Xana Ku Kuma Nhlamulo Ya Xivutiso Lexi I Swa Nkoka?

“A ndzi ri ni malembe ya khume loko ndzi sungula ku tihumesa ni vafana. Eku sunguleni, a hi khomana hi mavoko ni ku ntswontswana. Kambe swi nga si ya kwihi, a hi khomana swirho swa miri swa le xihundleni ni ku ringeta timhaka ta masangu to hambana-hambana. Loko ndzi ri ni malembe ya 15, ndzi sungule ku tirha naswona ndzi tshineleriwe hi vavanuna entirhweni lava a va lava leswaku hi hlanganyela timhaka ta masangu. A ndzi lava ku va ni xivindzi kutani ndzi joyina vatirhi-kulorhi eka hinkwaswo leswi a va swi endla. A ndzi lava leswaku vanghana va mina va ndzi amukela, leswi a swi ta endla leswaku ndzi hlanganyela timhaka ta masangu.”—SARAH, * WA LE AUSTRALIA.

XANA swi nga ku hlamarisa ku tiva leswaku Sarah u kurisiwe endyangwini lowu tinyiketeleke eka vukhongeri? Vatswari vakwe va ringete ku n’wi kurisa hi milawu ya mahanyelo ya Bibele. Kambe Sarah u hlawule ndlela yin’wana.

Vo tala va nga pfumelelana ni ndlela leyi Sarah a yi hlawuleke. Va pfumela leswaku langutelo ra Bibele hi timhaka ta masangu ri hundzeriwe hi nkarhi. Van’wana a va voni ku hambana exikarhi ko vula leswaku i vanhu lava tinyiketeleke eka vukhongeri ni ku hlanganyela eka vutomi bya timhaka ta masangu lebyi nga riki enawini.

Xana i swa nkoka ku va u tiva ni ku hanya hileswi Bibele yi swi dyondzisaka hi timhaka ta masangu? Bibele yi vula leswaku yi “huhuteriwe hi Xikwembu naswona [yi] pfuna ku dyondzisa.” (2 Timotiya 3:16) Loko u pfumela leswaku Xikwembu xi vumbe vanhu naswona Bibele i Rito ra xona leri huhuteriweke, kutani leswi yi swi vulaka hi timhaka ta masangu i swa nkoka leswaku u swi tiva.

Khombo ra kona, vo tala va pfilunganyiwa hileswi Bibele yi swi dyondzisaka malunghana ni timhaka ta masangu. Varhangeri va vukhongeri va dyondzisa tidyondzo leti hambaneke malunghana ni timhaka ta masangu naswona va vula leswaku tidyondzo teto ti sekeriwe eBibeleni. Entiyisweni, tidyondzo teto ti avanyise tikereke to tala letikulu.

Ematshan’weni yo tshembela eka leswi van’wana va swi vulaka, ha yini u nga teki timinete ti nga ri tingani u kambisisa mhaka leyi hi wexe? Xihloko lexi landzelaka xi vulavula hi swivutiso swa khume leswi talaka ku vutisiwa malunghana ni langutelo ra Bibele hi timhaka ta masangu. Eka xihloko xexo u ta kuma tinhlamulo leti enerisaka leti sekeriweke eka leswi Bibele yi swi dyondzisaka hakunene. Xihloko xo hetelela xa swihloko leswi swa nxaxamelo xi ta kombisa leswaku ha yini leswi hi swi hlawulaka swi ri swa nkoka.

[Nhlamuselo ya le hansi]