Dyondza Eka Rito Ra Xikwembu

Xana Milawu Ya Xikwembu Yi Hi Vuyerisa Njhani?

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Ha yini hi fanele hi yingisa Xikwembu?

I swinene ku yingisa Xikwembu—hikuva xi hi tumbuluxile. Hambi ku ri Yesu a a yingisa Xikwembu minkarhi hinkwayo. (Yohane 6:38; Nhlavutelo 4:11) Milawu ya Xikwembu yi hi pfuna ku kombisa leswaku ha xi rhandza.—Hlaya 1 Yohane 5:3.

Milawu hinkwayo ya Yehovha Xikwembu ya hi pfuna. Yi hi dyondzisa ndlela leyinene ya vutomi sweswi ni ku hi kombisa ndlela leyi hi nga yi kumaka ha yona hakelo ya vutomi lebyi nga heriki enkarhini lowu taka.—Hlaya Pisalema 19:7, 11; Esaya 48:17, 18.

2. Xana milawu ya Xikwembu yi ri vuyerisa njhani rihanyo ra hina?

Nawu wa Xikwembu malunghana ni vudakwa wa hi sirhelela eka vuvabyi lebyi dlayaka ni le ka timhangu. Ku nwa ngopfu swa godzombela naswona swi endla leswaku vanhu va va ni mahanyelo yo biha. (Swivuriso 23:20, 29, 30) Yehovha wa hi pfumelela ku nwa byala, kambe ntsena loko hi ringanisela.—Hlaya Pisalema 104:15; 1 Vakorinto 6:10.

Yehovha u tlhela a hi tsundzuxa malunghana ni mavondzo, ku hlundzuka ku tlula mpimo ni le ka malangutelo man’wana lama nga riki manene. Ndlela leyi hi yi tirhisaka ha yona ndzayo yakwe yi ta vuyerisa rihanyo ra hina.—Hlaya Swivuriso 14:30; 22:24, 25.

3. Xana nawu wa Xikwembu wu nga hi sirhelela njhani?

Nawu wa Xikwembu a wu pfumeli leswaku vanhu lava tekaneke va hlanganyela timhaka ta masangu ni vanhu lava nga tekanangiki na vona. (Vaheveru 13:4) Mimpatswa leyi yingisaka nawu lowu yi titwa yi sirheleleke ngopfu naswona yi lunghiselela vana va yona vumundzuku lebyinene. Hi hala tlhelo, ku va munhu la cateke a hlanganyela timhaka ta masangu ni munhu loyi a nga tekanangiki na yena swi nga vanga vuvabyi, swi dlaya vukati, swi vanga madzolonga, ntshikilelo wa mianakanyo naswona mindyangu yi nga hetelela yi va ni mutswari un’we.—Hlaya Swivuriso 5:1-9.

Loko hi papalata swiyimo leswi nga hi ringaka leswaku hi hlanganyela timhaka ta masangu ni vanhu lava hi nga tekanangiki na vona, hi ta va hi sirhelela vuxaka bya hina ni Xikwembu. Hi ta tlhela hi papalata ku twisa van’wana ku vava.—Hlaya 1 Vatesalonika 4:3-6.

  4. Xana ku xixima vutomi swi hi vuyerisa njhani?

Vanhu lava xiximaka nyiko ya Xikwembu ya vutomi va va ni rihanyo lerinene loko va tshika mikhuva yo tanihi ku dzaha ni swilo swin’wana leswi nga vekaka vutomi ekhombyeni. (2 Vakorinto 7:1) Hambi ku ri vutomi bya ricece leri nga ekhwirini ra mana wa rona, Xikwembu xi byi teka byi ri bya risima. (Eksoda 21:22, 23) Kutani a hi fanelanga hi dlaya ricece leri nga siki velekiwaka hi vomu. Vanhu lava amukelaka langutelo ra Xikwembu hi vutomi, va landzela milawu ya vuhlayiseki entirhweni, ekaya ni loko va ri emovheni. (Deteronoma 22:8) Ku engetela kwalaho, a va nge veki vutomi bya vona ekhombyeni loko va ri emintlangwini hikuva vutomi i nyiko leyi humaka eka Xikwembu.—Hlaya Pisalema 36:9.

5. Xana ku kwetsima ka ngati ku hi vuyerisa njhani?

Ngati ya kwetsima hikuva Xikwembu xi vule leswaku yi yimela vutomi kumbe moya-xiviri wa xivumbiwa. (Genesa 9:3, 4) Nawu wa Xikwembu lowu fanisaka ngati ni vutomi wa hi vuyerisa. Njhani? Hikwalaho ka nawu wolowo, Xikwembu xi endle leswaku swi koteka ku rivaleriwa swidyoho.—Hlaya Levhitika 17:11-13; Vaheveru 9:22.

Ngati ya Yesu a yi hlawulekile hikuva a a hetisekile. Yesu u nyike Xikwembu nchumu lowu a wu yimela vutomi byakwe, ku nga ngati yakwe. (Vaheveru 9:12) Ngati yakwe leyi halatiweke yi endle leswaku swi koteka ku va hi kuma vutomi lebyi nga heriki.—Hlaya Matewu 26:28; Yohane 3:16.

Leswaku u kuma rungula leri engetelekeke, vona ndzima 12 na 13 ta buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.