Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Xana vuprofeta bya Bibele bya pakanisa?

Xikwembu xa Matimba Hinkwawo hi xona ntsena lexi nga nyikelaka vuxokoxoko malunghana ni vumundzuku. (Amosi 3:7) Hi xikombiso, ku sukela eminkarhini ya khale xi profete hi ku ta ka munhu la vuriwaka Mesiya kumbe Kreste. Mesiya a ta va ntukulu wa Abrahama wanuna wo tshembeka. A ta va mufumi loyi a ta endla leswaku swi koteka eka vanhu vo tshembeka leswaku va kuma mikateko ya vutomi lebyi hetisekeke lebyi eka byona va nga ta ka va nga ha vabyi. (Genesa 22:18; Esaya 53:4, 5) Munhu loyi, Loyi a Tshembisiweke a ta huma eBetlehema.—Hlaya Mikiya 5:2.

Yesu u tikombise a ri Mesiya. Eka malembe-xidzana yo tlula nkombo ka ha ri emahlweni, Bibele yi profete leswaku Mesiya a ta velekiwa hi wanhwana naswona a ta sandziwa. A ta nyikela vutomi byakwe hikwalaho ka swidyoho swa lavo tala naswona a ta lahliwa ni vanhu lava fuweke. (Esaya 7:14; 53:3, 9, 12) Bibele yi tlhela yi vula leswaku eka malembe-xidzana yo tlula ntlhanu ka ha ri emahlweni, a ta nghena eYerusalema a khandziye mbhongolo naswona a ta xengiwa hi swiphemu swa silivhere swa 30. Vuxokoxoko hinkwabyo byi ve ntiyiso.—Hlaya Zakariya 9:9; 11:12.

2. Xana Xikwembu xi profeta hi masiku ya swiendlakalo?

Eka malembe-xidzana yo tlula ntlhanu ka ha ri emahlweni, Bibele yi profete lembe leri kongomeke ra vukona bya Mesiya. Emahlweni ko va a fika, nkarhi a wu pimiwa hi mavhiki ya malembe, leswi vulaka leswaku “vhiki” rin’we a ri lehe malembe ya nkombo. A ku hlanganisiwe 7 na 62 wa mavhiki wolawo, leswi endlaka ntsengo wa mavhiki ya 69 ya malembe. Ku nga ntsengo lowu endlaka 483 wa malembe. Xana ku pimiwa ka malembe wolawo ku sungule rini? Hi ku ya hi Bibele, ku sungule hi nkarhi lowu Nehemiya nandza wa Xikwembu a fikeke eYerusalema kutani a sungula ku pfuxeta muti. Matimu ya muti wa Peresiya ma vula leswaku a ku ri hi siku ra 455 B.C.E. (Nehemiya 2:1-5) Endzhaku ka malembe ya 483, Yesu u khuvuriwe tanihi Mesiya, hi lembe ra 29 C.E., ku nga lembe leri a ri profetiwe ka ha ri emahlweni.—Hlaya Daniyele 9:25.

  3. Xana vuprofeta bya Bibele bya hetiseka sweswi?

Yesu u profete hi swiendlakalo swa nkoka swa le minkarhini ya hina. Vuprofeta byakwe byi boxa mahungu lamanene ya Mfumo wa Xikwembu, lowu nga ta tisa ntshunxeko emisaveni hinkwayo eka vanhu lava rhandzaka Xikwembu. Mfumo wolowo wu ta herisa mafambiselo hinkwawo ya swilo yo homboloka lawa hi hanyaka eka wona.—Hlaya Matewu 24:14, 21, 22.

Vuprofeta bya Bibele byi wu hlamusela hi vuxokoxoko nkarhi lowu mafambiselo lawa ya swilo ma nga ta hela ha wona. Bibele yi paluxa leswaku emahlweni ko va sweswo swi endleka, vanhu a va ta onha misava. Nhlomulo lowu vangiwaka hi tinyimpi, ku kayivela ka swakudya, ku tsekatseka ka misava ni mintungu a wu ta andza. (Luka 21:11; Nhlavutelo 11:18) Vanhu a va nga ha ta va ni mahanyelo lamanene. Eminkarhini yoleyo ya mangava, valandzeri va Yesu a va ta chumayela mahungu lamanene ya Mfumo wa Xikwembu ematikweni hinkwawo.—Hlaya Matewu 24:3, 7, 8; 2 Timotiya 3:1-5.

4. Xana vumundzuku bya vanhu byi ta va byihi?

Xikwembu xa Matimba Hinkwawo xi vekele vanhu lava tshembekaka swilo leswinene. Yesu Kreste, ku nga Mesiya, swin’we ni lava a va hlawuleke, va ta fuma misava va ri etilweni. Va ta vumba Mfumo lowu nga ta fuma gidi ra malembe. Lava feke va ta pfuxiwa naswona va ta va ni lunghelo ro kuma vutomi lebyi nga heriki. Ku tlula kwalaho, Mfumo lowu wu ta hanyisa vanhu hinkwavo. Vuvabyi ni rifu a swi nge he vi kona.—Hlaya Nhlavutelo 5:10; 20:6, 12; 21:4, 5.

Leswaku u kuma rungula leri engetelekeke, vona matluka 23-25 na 197-201 ya buku leyi nge Xana Bibele Yi Dyondzisa Yini Hakunene? kombisiweke laha.