Bibele Yi Hundzula Vutomi Bya Vanhu

I YINI lexi pfuneke wansati loyi a tshamaka ePhilippines leswaku a tshika ku nwa byala ku tlula mpimo kutani a antswisa vutomi bya ndyangu wakwe? Ha yini munhu loyi a a hisekela karati wa le Australia a ve muchumayeri wa mahungu lamanene la nga ni ku rhula? Hlaya leswi vanhu lava va swi vulaka.

“Swi Teke Nkarhi Leswaku Ndzi Endla Ku Cinca Loku Lavekaka.”—CARMEN ALEGRE

LEMBE RO VELEKIWA: 1949

TIKO: PHILIPPINES

MATIMU YAKWE: A A RI XINDZENDZELE

VUTOMI BYA MINA: Ndzi velekiwe eSan Fernando, ku nga doroba leri nga exifundzheni xa Camarines Sur. Loko ndza ha ri muntshwa a ndzi tshama eAntipolo, ku nga Xifundzha xa le Rizal. Antipolo a ku ri xidorobana lexi nga riki na pongo loko ndzi rhurhela eka xona ro sungula lexi nga endhawini leyi nga tala hi tintshava ni ndhawu ya mabyanyi leyi nga ni mirhi yo tala. A swi nga talanga ndzi vona vanhu va famba nivusiku. Hambiswiritano, sweswi Antipolo i doroba lerikulu leri nga ni vanhu vo tala.

Endzhakunyana ka loko ndzi rhurhele eAntipolo, ndzi hlangane ni wanuna loyi a vuriwaka Benjamin, ivi endzhakunyana hi tekana. Ndzi kume vukati byi tika swinene ku tlula leswi a ndzi swi languterile. Leswaku ndzi balekela swiphiqo swa mina, ndzi sungule ku nwa byala ku tlula mpimo. Ndzi sungule ku va ni vumunhu lebyi nga riki kahle, lebyi a byi vonaka eka ndlela leyi a ndzi n’wi khoma ha yona nuna wa mina ni vana va mina. A ndzi tsandzeka ku tikhoma kumbe ku lehisa mbilu loko ndzi tirhisana na vona. A ndzi nga n’wi xiximi nuna wa mina. Swi le rivaleni leswaku vutomi bya ndyangu wa hina a byi nga tsakisi.

NDLELA LEYI BIBELE YI HUNDZULEKE VUTOMI BYA MINA HA YONA: Sesi wa nuna wa mina, ku nga Editha, la nga Mbhoni ya Yehovha u ringanyete leswaku mina na Benjamin hi dyondza Bibele ni Timbhoni. Hi amukele xiringanyeto xexo hi ri ni ntshembo wa leswaku xi ta antswisa vutomi bya ndyangu wa hina.

Loko hi ri karhi hi dyondza Bibele, hi dyondze tidyondzo to tala letinene. Marito lama nga eka Nhlavutelo 21:4 ma ndzi khumbe mbilu. Malunghana ni vanhu lava nga ta hanya enkarhini lowu taka eparadeyisini ya laha misaveni ehansi ka Mfumo wa Xikwembu, ndzimana yoleyo yi vula leswaku Xikwembu “xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.” A ndzi lava ku va exikarhi ka vanhu lava nga ta tiphina hi mikateko yoleyo.

Ndzi sungule ku swi xiya leswaku a ndzi fanele ndzi endla ku cinca lokukulu eka langutelo ni le ka mahanyelo ya mina. Swi teke nkarhi leswaku ndzi endla ku cinca loku lavekaka, kambe eku heteleleni ndzi swi kotile ku tshika ku nwa byala ku tlula mpimo. Ndzi tlhele ndzi dyondza ku va ni musa ni ku lehisa mbilu loko ndzi tirhisana ni ndyangu wa mina. Tlhandlakambirhi, ndzi dyondze ku xixima nuna wa  mina ni ku tirhisana na yena loko a ri karhi a rhangela endyangwini wa hina.

Loko mina na Benjamin hi sungula ku ya eminhlanganweni ya Timbhoni ta Yehovha, hi tsakisiwe ngopfu hileswi hi swi voneke. Timbhoni a ti gembuli, a ti nwi ku tlula mpimo naswona a ti na xihlawuhlawu. Ti xixima munhu un’wana ni un’wana. A hi khorwiseka leswaku hi kume vukhongeri bya ntiyiso.—Yohane 13:34, 35.

NDLELA LEYI NDZI VUYERIWEKE HA YONA: Vutomi bya ndyangu wa hina byi antswe hi ndlela leyi xiyekaka. Mina na Benjamin hi ni ntsako evukatini bya hina naswona hi tiphina hi ku dyondzisa van’wana Bibele. Vana va hina lavakulu va majaha ni vasati va vona na vona va sungule ku dyondza Bibele. Hi ni ntshembo wa leswaku hi ku famba ka nkarhi va ta hi joyina eku tirheleni ka Yehovha. Hakunene leyi i ndlela leyinene ya vutomi.

“A Ndzi Vona Ku Ri Hava Munhu Loyi A A Ta Ndzi Hlula.”—MICHAEL BLUNSDEN

LEMBE RO VELEKIWA: 1967

TIKO: AUSTRALIA

MATIMU YAKWE: A A HISEKELA KARATI

VUTOMI BYA MINA: Ndzi kulele eAlbury, ku nga doroba ro saseka leri fuweke leri nga eNew South Wales. Ku fana ni madoroba yo tala, na rona ri na byona vugevenga. Kambe hi ntolovelo, doroba ra Albury ri tiviwa tanihi ndhawu leyi hlayisekeke yo tshama eka yona.

Ndzi kulele emafurheni. Hambileswi vatswari va mina va dlayeke vukati loko ndzi ri ni malembe ya nkombo, a va tiyiseka leswaku mina na buti wa mina ni vasesi wa mina vambirhi a hi pfumali nchumu. Ndzi kume dyondzo ya kahle, ndzi ya exikolweni xa kahle xa le ndhawini yoloye lexi nga riki xa mfumo. Tata wa mina a a lava leswaku loko ndzi heta tidyondzo ta mina ndzi va n’wamabindzu. Hambiswiritano, a ndzi yi rhandza swinene mintlangu laha a ndzi ri nghwazi yo chovha xikanyakanya ni ku tlanga karati. Ndzi hetelele ndzi kume ntirho laha ku lunghisiwaka timovha, lowu a wu ndzi nyika nkarhi wo tala leswaku ndzi endla mintlangu ya mina.

A ndzi tinyungubyisa hi ku endla vutiolori leswaku miri wa mina wu tshama wu ri ni matimba. Hi ku famba ka nkarhi, a ndzi vona ku ri hava munhu loyi a a ta ndzi hlula. A swi ndzi olovela ku tirhisa matimba ya mina leswaku ndzi hlula van’wana. Leswi mukongomisi wa mina wa karati a a swi tiva leswaku ndzi le ku lwisaneni ni ku va ndzi nga tirhisi matimba ya mina hi ndlela yo biha, u ndzi dyondzise ku tikhoma ni ku va ni mahanyelo lamanene. Nkarhi na nkarhi a kandziyisa nkoka wa ku yingisa ni ku tshembeka.

NDLELA LEYI BIBELE YI HUNDZULEKE VUTOMI BYA MINA HA YONA: Loko ndzi sungula ku dyondza Bibele, ndzi dyondze leswaku Yehovha u venga madzolonga. (Pisalema 11:5) Eku sunguleni a ndzi ehleketa leswaku karati a hi madzolonga kambe i ntlangu lowu endliwaka hi ndlela yo hlayiseka. A ndzi anakanya leswaku karati yi khutaza vunene ni mahanyelo lamanene lama fambisanaka ni leswi Bibele yi swi dyondzisaka. Mpatswa lowu nga Timbhoni lowu dyondzeke na mina a wu lehisa mbilu swinene. A wu nga si tshama wu ndzi byela leswaku ndzi tshika karati; kambe wu hambete wu ndzi dyondzisa ntiyiso wa Bibele.

 Loko vutivi bya mina hi Bibele byi ya byi kula ni vuxaka bya mina na Yehovha byi ya byi kula, ndzi sungule ku languta swilo hi ndlela leyi hambaneke. Swi ndzi tsakisile loko ndzi dyondza hi xikombiso lexi vekiweke hi N’wana wa Yehovha, ku nga Yesu. Hambileswi Yesu a a ri ni matimba swinene, a nga kalanga a ma tirhisela madzolonga. Ndzi khumbiwe swinene hi marito yakwe lama nga eka Matewu 26:52 lama nge: “Hinkwavo lava khomaka banga va ta lova hi banga.”

Loko ndzi ri karhi ndzi dyondza hi Yehovha, ndzi ye ndzi n’wi rhandza ni ku n’wi xixima swinene. Loko ndzi ehleketa leswaku Muvumbi wa hina la nga ni vutlhari ni matimba swinene a nga ndzi khathalela, sweswo swi ndzi khumbile swinene. Ndzi tsakisiwe hi ku dyondza leswaku hambileswi ndzi khomiseke Yehovha tingana kumbe loko ndzi titwa onge swilo hinkwaswo swa tika naswona ndzi lava ku lahla thawula, a nge pfuki a ndzi tshikile ntsena loko ndzi hambeta ndzi ringeta. Ndzi chaveleriwe swinene hi xitshembiso xakwe lexi nge: “Mina, Yehovha Xikwembu xa wena, ndzi khoma voko ra wena ra xinene, yena Loyi a ku byelaka a ku, ‘U nga chavi. Mina ndzi ta ku pfuna.’” (Esaya 41:13) Loko ndzi xiya leswaku ndzi kombiwe rirhandzu ro tano, a ndzi nga swi lavi ku lahlekeriwa ha rona.

A ndzi swi tiva leswaku ku tshika karati a ku ta va nchumu wo tika lowu ndzi nga si tshamaka ndzi wu endla. Kambe a ndzi swi tiva leswaku a swi ta tsakisa Yehovha naswona a ndzi tiyiseka leswaku ku n’wi tirhela swi tlula xitlhavelo xin’wana ni xin’wana. Eku heteleleni ndzi khorwisekile loko ndzi hlaya marito ya Yesu lama nga eka Matewu 6:24 lama nge: “Ku hava loyi a nga vaka hlonga ra tihosi timbirhi.” Ndzi swi xiyile leswaku a swi nge koteki leswaku ndzi tirhela Yehovha hi ku helela kambe ndzi hambeta ndzi tlanga karati, tanihi leswi tipakani ta mina a ti ta endla leswaku ndzi tlhelela eka karati. Nkarhi a wu fikile wo hlawula leswi a ndzi lava ku swi rhangisa evuton’wini bya mina, ku nga ku tirhela Yehovha kumbe ku tlanga karati.

A swi nga olovi ku tshika karati. Ndzi lwisane ni swiphiqo swo tala. A ndzi khapakhapa hi ntsako ku tiva leswaku a ndzi tsakisa Yehovha. Kambe a ndzi tlhela ndzi twa onge ndzi xenga mukongomisi wa mina wa karati. Vanhu lava tlangaka karati hakanyingi va languta ku xenga munhu un’wana tanihi xidyoho lexi nga rivaleriwiki. Van’wana va hlawula hambi ku ri ku tidlaya ematshan’weni yo langutana ni ku khomisiwa tingana.

A ndzi khomiwa hi tingana swinene ku hlamusela mukongomisi wa mina wa karati xivangelo xo va ndzi tshika. Ematshan’weni ya sweswo, ndzi endle leswaku swi nga ha koteki ku burisana na yena ni vanghana van’wana va mina lava a ndzi tlanga na vona karati. A ndzi swi tiva leswaku ndzi endle nchumu lowunene hi ku va ndzi tshika karati. Ndzi titwe nandzu hikwalaho ka leswi ndzi nga va hlamuselangiki hi vupfumeri bya mina lebyintshwa, ndzi tshika lunghelo ra ku byela van’wana hileswi ndzi swi pfumelaka. Ndzi titwe onge ndzi khomise Yehovha tingana emahlweni ko va ndzi sungula ku n’wi tirhela. Leswi hinkwaswo a swi nga ndzi dyisi byi rhelela. Minkarhi yo tala ndzi ringete ku khongela eka Yehovha kambe eku heteleleni a ndzi tikuma ndzi ri karhi ndzi rila hi ku twa ku vava.

Yehovha u fanele a vone nchumu wa kahle eka mina hikuva u susumetele vamakwerhu va le vandlheni leswaku va ndzi seketela. Rirhandzu ra vona, nchavelelo ni xinakulobye xa vona a swi hlamarisa swinene. Ndzi tlhele ndzi chaveleriwa hi rungula leri nga eBibeleni ra Davhida na Bati-xeba. Hambileswi Davhida a endleke swidyoho leswikulu, Yehovha u n’wi rivalerile endzhaku ka loko a hundzuke hi mbilu hinkwayo. Loko ndzi anakanyisisa hi rungula rero, swi ndzi pfune leswaku ndzi rivala swihoxo swa mina.

NDLELA LEYI NDZI VUYERIWEKE HA YONA: Emahlweni ko va ndzi dyondza Bibele, a ndzi nga khathali hi vanhu van’wana. Kambe hikwalaho ko pfuniwa hi Yehovha ni nsati wa mina wo saseka loyi hi nga ni malembe ya nkombo hi tekanile, ndzi dyondze ku va ni ntwela-vusiwana. Hi ve ni nkateko wo va ni lunghelo ro dyondza Bibele ni vanhu vo hlayanyana, ku katsa ni lava langutanaka ni swiphiqo. Ku vona rirhandzu ra Yehovha ri khumba vutomi bya vanhu van’wana swi ndzi tisele ntsako ku tlula lowu a ndzi ta va na wona hi ku va nghwazi ya karati.

[Marito lama tshahiweke exihlokweni lama nga eka tluka 14]

“Loko ndzi ehleketa leswaku Muvumbi wa hina la nga ni vutlhari ni matimba swinene a nga ndzi khathalela, sweswo swi ndzi khumbile swinene”

 [Bokisi/Xifaniso lexi nga eka tluka 15]

“Ndza Swi Nkhensa Swihloko Leswi Swo Tsakisa Swa Ntlhandlamano!”

Xana u tiphinile hi ku hlaya hi mintokoto leyi? Yoleyo ko va mintokoto yimbirhi ntsena eka mintokoto yo tano yo tlula 50 leyi kandziyisiweke eka Xihondzo xo Rindza ku sukela hi August 2008. Swihloko swa ntlhandlamano leswi nge “Bibele Yi Hundzula Vutomi Bya Vanhu” swi ve leswi rhandzekaka exikarhi ka vahlayi va hina. Ha yini vanhu vo tala va swi kume swi ri leswi kokaka rinoko?

Vanhu lava ku vulavuriwaka ha vona eka swihloko leswi va huma eka swiyimo swo hambana-hambana. Loko va nga si dyondza hi Yehovha Xikwembu, van’wana a va hanya bya ka byandlana kambe va pfumala xikongomelo xa xiviri evuton’wini. Van’wana a va ri ni swiphiqo leswikulu, swo tanihi ku va ni rigombo kumbe ku tirhisa swidzidziharisi kumbe byala hi ndlela yo biha. Van’wana va kule va ri karhi va tiva Yehovha kambe va tshika ku n’wi gandzela hi ku famba ka nkarhi. Mintokoto yoleyo hinkwayo yi kombisa leswaku swa koteka ku va munhu a hundzuka leswaku a tsakisa Xikwembu. Nakambe ku endla tano swa vuyerisa minkarhi hinkwayo. Xana mintokoto leyi yi va vuyerisa njhani vahlayi va hina?

Muhlayi un’wana u hlamusela ndlela leyi xihloko lexi nga eka nkandziyiso wa February 1, 2009, xi va pfuneke ha yona vabohiwa van’wana ekhotsweni ra vavasati.

▪ Wa hlamusela: “Vabohiwa vo tala va nga twisisa ndlela leyi vanhu lava ku vulavuriweke ha vona eka xihloko lexi va titwaka ha yona. Swifaniso leswi munhu un’wana ni un’wana a tekiweke swona emahlweni ko va a hundzuka ni loko se a hundzukile swin’we ni matimu yakwe swa pfuna swinene. Vabohiwa vo tala va langutane ni swiyimo leswi fanaka. Endzhaku ko hlaya mintokoto leyi, vabohiwa vambirhi va sungule ku dyondza Bibele.”—C. W.

Mintokoto leyi nga eka swihloko leswi swa ntlhandlamano yi va khumbe swinene vahlayi van’wana. Hi xikombiso, nkandziyiso wa April 1, 2011, wu ni ntokoto wa Guadalupe Villarreal, loyi a tshikeke vusodoma leswaku a tirhela Yehovha. Xiya mapapila mambirhi ntsena eka yo tala lama humaka eka vahlayi va hina malunghana ni ntokoto wakwe.

▪ “Ntokoto wa Guadalupe wu ndzi khumbe swinene. Swa tsakisa ku vona ndlela leyi rirhandzu ra Yehovha ni Rito rakwe ri nga hundzulaka munhu hilaha ku heleleke!”—L. F.

▪ “Enkarhini lowu hundzeke, ndzi ringete ku byela munhu un’wana ni un’wana hi ripfumelo ra mina, ku katsa ni vasodoma. Kambe hi ku famba ka nkarhi ndzi xiye leswaku a ndzi va honisa vanhu vo tano hambi ku ri ku va papalata. Xihloko lexi xi ndzi pfune swinene. Xi ndzi pfune ku languta vanhu vo tano hilaha Yehovha a endlaka hakona—tanihi vanhu lava nga vaka vagandzeri vakwe.”—M. K.

Ntokoto wun’wana lowu tsakiseke vahlayi vo tala i wa Victoria Tong, loyi ntokoto wakwe wu nga eka nkandziyiso wa August 1, 2011. U hlamusele ndlela yo vava leyi a kurisiweke ha yona. Wa pfumela leswaku a swi n’wi tikela ku tshemba leswaku Yehovha wa n’wi rhandza, hambiloko se ku hundze malembe a ri karhi a n’wi tirhela. Kutani u hlamusele leswi hakatsongo-tsongo swi n’wi pfuneke ku amukela leswaku Yehovha wa n’wi rhandza. Xiya leswi vahlayi van’wana va swi vulaka malunghana ni ntokoto wakwe.

▪ “Ntokoto wa Victoria wu ndzi khumbe mbilu. Ndzi langutane ni swiphiqo swo tala evuton’wini bya mina. Nkarhi na nkarhi a ndzi lwisana ni miehleketo leyi hoxeke—hambiloko se ku hundze malembe ndzi ri Mbhoni leyi khuvuriweke. Kambe ntokoto wa Victoria wu endla leswaku ndzi tikarhatela ku vona leswi Yehovha a swi vonaka eka mina.”—M. M.

▪ “Loko ndza ha ri ntsongo, ndzi lwisane ni ku tshika ku hlalela swifaniso swo navetisa rimbewu leswi se a swi ndzi godzomberile. Sweswinyana ndzi tlhele ndzi wela endzingweni wolowo. Ndzi lave mpfuno eka vakulu lava nga Vakreste naswona ndzi endle nhluvuko wo hlula xiphiqo xa mina. Vakulu va ndzi tiyisekise leswaku Xikwembu xi na rirhandzu ni tintswalo. Kambe minkarhi yin’wana ndza ha titwa ndzi ri xikangalafula, ndzi vona onge a swi nge koteki leswaku Yehovha a ndzi rhandza. Ku hlaya ntokoto wa Victoria swi ndzi pfunile hakunene. Sweswi ndza swi xiya leswaku loko ndzi anakanya leswaku Xikwembu a xi nge swi koti ku ndzi rivalela, hi marito man’wana ndzi vula leswaku gandzelo ra nkutsulo ra N’wana wa xona a ri enelanga leswaku ri funengeta swidyoho swa mina. Ndzi hlayise xihloko lexi leswaku ndzi ta xi hlaya ni ku anakanyisisa ha xona nkarhi wun’wana ni wun’wana loko ndzi titwa ndzi ri xikangalafula. Ndza swi nkhensa swihloko leswi swo tsakisa swa ntlhandlamano!”—L. K.