri va hlongole magqweta lama humaka ematikweni mambe lawa a ma yimela Timbhoni, va tlhela va ma sivela ku nghena eRhaxiya.

Hi October 5, 2009, vatirhela-mfumo lava kambelaka nhundzu leyi nghenaka eRhaxiya va kume minkandziyiso leyi sekeriweke eBibeleni endzilakaneni wa St. Petersburg. Minkandziyiso yoleyo a yi huma eJarimani naswona a yi ya eka mavandlha ya le Rhaxiya. Ntlawa wa le Rhaxiya wa vayimeri lava kambelaka nhundzu leyi nga riki enawini ni leyi nga ni khombo endzilakaneni wu kambele minkandziyiso yoleyo. Ha yini? Tsalwa ra le nawini a ri vule leswaku minkandziyiso yoleyo “yi nga ha va yi ri ni rungula leri nga vangaka ku avana evukhongerini.”

Ku xopaxopiwa ka Timbhoni ku hetelele ku ri mhaka leyikulu. Tihuvo Letikulu ta le Rhaxiya leti Tirhisanaka ni Mfumo ni Tiko ra Altay (leri ku nga xiphemu xa Rhaxiya), ti vule leswaku minkandziyiso ya Timbhoni ku katsa ni magazini lowu u nga eku wu hlayeni, yi lwisana ni mfumo. Timbhoni ta Yehovha ti endle swikombelo leswaku ti ta vula leswaku sweswo a hi ntiyiso naswona matiko man’wana a ma yima na tona, kambe leswi hinkwaswo swi ve nyuku wa mbyana! Huvo yi yirise ku rhumeriwa ni ku hangalasiwa ka minkandziyiso leyi sekeriweke eBibeleni eRhaxiya.

Xana Timbhoni a ti ta angula njhani eku thyakisiweni ka vito ra tona ni hikwalaho ka leswi ntirho wa tona wu yirisiweke? Xana milawu ya Huvo yi kombisa yini malunghana ni ntshunxeko wa vukhongeri eka vaaka-tiko hinkwavo va le Rhaxiya?

Xana U Ehleketa Leswaku Minkandziyiso Leyi Yi Lwisana Ni Mfumo?

Hi leyi yin’wana ya minkandziyiso ya Timbhoni ta Yehovha leyi Huvo Leyikulu ya le Rhaxiya yi vuleke leswaku yi lwisana ni mfumo

Buku Yanga Ya Timhaka Ta Bibele * (leyi nga laha henhla)
Tshinela Eka Yehovha
Life—How Did It Get Here? By Evolution or by Creation?
Ku Lavisisa Ka Vanhu Xikwembu *
Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 1 *
Xana Bibele Yi Dyondzisa Yini Hakunene? *

Minkandziyiso leyi yi endla leswaku vanhu va xixima Xikwembu ni Rito ra xona, ku nga Bibele. Yi pfuna vanhu lava yi hlayaka leswaku va tirhisa matimba ya vona yo ehleketa ni ku va pfuna leswaku va kambisisa tidyondzo ni tifilosofi leti va dyondzisiwaka tona. Xana u ehleketa leswaku minkandziyiso leyi yi fanele yi yirisiwa?

^ par. 38 Minkandziyiso leyi u nga yi hlaya eka Website leyi nge www.watchtower.org.

^ par. 41 Minkandziyiso leyi u nga yi hlaya eka Website leyi nge www.watchtower.org.

^ par. 42 Minkandziyiso leyi u nga yi hlaya eka Website leyi nge www.watchtower.org.

^ par. 43 Minkandziyiso leyi u nga yi hlaya eka Website leyi nge www.watchtower.org.

Ti Teka Goza Ra Xihatla Malunghana Ni Ku Xungetiwa Ka Tona

Vladimir Litvin la nga ni malembe ya 81 u yisiwe evuhlongeni le Krasnoyarskiy Kray loko a ri ni malembe ya 14. Hi Ravuntlhanu nimixo loko ku sunguriwa tsima, hi yena loyi a a rhangela ntlawa wa Timbhoni ta Yehovha loko wu fambisa xiphephana xo hlawuleka

Hi Ravuntlhanu, February 26, 2010, Timbhoni ta Yehovha ta kwalomu ka 160 000 eRhaxiya ti sungule ku fambisa tikopi ta 12 wa timiliyoni ta xiphephana xo hlawuleka lexi a xi ri ni nhloko-mhaka leyi nge Could It Happen Again? A Question for the Citizens of Russia. Hi xikombiso, le Siberia, edorobeni ra Usol’ye-Sibirskoye, Timbhoni ta kwalomu ka madzana ti hlengeletane eswitarateni hi 5:30 nimixo. Exikarhi ka tona, a ku ri ni leti a ti ri evuhlongeni le Siberia hi 1951 hikwalaho ko lwela ripfumelo ra tona. Ti kanye mbilu leswaku ti fambisa swiphephana swa 20 000 leswi a ti averiwe swona ehansi ka maxelo lawa a ma titimela swinene lama endlaka -40 wa ti-digri.

Nikolai Yasinski la nga ni malembe ya 73 u hlanganyele eka tsima rolero hi ku hiseka. U vutise a ku, “Xana va ta tlhela va hi xanisa kutani va hi tekela lunghelo ro gandzela Yehovha?”

Leswaku ti tivisa hi ta tsima ra tona ra masiku manharhu, Timbhoni ta Yehovha ti khome nhlangano eMoscow, leyi ku nga ntsindza wa Rhaxiya. Un’wana wa lava a va rhambiwile ku ta vulavula a ku ri Nkulukumba Lev Levinson, la nga ni vutshila eka Nhlangano wa Timfanelo ta Vanhu. Hi ku komisa, u hlamusele ku xanisiwa ka Timbhoni ta Yehovha hi mfumo wa Manazi wa le Jarimani ni hi mfumo wa Soviet Union naswona u tlhele a vulavula hi mhaka leyi a ya ha ku endleka ya ku va Timbhoni ti nga voniwi nandzu eka leswi a ti hehliwa ha swona. U tlhele a ku: “Mintlawa hinkwayo ya vukhongeri leyi a yi nga dyi byi rhelela ehansi ka mfumo wa Soviet, Presidente Yeltsin u vule leswaku yi fanele yi nyikiwa ntshunxeko. Hinkwaswo leswi mintlawa yoleyo yi tekeriweke swona a yi fanele yi tlheriseriwa swona. Hi nkarhi wa ku fuma ka Soviet Union, Timbhoni ta Yehovha a ti nga ri na nchumu, kambe vito ra tona lerinene leri a ri thyakisiwile ri basisiwile.”

Swi nga si ya kwihi, vito rero lerinene se a ri ri ekhombyeni nakambe. Nkulukumba Levinson u te: “Tiko leri tisoleke hikwalaho ko xanisa vukhongeri, sweswi ri tlhele ri sungula ku byi xanisa exihundleni.”

Tsima Leri Khumbeke Timbilu Ta Vanhu

Xana tsima ra xiphephana ri xi hetisisile xikongomelo xa xona? Nkulukumba Levinson u te: “Loko ndzi ri exitimeleni ndzi ya eka nhlangano lowu a wu khomeriwe eMoscow, vanhu lava a va ri exitimeleni xexo a va ri eku hlayeni ka xiphephana lexi a xa ha ku hangalasiwa hi Timbhoni ta Yehovha etikweni hinkwaro ra Rhaxiya. . . . Vanhu va tshame ehansi naswona va xi hlaya hi vurhon’wana.” * Hlaya mintokoto leyi nga laha hansi.

Wansati un’wana la kuleke naswona a nga xirho xa Mamoslem lama tshamaka exikarhi ka tiko ra Rhaxiya u amukele xiphephana kutani a vutisa leswaku xi tamele yini. Loko a byeriwe leswaku xi vulavula hi timfanelo ta vanhu ni hi ntshunxeko wa le Rhaxiya, u te: “I mahungu yo tsakisa ku tiva leswaku se ku ni vanhu lava swi xiyaka leswaku timhaka leti i xiphiqo. Phela loko swi ta etimhakeni leti, tiko ra Rhaxiya se a ri landzela milawu ya mfumo wa Soviet Union. Ndza nkhensa swinene. Mi endla ntirho lowunene ngopfu!”

Wansati un’wana la tshamaka eChelyabinsk loyi na yena a nyikiweke xiphephana lexi u te: “Se ndzi xi kumile naswona ndzi xi hlayile. Ndzi yima na n’wina. A ndzi si tshama ndzi vona vukhongeri lebyi yimelaka ripfumelo ra byona hi ndlela leyi hlelekeke swonghasi. Ndzi rhandza ndlela leyi mi ambalaka ha yona naswona a mi khunguvanyisi vanhu. Swi le rivaleni leswaku mi ti tshemba hi ku helela tidyondzo ta n’wina. Ndzi vona onge Xikwembu xa mi seketela.”

Le St. Petersburg, wanuna un’wana la vuleke leswaku na yena se u xi kumile xiphephana, u vutisiwe leswaku u titwe njhani hi leswi a swi hlayeke. U te: “Swi ndzi tsakisile. Loko ndzi ri karhi ndzi xi hlaya, ndzi hlamarile ndzi tlhela ndzi rila. Kokwa wa mina wa xisati u xanisiwe ngopfu [hi nkarhi wa mfumo wa Soviet] naswona u ndzi byele swo tala hi vanhu lava a a khomiwe na vona. A ku ri ni vanhu vo tala lava a va ri swigevenga naswona a ku ri ni lava a va nga ri na nandzu, lava khomeriweke ku lwela ripfumelo ra vona. Ndzi ehleketa leswaku vanhu hinkwavo va fanele va yi tiva mhaka leyi, kutani leswi mi swi endlaka ndza swi rhandza.”

Rungula Leri Nga Ni Matimba

Xiphephana lexi nge Could It Happen Again? A Question for the Citizens of Russia xi swi veke erivaleni leswaku Timbhoni ta Yehovha a hi valala va tiko. A xi hlamusela ku yelana loku nga kona exikarhi ka leswi endleke leswaku ntirho wa tona wu yirisiwa ni leswi endleke leswaku ti xanisiwa hi ndlela ya tihanyi hi nkarhi wa mfumo wa Soviet. A xi khutaza vanhu leswaku va nghena eka Website leyi tirhisaka ririmi ra le Rhaxiya leyi nge www.jw-russia.org, laha a va ta kuma rungula ro tala malunghana ni matimu ni ntirho wa Timbhoni ta Yehovha ta le Rhaxiya. Xi tlhele xi tshaha vhidiyo leyi a yi ri eka Internet ya Dmitri Medvedev la nga Presidente wa Rhaxiya, leyi endliweke hi Siku ro Xixima Vanhu lava a va Tshikileriwa Hikwalaho ka Tipolitiki. * Hambileswi hi nkarhi wa mfumo wa Soviet Union vukhongeri a byi nga si tala, Timbhoni ta Yehovha na tona a ti tekiwa tanihi leti lwisanaka ni mfumo.

^ par. 53 Vona bokisi leri nge “Ku Tsundzuka Lava A Va Tshikileriwa.”

Xana Vumundzuku Byi Ta Va Njhani eTikweni Ra Rhaxiya?

Stepan Levitsky la nga ni malembe ya 85 ni nsati wakwe Yelena. U hete malembe ya khume a ri ekhotsweni hikwalaho ko kumeka a ri ni magazini wa Xihondzo xo Rindza

Timbhoni ta Yehovha ta le Rhaxiya ta wu tlangela ntshunxeko lowu ti veke na wona eka malembe ya 20 lama hundzeke. Kambe ta swi tiva leswaku sweswo swi nga ha cinca. Leswaku swihehlo leswi Timbhoni ta ha ku hehliwaka ha swona swi kombisa leswaku tiko ra Rhaxiya ri tlhelela endzhaku, a swi tiveki, sweswo swi ta vonaka hi ku famba ka nkarhi.

Timbhoni ta Yehovha ti tiyimisele ku ya emahlweni ni ntirho wa tona wo chumayela rungula ra Bibele leri endlaka leswaku vanhu va va ni ku rhula ni ntshembo, ku nga khathariseki leswi nga ta endleka. Xiphephana xo hlawuleka lexi ti xi fambiseke xi ku katsakanye kahle ku tiyimisela ka tona loko xi ku: “Nxaniso a wu nge hi siveli. A hi nge tshiki ku vulavula hi Yehovha Xikwembu ni hi Rito rakwe, ku nga Bibele naswona leswi hi ta swi endla hi xichavo. (1 Petro 3:15) A hi tshikanga loko hi xanisiwa hi Manazi ya le Jarimani ni loko hi xanisiwa hi tiko ra rikwavo, ni sweswi a ku na lexi nga ta hi sivela.—Mintirho 4:18-20.”

Ku Tsundzuka Lava A Va Tshikileriwa

Hi siku ra ku tsundzukiwa ka vanhu lava a va xanisiwa ehansi ka mfumo wa Soviet, Presidente wa Rhaxiya Dmitri Medvedev u vule marito lama landzelaka:

“Namuntlha i Siku ro Tsundzuka Vanhu lava a va Tshikileriwa Hikwalaho ka Tipolitiki. . . . A swi olovi ku twisisa leswaku nxaniso wolowo a wu ri wukulu ku fikela kwihi etikweni hinkwaro . . . Mintlawa hinkwayo ya le tikweni yi herisiwile. . . . Vanhu va vukhongeri hinkwabyo va xanisiwile. [Siku leri i ro tsundzuka] vanhu va timiliyoni lava lahlekeriweke hi vutomi. Vanhu va dlayiwile hambileswi a va nga ri na nandzu; van’wana va yisiwe evuhlongeni ni le tikampeni ta nxaniso naswona a va nga wu kumi ntshunxeko wa timfanelo ta vanhu hikwalaho ka mintirho leyi va yi tirhaka kumbe tinxaka ta vona. Lava a va vuriwa ‘valala va tiko’ ni ‘vaseketeri va vona’ swin’we ni mindyangu ya vona a va vengiwa. Ehleketa hi mhaka leyi: Vanhu va timiliyoni va file hikwalaho ko chuha ni hikwalaho ko hehliwa hi mavunwa. A va tekeriwe timfanelo ta vona hinkwato naswona a va nga lahliwi hi ndlela leyi xiximekaka. Ku hele malembe swi tikomba onge swilo leswi a ko va norho.

“A ku nga ri na xivangelo lexi twalaka xa ku va va xanisiwa.”

^ par. 3 Vona bokisi leri nge “Xitifiketi Xa Ku Ntshunxiwa.”

^ par. 13 Eka tiawara ti nga ri tingani emahlweni ko va ku khomiwa nhlangano, mavandlha ya Timbhoni ta Yehovha ya le Moscow ma sungule ku fambisa xiphephana.

XIHONDZO XO RINDZA