Xana Xikwembu Xi Ni Nhlengeletano?

NTUMBULUKO wa Xikwembu wu hleleke hinkwako-nkwako. Hi xikombiso, sele yin’we ya ximilana lexi vuriwaka yeast ya hlamarisa hikuva yi hleleke kahle. Yi ni swiphemu leswi lavaka ku ringana ni swa xihaha-mpfhuka lexikulu lexi vuriwaka Boeing 777. Kambe swiphemu swa yona swi ni ndhawu ya swona laha swi lavekaka kona naswona hinkwaswo ka swona swi nghena eka bolo leyitsongo swinene. Ku hambana ni swihaha-mpfhuka sweswo, tisele ta ximilana xa yeast ti kota ku tswala tisele tin’wana. Hakunene sele leyi yi hleleke hi ndlela yo hlamarisa!—1 Vakorinto 14:33.

Nhlengeletano leyi a yi vonaki eka swivumbiwa swa nyama ntsena. Bibele yi kombisa leswaku tintsumi ti tirha hi ndlela yo hleleka etilweni, hi ku pfumelelana ni xikongomelo xa Muvumbi. Muprofeta Daniyele u vone xivono xa tintsumi ta ntsandza-vahlayi ti ri exiluvelweni xa Xikwembu xa le tilweni: “A ku ri ni magidi-gidi lawa a ma hambeta ma n’wi tirhela, ni va 10000 va andzisiwe ka 10000 lava a va tshama va yime emahlweni ka yena.” (Daniyele 7:9, 10) Hi mahlo ya mianakanyo wa nga vona nhlengeletano ya tintsumi teto leti a ti hundza dzana ra timiliyoni ti ri karhi ti endla leswi Xikwembu a xi ti kongomisa leswaku ti swi endla eka malandza ya xona ya laha misaveni!—Pisalema 91:11.

Hambileswi Muvumbi, Yehovha Xikwembu, a nga Muhleri la Tlakukeke, a nga na vutianakanyi. Kambe i Xikwembu lexi tsakeke lexi khathalaka hi ntumbuluko wa xona hinkwawo. (1 Timotiya 1:11; 1 Petro 5:7) Leswi swi vonaka eka ndlela leyi xi tirhisaneke ha yona ni tiko ra khale ra Israyele ni Vakreste va lembe-xidzana ro sungula.

Tiko Ra Israyele Wa Khale A Ri Hleleke Kahle

Yehovha Xikwembu u tirhise Muxe ku endla leswaku Vaisrayele va va ni vugandzeri bya ntiyiso. Xiya malunghiselelo lawa a va ri na wona yo dzima mintsonga hi nkarhi wa riendzo ra vona emananga ya Sinayi. I ntiyiso leswaku swilo a swi ta va swi nga hlelekanga loko ndyangu wun’wana ni wun’wana a wu lo pfumeleriwa ku dzima ntsonga wa wona kun’wana ni ku’wana laha wu lavaka kona. Yehovha u nyike tiko rero swiletelo swa laha nyimba ha yin’we a yi ta wu dzima kona ntsonga wa yona. (Tinhlayo 2:1-34) Nawu wa Muxe a wu katsa milawu ya rihanyo lerinene ni nsivelo-mavabyi, hi xikombiso, malunghana ni ku celela thyaka ra munhu.—Deteronoma 23:12, 13.

Loko Vaisrayele va nghena eTikweni leri Tshembisiweke, a va ri tiko leri hlelekeke hi tindlela to tala. Tiko a ri avanyisiwe hi tinyimba ta 12, laha ha yin’we a yi ri ni ndhawu ya yona. Nawu lowu Yehovha a wu nyikeke tiko hi ku tirhisa Muxe a wu katsa timhaka hinkwato ta vutomi bya vanhu—vugandzeri, vukati, ndyangu, dyondzo, bindzu, swakudya, vurimi, ku kathalela swiharhi ni swin’wana. * Hambileswi milawu yin’wana a yi kongomile ni ku hetiseka, hinkwayo a ku ri xikombiso xa Yehovha xo khathalela vanhu vakwe ni ku endla leswaku va va ni ntsako. Hi ku fambisana ni lunghiselelo leri ra rirhandzu, Vaisrayele va tsakeriwe hi Yehovha.—Pisalema 147:19, 20.

I ntiyiso leswaku Muxe a a ri murhangeri la nga ni vuswikoti, la humelelaka naswona a a nga titshegi hi munhu kumbe hi vuswikoti byakwe kambe a a tshembela eka nkongomiso wa Xikwembu. Hi xikombiso, Muxe u xi endle njhani xiboho xa ndlela leyi a fanele a famba ha yona loko a ri emananga? Yehovha u n’wi kongomise hi ku tirhisa papa lerikulu ninhlikanhi ivi  nivusiku a tirhisa ndzilo lowukulu. (Eksoda 13:21, 22) Hambileswi Yehovha a tirhiseke vanhu, hi yena loyi a a hlela ni ku kongomisa vanhu vakwe. Sweswo swi ve tano ni hi lembe-xidzana ro sungula.

Vakreste Va Lembe-xidzana Ro Sungula A Va Hleleke Kahle

Hi lembe-xidzana ro sungula ku simekiwe mavandlha yo tala ya Vukreste eswiphen’wini swo tala swa le Asiya ni le Yuropa, hikwalaho ka leswi vaapostola ni vadyondzisiwa a va chumayela hi ku hiseka. Hambileswi mavandlha lawa a ma hangalakile, a ma nga tiendli nconge yin’we kumbe ku tilawula. Ematshan’weni ya sweswo, a ma hlelekile naswona ma vuyeriwile hikwalaho ko rhangeriwa hi vaapostola hi ndlela ya rirhandzu. Hi xikombiso, muapostola Pawulo u avele Tito ku ya eKreta “leswaku [a ya] lulamisa swilo.” (Tito 1:5) Nakambe Pawulo u tsalele vandlha ra le Korinto leswaku vamakwerhu van’wana a va nyikiwe “matimba yo hlela swilo.” (1 Vakorinto 12:28, The New Testament in Modern Speech; The Bible in Contemporary Language) Kambe i mani loyi a ri ni vutihlamuleri bya ku hleleka koloko? Pawulo u vule leswaku “Xikwembu xi hlele” vandlha.—1 Vakorinto 12:24; The Riverside New Testament.

Valanguteri lava hlawuriweke evandlheni ra Vukreste a va nga lawuli vapfumeri-kulobye. Ematshan’weni ya sweswo, a va ri “vatirhi-kuloni’’ lava a va landzela nkongomiso wa moya wa Xikwembu naswona a va languteriwe leswaku va va “swikombiso entlhambini.” (2 Vakorinto 1:24; 1 Petro 5:2, 3) Yesu Kreste, loyi a pfuxiweke hi yena “nhloko ya vandlha” ku nga ri munhu wo karhi kumbe ntlawa wa vavanuna lava nga hetisekangiki.—Vaefesa 5:23.

Loko vandlha ra le Korinto ri sungula ku endla swilo hi ndlela leyi hambaneke swinene ni leyi mavandlha laman’wana a ma endla ha yona, Pawulo u tsale a ku: “Yini? Xana rito ra Xikwembu ri hume eka n’wina, kumbe ri fikelele n’wina ntsena ke?” (1 Vakorinto 14:36) Pawulo u tirhise xivutiso lexi nga laviki nhlamulo leswaku a lulamisa ndlela leyi a va anakanya ha yona ni ku va pfuna ku twisisa leswaku a va fanelanga va ti lawula. Leswi mavandlha ma landzeleke nkongomiso wa vaapostola ma andzile ma tlhela ma humelela.—Mintirho 16:4, 5.

Xikombiso Xa Rirhandzu Ra Xikwembu

Xana ku vuriwa yini hi namuntlha? Vanhu van’wana va nga ha kanakana ku va xiphemu xa nhlengeletano yo karhi ya vukhongeri. Hambiswiritano, vumbhoni byi kombisa leswaku minkarhi hinkwayo Xikwembu xi tirhisa nhlengeletano ya xona loko xi hetisisa xikongomelo xa xona. Xi endle leswaku vagandzeri va xona va le Israyele wa khale ni Vakreste va lembe-xidzana ro sungula va hleleka eka vugandzeri bya vona.

Hikokwalaho, xana swa twisiseka ku gimeta hi leswaku Yehovha Xikwembu ni sweswi wa ha va kongomisa vanhu vakwe hilaha a endleke hakona enkarhini lowu hundzeke? Ina, ku va vagandzeri vakwe va hlelekile ni ku va ni vun’we i xikombiso xa nkhathalelo wa rirhandzu leri a nga na rona eka vona. Namuntlha Yehovha u tirhisa nhlengeletano yakwe leswaku a hetisisa xikongomelo xakwe hi vanhu. U nga yi vona njhani nhlengeletano yakwe? Xiya swikombiso leswi landzelaka.

▪ Vakreste va ntiyiso va hlelekile leswaku va hetisisa ntirho. (Matewu 24:14; 1 Timotiya 2:3, 4) Yesu u lerise valandzeri vakwe leswaku va chumayela mahungu lamanene ya Mfumo eka matiko hinkwawo, ntirho lowu a wu nga ta endliwa loko a ku nga ri na nhlengeletano ya misava hinkwayo. Hi xikombiso, u nga swi kota ku phamela munhu un’we, kambe loko u fanele u phamela magidi yo tala, kumbe timiliyoni u fanele u lava ntlawa wa vanhu lava hlelekeke kahle lava tirhisanaka. Leswaku va hetisisa ntirho wa Xikwembu, Vakreste va ntiyiso va xi “tirhela hi mbilu yin’we.” (Sofaniya 3:9) Xana ntirho lowu katsaka vanhu va tindzimi hinkwato, tinxaka hinkwato a swi ta koteka leswaku wu endliwa loko a ku nga ri na nhlengeletano leyi nga ni vun’we? Nhlamulo yi le rivaleni.

▪ Vakreste va ntiyiso va hlelekile leswaku va seketela ni ku khutaza van’wana. Munhu loyi a nga ni vutshila byo khandziya ntshava a nga hlela leswaku hi kwihi laha a lavaka ku khandziya hakona naswona a nga boheki ku langutisa eka vakhandziyi lava nga riki na ntokoto. Hambiswiritano, loko a humeleriwa hi mhangu u ta va a ri ekhombyeni lerikulu hikuva ku ta va ku nga ri na munhu  wo n’wi pfuna. Hakunene a hi vutlhari ku tihambanisa ni vanhu van’wana! (Swivuriso 18:1) Leswaku Vakreste va hetisisa ntirho lowu Yesu a va leriseke leswaku va wu endla, va fanele va pfunana va tlhela va seketelana. (Matewu 28:19, 20) Vandlha ra Vukreste ri nyikela switsundzuxo swo tala swa Bibele leswi lavekaka, ndzetelo ni xikhutazo eka hinkwavo leswaku va ya emahlweni ku nga ri ku lahla thawula. Xana munhu a a fanele a ya kwihi leswaku a ta leteriwa hi tindlela ta Yehovha loko ku ri hileswaku a ku nga ri na minhlangano leyi hlelekeke ya Vukreste yo letela ni ku gandzela?—Vaheveru 10:24, 25.

▪ Vakreste va ntiyiso va hleleriwe ku tirhela Xikwembu hi vun’we. Tanihi leswi tinyimpfu ta Yesu ti yingisaka rito rakwe, ti va “ntlhambi wun’we” ehansi ka vurhangeri byakwe. (Yohane 10:16) A ti hangalakanga ku fana ni tikereke leti tilawulaka ni mintlawa; kumbe ti avana hi tidyondzo. Ematshan’weni ya sweswo, hinkwato ti “vulavula hi ku twanana.” (1 Vakorinto 1:10) Leswaku hi hanya hi vun’we, hi fanele hi hleleka naswona ku hleleka swi lava nhlengeletano. I nhlengeletano ya vamakwerhu ntsena leyi nga ni vun’we leyi nga kumaka mikateko ya Xikwembu.—Pisalema 133:1, 3.

Rirhandzu ra xiviri eka Xikwembu ni le ka ntiyiso wa Bibele ri kokele vanhu va timiliyoni enhlengeletanweni leyi hetisisaka leswi ni milawu yin’wana ya Bibele. Tanihi leswi ku nga vanhu lava hlelekeke naswona va tirhaka hi vun’we, Timbhoni ta Yehovha emisaveni hinkwayo ti tiyimisele ku endla ku rhandza ka Xikwembu. Ti tiyisekisiwa hi xitshembiso lexi: “Ndzi ta tshama exikarhi ka vona ndzi tlhela ndzi famba exikarhi ka vona, naswona ndzi ta va Xikwembu xa vona kutani vona va ta va vanhu va mina.” (2 Vakorinto 6:16) Mikateko leyi yo hlamarisa u nga yi kuma na wena loko u gandzela Yehovha Xikwembu ni nhlengeletano yakwe.

[Nhlamuselo ya le hansi]

[Xifaniso lexi nga eka tluka 13]

Mintsonga ya Vaisrayele a yi hlelekile swinene

[Swifaniso leswi nga eka matluka 14, 15]

Nhlengeletano yi endla leswaku ntirho wo chumayela emisaveni hinkwayo wu kota ku hetisisiwa

Ku chumayela hi yindlu ni yindlu

Ku phalala eka mhangu

Tinhlengeletano

Ku akiwa ka tindhawu to gandzela eka tona