Dyondza Eka Rito Ra Xikwembu

Xana U Nga Byi Vona Njhani Vugandzeri Bya Ntiyiso?

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Xana ku ni vukhongeri byin’we ntsena bya ntiyiso?

Yesu u dyondzise valandzeri va yena vukhongeri byin’we ntsena, ku nga vukhongeri bya ntiyiso. Vukhongeri byolebyo byi fana ni gondzo leri yisaka evuton’wini. Loko a vulavula hi gondzo rero, Yesu u te: “A hi vangani lava ri kumaka.” (Matewu 7:14) Xikwembu xi amukela vugandzeri lebyi sekeriweke eRitweni ra xona ra ntiyiso ntsena. Vagandzeri hinkwavo va ntiyiso va hlanganisiwa hi ripfumelo rin’we.—Hlaya Yohane 4:23, 24; 14:6; Vaefesa 4:4, 5.

2. Ha yini vukhongeri byo tala byo hambana-hambana byi tivula bya Vukreste?

Vaprofeta va mavunwa va onhe Vukreste naswona va byi tirhisele ku vuyerisa swilaveko swa vona vini. Hilaha Yesu a profeta hakona, va tivula ‘tinyimpfu’ ta yena kambe va hanya tanihi timhisi leti nga ni ndlala. (Matewu 7:13-15, 21, 23) Vukreste bya mavunwa byi tumbuluke ngopfu-ngopfu endzhaku ka ku fa ka vaapostola va Yesu.—Hlaya Mintirho 20:29, 30.

3. Hi swihi swilo swin’wana leswi katsekaka eka vukhongeri bya ntiyiso?

Vagandzeri va ntiyiso va xixima Bibele tanihi Rito ra Xikwembu. Va tikarhatela ku hanya hi milawu ya yona. Kutani vukhongeri bya ntiyiso byi hambanile ni vukhongeri lebyi sekeriweke eka tidyondzo ta vanhu. (Matewu 15:7-9) Vagandzeri va ntiyiso va hanya hileswi va swi dyondzisaka.—Hlaya Yohane 17:17; 2 Timotiya 3:16, 17.

Vukhongeri bya ntiyiso byi xixima vito ra Xikwembu, ku nga Yehovha. Yesu u twarise vito ra Xikwembu. U pfune vanhu leswaku va tiva Xikwembu a tlhela a va dyondzisa ku khongelela leswaku vito ra xona ri kwetsimisiwa. (Matewu 6:9) Laha u tshamaka kona, hi byihi vukhongeri lebyi khutazaka leswaku vito ra Xikwembu ri tirhisiwa?—Hlaya Yohane 17:26; Varhoma 10:13, 14.

  4. Xana u nga va vona njhani vagandzeri va ntiyiso?

Vakreste va ntiyiso va chumayela hi Mfumo wa Xikwembu. Xikwembu xi rhumele Yesu leswaku a ta chumayela hi Mfumo. Mfumo wa Xikwembu hi wona ntsena ntshembo wa vanhu. Yesu u ye emahlweni a vulavula hi wona ku fikela siku leri a feke ha rona. (Luka 4:43; 8:1; 23:42, 43) U byele valandzeri vakwe leswaku va chumayela hi Mfumo wa Xikwembu. Loko munhu a ku tshinelela ivi a lava ku vulavula na wena hi Mfumo wa Xikwembu, hakanyingi u va a huma eka vukhongeri byihi?—Hlaya Matewu 10:7; 24:14.

Valandzeri va Yesu a hi xiphemu xa yona misava leyi yo biha. A va hlanganyeli etimhakeni ta tipolitiki kumbe tinyimpi ta rixaka. (Yohane 17:16) Nakambe, a va ma tekeleli mahanyelo lama vavisaka ni malangutelo ya misava.—Hlaya Yakobo 1:27; 4:4.

5. Hi wihi mfungho lowukulu lowu hi nga vonaka Vakreste va ntiyiso ha wona?

Vakreste va ntiyiso va rhandzana swinene. Rito ra Xikwembu ri va dyondzise ku xixima vanhu va tinxaka hinkwato. Hambileswi eminkarhini yo tala vukhongeri bya mavunwa byi seketelaka tinyimpi ta rixaka, vagandzeri va ntiyiso a va pfumeli ku endla sweswo. (Mikiya 4:1-4) Ku ri na sweswo, swirho swa vukhongeri bya ntiyiso handle ka vutianakanyi swi tirhisa nkarhi ni swilo swa swona leswaku swi pfuna ni ku khutaza van’wana.—Hlaya Yohane 13:34, 35; 1 Yohane 4:20, 21.

Hi byihi vukhongeri lebyi tidyondzo ta byona hinkwato ti sekeriweke eRitweni ra Xikwembu, byi xiximaka vito ra Xikwembu ni ku twarisa Mfumo wa Xikwembu tanihi wona ntsena lowu nga ta tlhantlha swiphiqo swa vanhu? Hi byihi vukhongeri lebyi swirho swa byona swi rhandzanaka naswona swi nga ti seketeliki tinyimpi? Vumbhoni byi kombetela eka Timbhoni ta Yehovha.—1 Yohane 3:10-12.

Leswaku u kuma rungula leri engetelekeke, vona ndzima 15 ya buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.

[Xifaniso lexi nga eka tluka 16]

“Va vula erivaleni leswaku va tiva Xikwembu, kambe va xi landzula hi mintirho ya vona.”—Tito 1:16