Bibele Yi Hundzula Vutomi Bya Vanhu

XANA i yini lexi pfuneke nhwanyana loyi a kurisiweke hi ndlela yo vava leswaku a kuma xikongomelo xa xiviri evuton’wini? I yini lexi susumeteleke muxandzuki wa tipolitiki la nga ni madzolonga leswaku a va Mbhoni ya Yehovha? Hlaya leswi va swi vulaka.

“A Ndzi Ri Ni Torha Ro Kuma Rirhandzu Ni Musa.”—INNA LEZHNINA

LEMBE RO VELEKIWA: 1981

TIKO: RHAXIYA

MATIMU YAKWE: U KURISIWE HI NDLELA YO VAVA

VUTOMI BYA MINA: Ndzi velekiwe ndzi fe tindleve hi vatswari lava na vona va feke tindleve. Malembe yo sungula ya tsevu ya vutomi bya mina a ma tsakisa. Hiloko vatswari va mina va dlaya vukati. Hambileswi a ndza ha ri ntsongo swinene, a ndzi swi twisisa leswi ku dlaya vukati swi vulaka swona naswona swi ndzi twise ku vava swinene. Endzhaku ka loko va dlaye vukati, Tatana na buti wa mina va rhurhele eTroitsk, loko mina na Manana hi rhurhela eChelyabinsk. Hi ku famba ka nkarhi, Manana u tlhele a nghenela vukati. Tata wa mina wa vumbirhi a ri xindzendzele naswona a tshamela ku hi mbeyetela mina na Manana.

Hi 1993, buti wa mina la rhandzekaka u nwele ematini. Mhangu leyi yi endle leswaku swirho swa ndyangu wa ka hina swi tsemeka nhlana. Manana u sungule ku nwa byala leswaku a ta kota ku langutana ni mhangu leyi naswona u sungule ku ndzi xanisa hilaha tata wa mina wa vumbirhi a endla hakona. Ndzi sungule ku lava vutomi byo antswa. A ndzi ri ni torha ro kuma rirhandzu ni musa. Ndzi sungule ku ya etikerekeni to hambana-hambana leswaku ndzi ta kuma nchavelelo, kambe a swo fana ni kwala.

NDLELA LEYI BIBELE YI HUNDZULEKE VUTOMI BYA MINA HA YONA: Loko ndzi ri ni malembe ya 13, mudyondzi-kulorhi, loyi a ri Mbhoni ya Yehovha u ndzi byele timhaka tin’wana ta le Bibeleni. Swi ndzi tsakisile ku dyondza hi vanhu vo tano va le Bibeleni vo fana na Nowa na Yobo lava tirheleke Xikwembu ku nga khathariseki swiyimo swo tika. A swi tekanga nkarhi leswaku ndzi dyondza Bibele ni Timbhoni ni ku ya eminhlanganweni ya tona.

Ku dyondza Bibele swi endle leswaku ndzi vona tidyondzo to tala to saseka ta yona. Ndzi khumbeke swinene loko ndzi dyondza leswaku Xikwembu xi ni vito. (Pisalema 83:18) Ndzi tsakisiwe hi ku vona ndlela leyi Bibele yi pakanisaka ha yona loko yi profete hi swiyimo leswi a swi ta va kona “emasikwini yo hetelela.” (2 Timotiya 3:1-5) Nakambe ndzi tsakisiwe hi ku dyondza hi ntshembo wa ku pfuxiwa ka vanhu lava feke. Hakunene ndzi ta tlhela ndzi n’wi vona buti wa mina!—Yohane 5:28, 29.

Hambiswiritano, a hi vanhu hinkwavo lava  tsakeke na mina. Mana wa mina na tata wa mina wa vumbirhi a va venga Timbhoni ta Yehovha. Va ringete ku ndzi sindzisa leswaku ndzi tshika dyondzo ya mina ya Bibele. Kambe a ndzi swi rhandza leswi a ndzi swi dyondza naswona a ndzi tiyimisele ku ka ndzi nga swi tshiki.

A swi nga olovi ku tiyisela nkaneto lowu a wu huma eka ndyangu wa ka hina. Nakambe ndzi tsemeke nhlana loko ndzisana ya mina ya mufana, leyi a yi fambe na mina eminhlanganweni ya Timbhoni ta Yehovha na yona yi nwela ematini. Kambe minkarhi hinkwayo Timbhoni a ti ndzi seketela. Exikarhi ka tona, ndzi kume rirhandzu ni musa leswi a ndzi swi lava vutomi bya mina hinkwabyo. A ndzi swi tiva leswaku lebyi, ku nga va ku ri byona vukhongeri bya ntiyiso. Hi 1996, ndzi khuvuriwe ndzi va Mbhoni ya Yehovha.

NDLELA LEYI NDZI VUYERIWEKE HA YONA: Eka malembe ya tsevu lama nga hundza ndzi tekiwe hi wanuna lonene loyi vito rakwe ku nga Dmitry. Havumbirhi bya hina hi tirha erhavini ra Timbhoni ta Yehovha ra le St. Petersburg. Hi ku famba ka nkarhi, vatswari va mina va sungule ku ka va nga ha karhateki hikwalaho ka tidyondzo ta mina.

Ndzi swi tlangela swinene leswi ndzi tiveke Yehovha! Ku n’wi tirhela swi endle leswaku vutomi bya mina byi va ni xikongomelo.

“A Ndzi Ri Ni Swivutiso Swo Tala.”—RAUDEL RODRÍGUEZ RODRÍGUEZ

LEMBE RO VELEKIWA: 1959

TIKO: CUBA

MATIMU YAKWE: MUXANDZUKI WA TIPOLITIKI

VUTOMI BYA MINA: Ndzi velekiwe eHavana, le Cuba naswona ndzi kuriseriwe endhawini leyi nga ni vusweti laha nyimpi ya le switarateni yi tolovelekeke. Loko ndza ha kula, ndzi sungule ku rhandza ntlangu lowu vanhu vambirhi va lwaka ni mitlangu yin’wana yo lwa.

A ndzi ri xichudeni lexinene naswona vatswari va mina a va ndzi khutaza leswaku ndzi ya eyunivhesiti. Loko ndzi ri kwalaho, ndzi sungule ku swi vona leswaku fambiselo ra tipolitiki ra tiko ra ka hina ri fanele ri cinca. Ndzi endle xiboho xo xandzuka. Mina ni mudyondzi-kulorhi  hi hlasele phorisa, hi lava ku ri tekela xibalesa xa rona. Nyimpi yoleyo yi siye phorisa ri ri ni timbanga to chavisa enhlokweni. Mina ni mudyondzi-kulorhi hi pfaleriwe ekhotsweni hikwalaho ka nhlaselo wolowo naswona maphorisa ma hi gwevele rifu. A ndzi ri ni malembe ya 20 ntsena kambe a ndzi ri ekusuhi ni ku fa.

Leswi a ndzi ri ni xivundza exitokisini xa mina, ndzi praktise ndlela leyi a ndzi ta tikhoma ha yona emahlweni ka maphorisa. A ndzi nga lavi ku ma kombisa leswaku ndzi khomiwa hi rhumbyana. Hi nkarhi lowu fanaka, a ndzi ri ni swivutiso swo tala. A ndzi tivutisa leswaku: ‘Ha yini ku ri ni vuhomboloki byo tala swinene emisaveni? Xana vutomi byi ta tshama byi ri hi ndlela leyi ntsena?’

NDLELA LEYI BIBELE YI HUNDZULEKE VUTOMI BYA MINA HA YONA: Eku heteleleni, xigwevo xa hina xa rifu xi hungutiwile kutani hi gweviwa ku tshama malembe ya 30 ekhotsweni. Hi nkarhi wolowo ndzi hlangane ni Timbhoni tin’wana ta Yehovha, leti a ti ri ekhotsweni hikwalaho ka ripfumelo ra tona. Ndzi tsakisiwe hi xivindzi lexi kombisiweke hi Timbhoni teto naswona a ti ri ni moya wo rhula. Hambileswi a ti khomiwe hi xihoxo, a ti nga hlundzukanga kumbe ku kariha.

Timbhoni ti ndzi dyondzise leswaku Xikwembu xi ni xikongomelo hi vanhu. Ti ndzi kombe ku suka eBibeleni leswaku Xikwembu xi ta cinca misava ya hina yi va paradeyisi leyi nga ta pfumala vugevenga ni vuhomboloki. Ti ndzi byele leswaku misava yi ta tala hi vanhu lavanene, lava nga ta va ni lunghelo ro hanya hilaha ku nga heriki va ri lava hetisekeke.—Pisalema 37:29.

A ndzi swi tsakela leswi a ndzi ri karhi ndzi swi dyondza ni Timbhoni, kambe a ndzi ehleketa leswaku swi ta tika leswaku ndzi hanya hi ku rhula hilaha a ti endla hakona. A ndzi ehleketa leswaku a ndzi nge swi koti ku ka ndzi nga tikatsi eka swilo swa tipolitiki kumbe ku endla leswaku loko munhu a ndzi makala rhama, ndzi hundzuluxela ni lerin’wana. Kutani ndzi endle xiboho xo tihlayela Bibele hi ndzexe. Loko ndzi heta ku yi hlaya, ndzi xiye leswaku Timbhoni ta Yehovha hi vona vanhu va ri voxe lava hanyaka ku fana ni Vakreste vo sungula.

Loko ndzi ri karhi ndzi hlaya Bibele, a ndzi swi tiva leswaku ndzi fanele ndzi endla ku cinca lokukulu evuton’wini bya mina. Hi xikombiso, a ndzi fanele ndzi cinca mavulavulelo ya mina tanihi leswi a ndzi ri ni mukhuva wo va nkarhi na nkarhi ndzi tirhisa marito ya nhlambha. Nakambe a ndzi fanele ndzi tshika ku dzaha. A ndza ha fanele ndzi tshika ku tikatsa eka swa tipolitiki. A swi nga olovi leswaku ndzi endla ku cinca loku, kambe hikwalaho ko pfuniwa hi Yehovha hakatsongo-tsongo ndzi swi kotile.

Ku cinca kun’wana loku a ku tika swinene, a ku ri ku dyondza ku lawula ku hlundzuka ka mina. Ninamuntlha ndza ha khongela leswaku ndzi kota ku tilawula. Ndzi pfuniwe ngopfu hi tindzimana ta Bibele to fana na Swivuriso 16:32, leyi nge: “Loyi a hlwelaka ku hlundzuka wa antswa ku ri ni wanuna wa matimba, ni loyi a lawulaka moya wakwe ku ri ni loyi a tekaka muti.”

Hi 1991, ndzi khuvuriwe ndzi va Mbhoni ya Yehovha. Ndzi khuvuriwe ekhotsweni endzeni ka bavhu. Hi lembe leri landzeleke, van’wana va vabohiwa va hina va ntshunxiwile kutani va rhumeriwa eSpaniya hikuva a hi ri ni maxaka kwale. Loko ndzi fika eSpaniya, ndzi nambe ndzi ya eminhlanganweni ya Timbhoni ta Yehovha. Timbhoni ta kwalaho ti ndzi amukele hi mandla mambirhi onge hiloko ndzi ri ni malembe ndzi ri wun’wana wa tona naswona ti ndzi pfunile tanihi leswi a ndzi sungula vutomi lebyintshwa eSpaniya.

NDLELA LEYI NDZI VUYERIWEKE HA YONA: Ndzi wanuna la tsakeke naswona mina ni nsati wa mina swin’we ni vana va hina va vanhwanyana hi tirhela Xikwembu hi tsakile. Ndzi ni lunghelo ro heta nkarhi wa mina ndzi ri karhi ndzi pfuna van’wana leswaku va dyondza Bibele. Minkarhi yin’wana ndzi ehleketa hileswi ndzi tshameke ndzi lava ku fa loko ndza ha ri jaha naswona ndzi tlangela ndlela leyi ndzi vuyeriweke ha yona ku sukela hi nkarhi wolowo. A ndzo tlangela leswi ndzi hanyaka ntsena kambe ndzi tlangela ni ntshembo lowu ndzi nga na wona. Ndzi yi langutele hi mahlo-ngati Paradeyisi leyi tshembisiweke—leyi eka yona ku nga ta va ni vululami naswona “rifu a ri nge he vi kona.”—Nhlavutelo 21:3, 4.

[Marito lama tshahiweke exihlokweni lama nga eka tluka 19]

“Ndzi khumbeke swinene loko ndzi dyondza leswaku Xikwembu xi ni vito”

[Xifaniso lexi nga eka tluka 20]

Mina ni nuna wa mina hi ri karhi hi tiphina hi ku fambisa minkandziyiso ya ririmi ra mavoko ra vanhu lava feke tindleve