Xana Ku Ni Munhu La Vangaka Vubihi Hinkwabyo?

“VUBIHI hinkwabyo byi vangiwa hi Diyavulosi.” Marito wolawo ma vuriwe hi murhangeri wa mavuthu ya Nhlangano wa Matiko wa le Rwanda, a ri karhi a kombetela eka ku tsandzeka ka vona leswaku ku herisiwa ka rixaka a swi fanelanga swi tshikiwa etikweni rero hi 1994. Loko a vulavula hi vuharhi lebyi hlamarisaka bya nkarhi wolowo, mukambisisi un’wana u te: “Loko ku ri ni munhu loyi a hambetaka a va ni xivindzi xo vula leswaku Sathana a nga kona, a hlangane na mina emasirheni ya le Rwanda.” Xana swiendlo swo tano swa nsele swi vangiwa hi Diyavulosi?

Vanhu vo tala a va teki madzolonga ni nsele tanihi ntirho wa xivumbiwa xo biha xa moya lexi nga vonakiki. Vanhu vo tala va ehleketa leswaku swilo swo tano i vuyelo byo biha lebyi hi velekiweke na byona naswona xivangelo lexikulu xa vubihi i vutianakanyi lebyi hi nga na byona. Van’wana va ehleketa leswaku ntlawa wa vanhu lava fuweke ni lava nga ni vulawuri, lava tirhisanaka exihundleni emisaveni hinkwayo, i khale va ri karhi va kanganyisa vanhu leswaku va fuma misava. I ntiyiso leswaku ku ni vanhu lava solaka tihulumendhe ta tiko ni valawuri leswaku hi vona lava vangaka vuhomboloki hinkwabyo ni ku xaniseka loku va ku vonaka.

I yini leswi wena u swi pfumelaka? Ha yini vubihi ni swiendlo swa nsele ni ku xaniseka swi tele emisaveni hinkwayo ku nga khathariseki matshalatshala lama endliwaka yo swi herisa? Ha yini vanhu va ti komba va tsutsumela ku teka goza leri va vavisaka handle ko anakanya, va nga swi yingisi swilemukiso leswi va tshamelaka ku nyikiwa swona? Xana ku ni munhu la vangaka vubihi lebyi hinkwabyo? I mani loyi kahle-kahle a fumaka misava? Nhlamulo ya xivutiso lexi yi nga ha ku hlamarisa.