Tshinela Eka Xikwembu

“Oho Yehovha, . . . Wa Ndzi Tiva”

“NDZHWALO lowu hi nga vaka na wona i ku tiva leswaku ku hava ni un’we loyi a khathalaka ha hina kumbe ku hi rhandza.” * Xana u pfumelelana na wona marito lawa? Xana u tshame u titwa onge a ku na munhu loyi a khathalaka, la twisisaka leswi u langutanaka na swona ni ndlela leyi u titwaka ha yona? Loko swi ri tano, marito lawa ma nga ku chavelela: Yehovha wa khathala swinene hi vagandzeri vakwe lerova u xiya swilo hinkwaswo leswi va humelelaka eka vutomi bya vona bya siku ni siku. Marito ya Davhida lama nga eka Pisalema 139 ma hi tiyisekisa hi ntiyiso lowu.

Leswi Davhida a a tiyiseka leswaku Xikwembu xa n’wi tsakela u te: “Oho Yehovha, u ndzi lavisisile, naswona wa ndzi tiva.” (Ndzimana 1) Davhida u tirhise marito yo saseka lama tsariweke laha. Rito ra Xiheveru leri hundzuluxeriweke ri ku “lavisisa” ri nga ha vula ku cela ribye (Yobo 28:3), ku kambela tiko (Vaavanyisi 18:2) kumbe ku kambisisa ntiyiso wa nandzu lowu nga enawini (Deteronoma 13:14). I ntiyiso leswaku Yehovha u hi tiva kahle onge hiloko a kambisisa nchumu wun’wana ni wun’wana wa vukona bya hina. Hi ku tirhisa risivi “ndzi,” Davhida u hi dyondzisa leswaku Xikwembu xa ma tsakela malandza ya xona. Xa ma lavisisa naswona xa ma tiva hinkwawo ka wona.

Davhida u nyikele vuxokoxoko lebyi engetelekeke bya ku lavisisa ka Xikwembu hi ku vula a ku: “Wena u tiva ku tshama ka mina ni ku yima ka mina. U ehleketisise hi miehleketo ya mina u ri ekule.” (Ndzimana 2) Hi marito man’wana, Yehovha u tshama “ekule,” ku nga ematilweni. Kambe wa swi tiva loko hi tshama ehansi kumbexana endzhaku ka siku ro leha niloko hi pfuka nimixo kutani hi langutana ni vutomi bya siku ni siku. Nakambe u tiva miehleketo ya hina, ku navela ka hina ni makungu ya hina. Xana Davhida a a titwa a ri ekhombyeni hileswi Yehovha a n’wi lavisisa? Hi hala tlhelo, a a swi tsakela leswaku a n’wi lavisisa. (Ndzimana 23, 24) Ha yini?

Davhida a swi tiva leswaku Yehovha u ni xikongomelo lexinene loko a lavisisa vagandzeri Vakwe. Davhida u susumeteleke ku tsala a ku: “U pime riendzo ra mina ni ku dzumba ka mina, u tiva ni tindlela ta mina hinkwato.” (Ndzimana 3) Siku ni siku, Yehovha u vona ‘tindlela ta hina hinkwato’—swihoxo swa hina hambi ku ri mintirho ya hina leyinene. Xana u dzikisa mianakanyo yakwe eka swilo swo biha kumbe leswinene? Rito ra Xiheveru leri hundzuluxeriweke ri ku “pima” ri nga ha vula ku “sefa” kumbe ku “peperha,” tanihi ndlela leyi n’wamapurasi a sefaka mungu lowu nga pfuniki nchumu leswaku a ta kuma mavele ya kahle. Xiga lexi nge “tiva” xi hundzuluxeriwe xi huma eka rito ra Xiheveru leri nga ha vulaka “ku khathalela.” Loko a lavisisa swilo leswi vagandzeri vakwe va swi vulaka ni leswi va swi endlaka siku ni siku, Yehovha u tsakisiwa hi leswinene. Ha yini? U tsakisiwa hi matshalatshala ya vona yo lava ku n’wi tsakisa.

Pisalema 139 yi hi dyondzisa leswaku Yehovha wa khathala swinene hi vagandzeri vakwe. Wa va lavisisa naswona wa va rindza loko va ri karhi va ya emahlweni ni vutomi bya vona bya siku ni siku. Xisweswo u tiva swiphiqo leswi va langutanaka na swona a tlhela a twisisa switlhavi swa miehleketo ni swa mbilu leswi nga ha vangiwaka hi maxangu lawa. Xana u susumeteleka ku gandzela Xikwembu xo tano lexi khathalaka? Loko swi ri tano, u nga tiyisekisiwa hi marito lawa: Yehovha a nge pfuki a ‘rivale ntirho wa n’wina ni rirhandzu leri mi ri kombiseke hikwalaho ka vito ra yena.’—Vaheveru 6:10.

Tindzimana ta Bibele leti u nga ti hlayaka hi September:

▪ Pisalema 119-150

[Nhlamuselo ya le hansi]