Ha Yini Mutwi Wa Xikhongelo A Pfumelela Ku Xaniseka?

HAMBILOKO va khongela, vanhu van’wana va kanakana leswaku Xikwembu xi kona. Ha yini va kanakana? Kumbexana hileswi va vonaka ku ri ni ku xaniseka konghasi laha misaveni. Xana u tshame u tivutisa leswaku ha yini Xikwembu xi pfumelela ku xaniseka?

Xana hakunene Xikwembu xi vumbe vanhu hi ndlela leyi va nga ha yona sweswi—va nga hetisekangi naswona va xaniseka? A hi nga ta swi kota ku xixima xikwembu lexi lavaka leswaku vanhu va xaniseka. Kambe xiya mhaka leyi: A hi nge u le ku jika-jikeni u ri karhi u nyanga movha lowuntshwa lowu u wu tsakelaka kutani u kuma leswaku tlhelo lerin’wana ra wona ri onhakile, xana a wu ta hetelela hi ku vula leswaku vaendli va wona va wu endle hi ndlela yoleyo? Doo! A wu ta vula leswaku vaendli va wona va wu endle wu ri kahle naswona ku fanele ku ri ni munhu kumbe nchumu lowu wu onheke.

Hilaha ku fanaka, loko hi tsakela ndlela ya kahle leyi ntumbuluko wu endliweke ha yona kutani hi vona hasahasa ni vukanganyisi lebyi weleke vanhu, xana hi fanele hi gimeta hi ku vula yini? Bibele yi dyondzisa leswaku Xikwembu xi vumbe mpatswa wa vanhu vo sungula wu hetisekile kambe endzhakunyana wu tivangele maxangu hi woxe. (Deteronoma 32:4, 5) Mahungu lamanene hileswaku Xikwembu xi tshembise ku herisa maxangu wolawo—xi endla leswaku vanhu lava yingisaka va tlhela va hetiseka. Hambiswiritano, ha yini xi teka nkarhi wo leha swonghasi?

Ha Yini Xi Teka Nkarhi Wo Leha?

Xivangelo xa kona xi fambisana ni xivutiso xa leswaku i mani loyi a faneleke a fuma vanhu. Xikongomelo xa Yehovha a ku nga ri leswaku vanhu va tifuma. A a lava ku va Mufumi wa vona. Bibele yi ri: “Munhu loyi a fambaka a nga ka a nga wu kongomisi nkondzo wa yena.” (Yeremiya 10:23) Lexi twisaka ku vava, vanhu vo sungula va hlawule ku xandzukela vuhosi bya Xikwembu. Xiendlo xexo  xo biha xi va endle vadyohi. (1 Yohane 3:4) Hikwalaho ka sweswo, va lahlekeriwe hi ku hetiseka ka vona naswona va tise maxangu eka vona swin’we ni le ka vana va vona.

Ku ringana malembe ya magidi, Yehovha u pfumelele vanhu leswaku va tifuma naswona matimu ya kombise leswaku vanhu a va na vuswikoti byo endla tano. Swi kombisa leswaku mimfumo hinkwayo ya vanhu yi vanga ku xaniseka. Ku hava ni wun’we wa yona lowu heriseke nyimpi, vugevenga, vuhomboloki kumbe mavabyi.

Xana Xikwembu Xi Ta Ku Lunghisa Njhani Ku Onhaka Loku?

Bibele yi tshembisa leswaku ku nga ri khale Xikwembu xi ta tisa misava leyintshwa ya ku lulama. (2 Petro 3:13) Lava va tiendlelaka xiboho xa ku kombisa rirhandzu eka van’wana ni le ka Xikwembu hi vona ntsena va nga ta pfumeleriwa ku hanya emisaveni leyi.—Deteronoma 30:15, 16, 19, 20.

Bibele yi tlhela yi vula leswaku hi “siku ra vuavanyisi” leri tshinelaka hi ku hatlisa, Xikwembu xi ta herisa ku xaniseka ni lava va ku vangaka. (2 Petro 3:7) Endzhaku ka sweswo, Mufumi loyi a vekiweke hi Xikwembu, ku nga Yesu Kreste, u ta fuma vanhu lava yingisaka. (Daniyele 7:13, 14) Xana i yini leswi mfumo wa Yesu wu nga ta swi hetisisa? Bibele yi ri: “Lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—Pisalema 37:11.

Tanihi Hosi ya le tilweni, Yesu u ta herisa ku onhaka—loku katsaka vuvabyi, ku dyuhala ni rifu—loku vangiweke hi vanhu lava xandzukeleke Yehovha “xihlovo xa vutomi.” (Pisalema 36:9) Yesu u ta tshungula hinkwavo lava amukelaka vuhosi byakwe lebyi nga ni rirhandzu. Ehansi ka mfumo wakwe, switshembiso leswi swa le Bibeleni swi ta hetiseka:

▪ “Ku hava munhu la tshamaka kona la nga ta  ku: ‘Ndza vabya.’ Vanhu lava tshamaka etikweni rero va ta va va rivaleriwe xidyoho xa vona.”—Esaya 33:24.

▪ “[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:4.

Xana a swi chaveleli ku tiva leswaku ku nga ri khale Xikwembu xi ta hetisisa xitshembiso xa xona xa ku herisa ku xaniseka hinkwako? Loko swa ha ri tano, hi fanele hi nga heli matimba eka leswaku xa swi twa swikhongelo swa hina hambiloko xi pfumelela ku xaniseka swa xinkarhana.

Xikwembu xi kona. Xi nga ku twa, hambiloko u phofula ku vava loku u ku twaka ni maxangu. Nakambe xi swi langutele hi mahlo-ngati ku ku vona u tiphina hi ku hanya hi nkarhi lowu ku kanakana ka wena ni ku twa ku vava swi nga ta va swi nga ha ri kona.