Bulo Ni Muakelani​—Xana Yesu I Xikwembu?

TIMBHONI TA YEHOVHA ta swi rhandza ku bula ni vaakelani va tona hi Bibele. Xana ku ni mhaka yo karhi eBibeleni leyi u tshameke u tivutisa yona? Xana ku ni leswi u lavaka ku swi tiva hi tidyondzo to karhi nileswi Timbhoni ta Yehovha ti swi pfumelaka? Loko swi ri tano, u nga kanakani ku ti vutisa loko u hlangana na tona. Ti ta swi tsakela ku ku pfuna.

Bulo leri landzelaka ri kombisa ndlela leyi Mbhoni ya Yehovha yi nga bulaka ha yona ni muakelani. Hi xikombiso, Karen la nga Mbhoni u endzele wansati la vuriwaka Samantha.

Xana I Ntiyiso Leswaku A Mi Pfumeli Eka Yesu?

Samantha: Mufundhisi wa mina u vula leswaku n’wina Timbhoni ta Yehovha a mi pfumeli eka Yesu. Xana sweswo i ntiyiso?

Karen: U nge ndzi ku tiyisekisa leswaku ha pfumela eka Yesu. Entiyisweni, hi tshemba leswaku ku kombisa ripfumelo eka Yesu i swa nkoka leswaku hi ta ponisiwa.

Samantha: Na mina ndzi pfumela sweswo.

Karen: Leswi hi swin’wana swa swilo leswi mina na wena hi pfumelelanaka eka swona. A ndzi nga si ku byela vito ra mina, hi mina Karen. Wena u mani?

Samantha: Hi mina Samantha. Ndzi tsakela ku ku tiva.

Karen: Na mina ndzi tsakela ku ku tiva Samantha. U nga ha va u tivutisa leswaku ‘Loko ku ri hileswaku hakunene Timbhoni ta Yehovha ti pfumela eka Yesu, ha yini vanhu van’wana va vula leswi hambaneke ha tona?’

Samantha: Ina, sweswo hi swona leswi ndzi lavaka ku tiva ha swona.

Karen: Hi ku komisa, hi ni ripfumelo leri tiyeke eka Yesu, kambe a hi pfumeli swilo hinkwaswo leswi vanhu va swi vulaka ha yena.

Samantha: Xana u nga ndzi nyika xikombiso?

Karen: Ina. Vanhu van’wana va vula leswaku Yesu o va munhu lonene ntsena. Kambe hina a hi pfumelelani na yona mhaka yoleyo.

Samantha: Na mina a ndzi pfumelelani na yona.

Karen: Kutani xexo i xin’wana xa swilo leswi mina na wena hi pfumelelanaka eka xona. Xikombiso xa vumbirhi hileswaku Timbhoni ta Yehovha a ti pfumelelani na tona tidyondzo leti kanetanaka nileswi Yesu a swi vuleke hi vuxaka byakwe ni Tatana.

Samantha: U vula yini?

Karen: Vukhongeri byo tala byi dyondzisa leswaku Yesu i Xikwembu. Kumbexana leswi hi swona leswi na wena u dyondzisiweke swona.

Samantha: Ina, mufundhisi wa mina u vula leswaku Xikwembu na Yesu i munhu un’we.

Karen: Kambe, xana wa pfumela leswaku ndlela leyinene yo dyondza ntiyiso hi Yesu i ku kambisisa leswi a swi vuleke ha yena?

Samantha: Ina, ndzi pfumelelana na swona.

Xana Yesu U Vule Yini?

Karen: A hi kambisisi ndzimana ya Bibele leyi hi pfunaka ku twisisa mhaka leyi kahle. Ndzi kombela u xiya leswi hi swi hlayaka eka Yohane 6:38. Yesu u te: “Ndzi xike hi le tilweni ku ta endla ku rhandza ka loyi a ndzi rhumeke, kambe ku nga ri ka mina.” Kutani  marito wolawo a ma ta pfilunganya loko ku ri hileswaku Yesu i Xikwembu.

Samantha: U vula yini?

Karen: Xiya leswaku Yesu u vule leswaku a nga xikanga hi le tilweni leswaku a ta endla ku rhandza kakwe.

Samantha: U vule leswaku a a tele ku ta endla ku rhandza ka Loyi a n’wi rhumeke.

Karen: Kambe loko ku ri hileswaku Yesu i Xikwembu, xana i mani a n’wi rhumeke ku suka etilweni? Naswona ha yini a titsongahatele ku endla ku rhandza ka Loyi a n’wi rhumeke?

Samantha: Se ndzi sungula ku twisisa leswi u swi vulaka. Kambe a ndzi tiyiseki leswaku ndzimana leyi yi ri yoxe yi tiyisekisa leswaku Yesu a hi Xikwembu.

Karen: Kambe xiya leswi Yesu a swi vuleke siku rin’wana. U vule marito lama fanaka eka ndzima leyi landzelaka ya Yohane. Xana u nga swi kota ku hlaya Yohane 7:16?

Samantha: U nge ndzi yi hlaya. “Kutani, Yesu a va hlamula a ku: ‘Leswi ndzi swi dyondzisaka a hi swa mina, kambe i swa loyi a ndzi rhumeke.’”

Karen: Ndza nkhensa Samantha. Hi ku ya hi ndzimana leyi, xana Yesu a a dyondzisa leswi humaka eka yena n’wini?

Samantha: Doo, u vule leswaku a swi huma eka Loyi a n’wi rhumeke.

Karen: U be kona. Kambe leswi swi tlakusa swivutiso leswi nge: ‘Xana Yesu a a rhume hi mani? Nakambe i mani loyi a n’wi dyondziseke ntiyiso lowu a wu dyondzisa?’ Xana munhu Loyi a a nga tlakukanga ku tlula Yesu? Phela, murhumi u tlakukile ku tlula loyi a rhumiweke.

Samantha: Sweswo swa tsakisa hakunene. A ndzi si tshama ndzi yi hlaya ndzimana yoleyo.

Karen: Nakambe xiya marito ya Yesu lama nga eka Yohane 14:28 lama nge: “Mi swi twile leswi ndzi mi byeleke swona leswaku, ndza famba naswona ndza vuya eka n’wina. Loko a mi ndzi rhandza, a mi ta tsaka leswi ndzi yaka eka Tatana, hikuva Tatana u nkulu eka mina.” Hi ku ya hi ndzimana leyi, xana Yesu a ta swi vurisa ku yini leswaku u ringana ni Tata wakwe?

Samantha: U vule leswaku Tatana u nkulu eka yena. Kutani ndzi vona onge a a teka Xikwembu tanihi lexi tlakukeke eka yena.

Karen: I ntiyiso. Hi xikombiso, xiya leswi Yesu a swi byeleke vadyondzisiwa vakwe hilaha swi tsariweke hakona eka Matewu 28:18. Ndzimana yoleyo yi ri: “Ndzi nyikiwe vulawuri hinkwabyo etilweni ni le misaveni.” Kutani, xana Yesu u vule leswaku minkarhi hinkwayo a a ri ni vulawuri?

Samantha: Doo, u vule leswaku u nyikiwe byona.

Karen: Kambe loko Yesu a ri Xikwembu, xana a nga nyikiwa njhani vulawuri byin’wana? Naswona u nyikiwe hi mani?

Samantha: Mhaka leyi yi lava ndzi yi dyela marhambu ya nhloko.

Xana A A Vulavula Na Mani?

Karen: Ka ha ri ni swilo swin’wana swi nga twisisekiki loko ku ri hileswaku hakunene Yesu i Xikwembu.

Samantha: Hi swihi swilo swa kona?

Karen: Hileswi vuriweke malunghana ni ku khuvuriwa ka Yesu. Xiya rungula leri tsariweke eka Luka 3:21, 22. Xana u nga hlaya tindzimana teto?

Samantha: “Kutani loko vanhu hinkwavo va khuvuriwile, Yesu na yena u khuvuriwile, naswona loko a ri karhi a khongela, tilo ri pfuleka kutani moya lowo kwetsima hi xivumbeko xa tuva wu xikela ehenhla ka yena, kutani rito ri huma etilweni: ‘U N’wana wa mina, la rhandzekaka; ndzi ku amukerile.’”

Karen: Xana u swi xiyile leswaku Yesu a a endla yini loko a ri karhi a khuvuriwa?

Samantha: A a ri karhi a khongela.

Karen: I ntiyiso leswaku hi nga ha tivutisa leswaku ‘Loko Yesu a ri Xikwembu, xana a a khongela eka mani?’

Samantha: Xexo i xivutiso xa kahle. Ndza swi lava ku tiva nhlamulo ya xona kutani ndzi ta vutisa mufundhisi wa mina.

Karen: Ka ha ri ni swin’wana leswi hi faneleke hi anakanyisisa ha swona: xiya leswaku endzhaku ka loko Yesu a hume ematini, ku ni munhu un’wana loyi a vulavuleke ku suka etilweni. Xana u swi xiyile leswaku munhu Loyi u te yini?

Samantha: U vule leswaku Yesu i N’wana Wakwe, Wa n’wi rhandza ni leswaku U n’wi amukerile.

Karen: Wa vurisa. Kambe loko Yesu a ri Xikwembu, i mani loyi a vuleke marito wolawo ku suka etilweni?

Samantha: A ndzi nga si tshama ndzi tivutisa sweswo.

 Ha Yini Vuxaka Lebyi Nga Kona Exikarhi Ka Xikwembu Na Yesu Byi Fanisiwa Ni Bya “Tatana” Ni Bya “N’wana”?

Karen: Hi leyi mhaka yin’wana yo bula ha yona: Hi hlaye leswaku Yesu u vulavule hi Xikwembu tanihi Tata wakwe wa le tilweni. Naswona loko Yesu a khuvuriwa, ku twale rito leri humaka etilweni ri vula leswaku Yesu i N’wananga. Entiyisweni, Yesu hi yexe u vule leswaku a a ri N’wana wa Xikwembu. Kutani loko a wu lava ku ndzi dyondzisa leswaku vanhu vambirhi va ringana, xana a wu ta tirhisa vuxaka byihi bya le ndyangwini ku va u kombisa yinhla yoleyo?

Samantha: A ndzi ta tirhisa bya vamakwavo vambirhi.

Karen: U be kona—kumbexana hambi ku ri mahahlwa lama fanaka. Kambe Yesu u kombetele eka Xikwembu tanihi Tatana kutani a vula leswaku yena i N’wana. Kutani u anakanya leswaku Yesu a a vula yini?

Samantha: Ndza yi vona yinhla ya wena. Yesu u hlamusela leswaku un’wana i nkulu eka lowun’wana naswona u na vulawuri lebyikulu ku tlula lowun’wana.

Karen: U be kona. Anakanya hi mhaka leyi: U kote ku ehleketa hi xikombiso lexi fanelaka kahle, xa vamakwavo kumbe mahahlwa. Loko Yesu a ri Xikwembu hakunene, xana a wu ehleketi leswaku Yesu, tanihi Mudyondzisi Lonkulu, a a ta va a ehlekete hi xikombiso lexi fanaka—kumbe hambi ku ri lexi antswaka ku tlula xexo?

Samantha: I ntiyiso.

Karen: Kambe ematshan’weni ya sweswo, u tirhise marito yo tanihi “Tatana” ni “N’wana” ku hlamusela vuxaka lebyi a nga na byona ni Xikwembu.

Samantha: U hlamusela yinhla ya nkoka.

I Yini Leswi Valandzeri Va Yesu Vo Sungula Va Swi Vuleke?

Karen: Ndzi nga si famba, ndzi tsakela leswaku ndzi bula na wena hi yinhla yin’wana emhakeni leyi loko u ri ni xinkarhana.

Samantha: Swi lulamile, ndza ha ri ni timinete ti nga ri tingani.

Karen: Loko ku ri hileswaku Yesu i Xikwembu hakunene, xana a wu nga ta langutela leswaku vadyondzisiwa vakwe va vula tano hi ku kongoma?

Samantha: Sweswo swa twala.

Karen: Kambe, eMatsalweni ku hava laha hi hlayaka sweswo. Ku hambana na sweswo, xiya leswi un’wana wa vadyondzisiwa va Yesu vo sungula, ku nga muapostola Pawulo, a swi tsaleke. Eka Vafilipiya 2:9, u hlamusela leswi Xikwembu xi swi endleke endzhaku ka ku dlayiwa ni ku pfuxiwa ka Yesu: “Xikwembu xi n’wi tlakusele exiyin’weni lexi tlakukeke [Yesu] kutani hi musa xi n’wi nyika vito leri nga ehenhla ka mavito man’wana hinkwawo.” Hi ku ya hi ndzimana leyi, xana Xikwembu xi n’wi endlele yini Yesu?

Samantha: Yi vula leswaku Xikwembu xi n’wi tlakusele exiyin’weni lexi tlakukeke.

Karen: I ntiyiso. Kambe loko ku ri hileswaku Yesu ni Xikwembu a va ringana loko Yesu a nga si fa ivi endzhakunyana Xikwembu xi n’wi tlakusela exiyin’weni lexi tlakukeke, xana a swi nga ta endla leswaku Yesu a va la tlakukeke ku tlula Xikwembu? Xana swi nga kotekisa ku yini leswaku munhu un’wana a va la tlakukeke ku tlula Xikwembu?

Samantha: Sweswo a swi nge koteki.

Karen: Ndzi pfumelelana na wena. Kutani hi ku seketela hi vumbhoni lebyi hinkwabyo, xana u nga vula leswaku Bibele yi dyondzisa leswaku Yesu i Xikwembu?

Samantha: Doo! Bibele yi vula leswaku i N’wana wa Xikwembu.

Karen: U tiyisile. Kambe u nge ndzi ku tiyisekisa leswaku Timbhoni ta Yehovha ti n’wi xixima swinene Yesu. Hi pfumela leswaku rifu rakwe tanihi Mesiya la tshembisiweke ri pfulele vanhu hinkwavo lava tshembekaka ndlela yo ponisiwa.

Samantha: Na mina ndzi pfumela sweswo.

Karen: Kutani u nga ha tivutisa leswaku, ‘Xana hi nga n’wi komba njhani Yesu leswaku hi tlangela ku va a nyikele hi vutomi byakwe hikwalaho ka hina?’ *

Samantha: Ndza tivutisa malunghana na sweswo.

Karen: Kumbexana ndzi nga tlhela ndzi vuya ndzi ta bula na wena hi nhlamulo ya le Bibeleni ya xivutiso xexo. Xana u ta va u ri kona hi nkarhi lowu fanaka vhiki leri taka?

Samantha: Ina, ndzi ta va ndzi ri kona.

Karen: Hi swona, ndzi ta ku vona vhiki leri taka.

[Nhlamuselo ya le hansi]