Xana Vana Va Fanele Va Dyondza Hi Xikwembu?

“Ku ni vukhongeri byo tala lebyi hi endlaka hi venga van’wana kambe a byi talanga lebyi hi endlaka hi rhandzana.”—JONATHAN SWIFT, LA NGA MUTSARI WA MUNGHEZI.

SWIFT u vule mhaka yoleyo hi lembe-xidzana ra vu-18, kambe ninamuntlha vanhu vo tala va pfumelelana na yena. Entiyisweni, vanhu van’wana va tshemba leswaku vatswari a va na yona mfanelo yo dyondzisa vana va vona hi Xikwembu. Va anakanya leswaku vana lava kurisiweke endyangwini wa vukhongeri va tala ku va ekhombyeni.

U ehleketa yini? Eka swiga leswi nga laha hansi, hi swihi leswi nga swa nkoka ngopfu?

● Vatswari a va fanelanga va pfumeleriwa ku dyondzisa vana va vona hi Xikwembu.

● Vatswari va fanele va rindza kukondza vana va vona va kula va nga si bula na vona hi timhaka ta vukhongeri.

● Loko vana va ha ri vatsongo, vatswari va fanele va va dyondzisa leswi va swi pfumelaka malunghana ni Xikwembu. Kambe loko vana va vona va kurile, vatswari va fanele va va khutaza ku anakanya hi voxe hi mhaka leyi.

● Vana va fanele va amukela vukhongeri bya vatswari va vona malunghana ni Xikwembu handle ko vutisa loko byi ri bya ntiyiso kumbe byi nga ri bya ntiyiso.

Xana Vukhongeri Byi Veka Vana eKhombyeni?

Ku hava mutswari la khathalaka la lavaka ku vavisa n’wana. Kambe, xana swiga leswi swi seketela leswi vuriwaka hi vanhu lava sivelaka vana ku dyondza hi Xikwembu? Se ku hundze makume ya malembe, vakambisisi va ri karhi va dyondza hi vuenti hi vuyelo lebyi vaka kona eka vana malunghana ni ripfumelo ra vatswari hi vukhongeri. I yini leswi vakambisisi va swi dyondzeke eka tidyondzo ta vona?

Vakambisisi va kume leswaku ematshan’weni yo va ni nkucetelo lowu vavisaka, vukhongeri byi nga ha va ni vuyelo lebyinene eka vana. Hi 2008, xiviko lexi kandziyisiweke eka magazini wa Social Science Research * xi te: “Vukhongeri byi kombisiwe byi ri lebyi tiyisaka vuxaka lebyi nga kona exikarhi ka vatswari na vana ni le ka vatatana na vamanana.” Xiviko lexi xi tlhele xi ku: “Vukhongeri ni ku dyondza hi Xikwembu swi tikombe swi ri swa nkoka eka vutomi bya vana vo tala naswona i swa nkoka eka vuxaka bya ndyangu.” Xiya ndlela leyi rungula rero ri fanaka ha yona ni leswi vuriweke hi Yesu Kreste, u te: “Va tsaka lava khathalaka hi xilaveko xa vona xa moya.”—Matewu 5:3.

Ku vuriwa yini hi vonelo ra leswaku vana va fanele va kula emahlweni ko va va dyondza hi Xikwembu ni hi vukhongeri? Vonelo rero ri honisa mhaka leyi: Miehleketo ya n’wana yi fana ni bakiti leri nga riki na nchumu leri yimeleke ku cheriwa swo karhi. Vatswari va fanele va hlawula; ku dyondzisa vana va vona kumbe va va tshika va dyondza swin’wana ni swin’wana leswi va swi twaka eka van’wana.

Hi Xihi Xihundla Xa Kona?

Matimu ma vula leswaku vanhu va nga tirhisa tidyondzo ta vukhongeri tanihi swivangelo swo va ni xihlawu-hlawu ni ku venga van’wana. Kutani, xana vatswari va nga byi papalata njhani vuyelo lebyi vuriweke hi Jonathan Swift? Xana va nga va dyondzisa njhani vana va vona vukhongeri lebyi nga ta va pfuna leswaku va rhandza van’wana?

Xihundla xi titshege hi ku kuma tinhlamulo ta swivutiso leswi swinharhu: (1) I yini leswi vana va faneleke va swi dyondza? (2) I mani loyi a faneleke a va dyondzisa? (3) Hi wahi maendlelo yo dyondzisa lama tirhaka swinene?

[Nhlamuselo ya le hansi]