Nchavelelo Eka Lava Tshovekeke Timbilu
Tshinela Eka Xikwembu
Nchavelelo Eka Lava Tshovekeke Timbilu
‘YEHOVHA a nge pfuki a ndzi rhandzile.’ Marito lawa ma vuriwe hi wansati un’wana wa Mukreste loyi a ri ni ntshikilelo lowukulu wa mianakanyo. A ehleketa leswaku Yehovha u n’wi fularherile. Xana hakunene Yehovha u le kule ni vagandzeri vakwe lava tshikilelekeke? Nhlamulo leyi chavelelaka yi kumeka emaritweni lama huhuteriweke ya mupisalema Davhida, lama tsariweke eka Pisalema 34:18.
Davhida a byi tiva vuyelo bya maxangu lebyi nga vaka kona eka malandza yo tshembeka ya Yehovha. Loko a ha ri jaha, Davhida a a hanya tanihi mubaleki, a a hlongorisiwa hi Sawulo, hosi leyi nga ni mavondzo, leyi a yi lava ku n’wi dlaya. Davhida u lave vutumbelo emutini wa Gati laha a ehleketa leswaku Sawulo a nge n’wi kumi, laha a ku tshama Vafilista lava a va ri valala va yena. Endzhaku ka loko va n’wi vonile, Davhida u balekile a tiendla onge u hlangane nhloko. U vangamise Xikwembu hileswi xi n’wi poniseke, xisweswo a tsala Pisalema 34.
Xana Davhida a a tshemba leswaku Xikwembu xi va fularherile vanhu lava nga emaxangwini? Davhida u tsale leswi: “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.” (Ndzimana 18) A hi voneni ndlela leyi marito lawa ma hi chavelelaka ha yona ni ku hi nyika ntshembo.
“Yehovha u le kusuhi.” Buku yin’wana ya tinhlamuselo yi vula leswaku xivulwa lexi “i ndlela yin’wana yo vula leswaku Hosi yi rhiya ndleve naswona yi rindza vanhu va yona, minkarhi hinkwayo yi lunghekele ku va pfuna ni ku va ponisa.” Swa khutaza ku tiva leswaku Yehovha u rindza vanhu vakwe. Wa swi vona swiphiqo leswi va langutanaka na swona ‘eminkarhini leyi ya mangava’ naswona u tiva ndlela leyi va titwaka ha yona.—2 Timotiya 3:1; Mintirho 17:27.
“Lava va tshovekeke mbilu.” Eka mindhavuko yin’wana, xiga lexi nge ‘mbilu leyi tshovekeke’ xi hlamusela ku ka u nga rhandziwi. Xidyondzi xin’wana xi vule leswaku marito ya mupisalema ma vula “ku va ni gome ni nhlomulo lowukulu.” I ntiyiso leswaku hambi ku ri malandza yo tshembeka ya Xikwembu minkarhi yin’wana ma nga ha langutana ni maxangu lama tshovaka mbilu.
“Lava va pfotlokeke emoyeni.” Vanhu lava heleke matimba va nga ha tsana ematihlweni ya vona leswi nga ha endlaka leswaku va heleriwa hi ntshembo. Buku ya vahundzuluxeri va Bibele yi vula leswaku xiga lexi xi nga ha hundzuluxeriwa xi va “lava nga langutelangiki leswinene.”
Xana Yehovha u angula njhani eka vanhu “lava va tshovekeke mbilu” ni “lava va pfotlokeke emoyeni”? Xana wa va fularhela, u va teka va ri lava nga faneriwiki hi rirhandzu rakwe naswona a nga va yingisi? Doo! Ku fana ni mutswari la nga ni rirhandzu loyi a angarhaka n’wana wakwe ni ku n’wi chavelela loko a ri enhlomulweni, Yehovha u le kusuhi ni vagandzeri vakwe lava lavaka mpfuno eka yena. U tiyimisele ku chavelela timbilu ta vona leti tshovekeke ni moya wa vona lowu pfotlokeke. A nga va nyika vutlhari ni matimba lama lavekaka leswaku va kota ku langutana ni miringo leyi va nga ha hlangavetanaka na yona.—2 Vakorinto 4:7; Yakobo 1:5.
Ha yini u nga kumi ndlela leyi u nga tshinelaka ha yona eka Yehovha? Xikwembu xa hina lexi nga ni ntwela-vusiwana xi hi tshembisa leswi: “Ndzi tshama . . . swin’we ni loyi a pfotlokeke ni lava va moya wo titsongahata, leswaku ndzi hanyanyisa moya wa lava va titsongahataka ni ku hanyanyisa mbilu ya lava va pfotlosiwaka.”—Esaya 57:15.
Tindzimana ta Bibele leti u nga ti hlayaka hi June:
