NHLAMULO i ina. Loko a vulavula hi lava a va rhandzaka, Yehovha u tshembisa a ku: “Ndzi ta va rivalela xihoxo xa vona, ni xidyoho xa vona a ndzi nge he xi tsundzuki.” (Yeremiya 31:34) Xisweswo, Yehovha u hi tiyisekisa leswaku loko a rivalela vadyohi lava hundzukaka, a nga ha swi tsundzuki swidyoho swa vona. Kambe xana hakunene leswi swi vula leswaku Mutumbuluxi wa vuako hinkwabyo u tsandzeka ku tsundzuka swidyoho leswi a swi rivaleleke vanhu? Marito ya Ezekiyele ma hlamusela ndlela leyi Xikwembu xi rivalelaka ni ku rivala ha yona.—Hlaya Ezekiyele 18:19-22.

Hi ku tirhisa muprofeta Ezekiyele tanihi muvulavuleri, Yehovha u vule leswaku a a ta avanyisa tiko ra Yuda ni ra Yerusalema lama nga tshembekiki. Tiko hinkwaro a ri tshike ku gandzela Yehovha naswona a ri tele madzolonga. Yehovha u vule ka ha ri emahlweni leswaku tiko ra Yerusalema a ri ta lovisiwa hi Vababilona. Kambe loko Yehovha a ri karhi a vula rungula leri ra vuavanyisi, u vule ni rungula leri nyikaka ntshembo. Munhu un’wana ni un’wana a ri ni lunghelo ra ku tihlawulela; un’wana ni un’wana a a ri ni vutihlamuleri eka xiboho lexi a xi tekaka.—Tindzimana 19, 20.

Kambe ku vuriwa yini hi loko munhu a hundzuka eku endleni ka leswo biha kutani a endla leswinene? Yehovha u te: “Loko ku ri lowo homboloka, loko o tshuka a tlhela eswidyohweni swakwe hinkwaswo leswi a swi endleke, a hlayisa milawu ya mina hinkwayo, a kombisa vululami ni ku tshembeka, kunene u ta hambeta a hanya. A nga ka a nga fi.” (Ndzimana 21) Ina, Yehovha a a “lunghekele ku rivalela” mudyohi loyi a hundzukeke eswiendlweni swakwe swa khale, a kombisa ku hundzuka ka xiviri.—Pisalema 86:5.

Ku vuriwa yini hi swidyoho leswi a swi endleke? Yehovha u te: “Ku tlula nawu kakwe hinkwako loku a ku endleke—a ku nge tsundzukiwi eka yena.” (Ndzimana 22) Xiya leswaku swidyoho swa munhu la hundzukaka a swi “nge tsundzukiwi eka yena.” Ha yini mhaka leyi yi ri ya nkoka?

EBibeleni, rito ra Xiheveru leri hundzuluxeriweke ri va “tsundzuka” ri nga ha vula swo tala ku tlula ku tsundzuka swilo swa nkarhi lowu hundzeke. Loko yi vulavula hi rito leri, buku yin’wana ya tinhlamuselo ta Bibele yi ri: “Entiyisweni, minkarhi yo tala ri nga ha vula xiendlo xo karhi kumbe ri humelela swin’we ni maendli ya ku komba xiendlo xo karhi.” Xisweswo, “ku tsundzuka” swi nga ha vula “ku endla.” Hikwalaho, loko Yehovha a vula leswaku swidyoho swa munhu la hundzukaka swi “nge tsundzukiwi eka yena,” U vula leswaku hi ku famba ka nkarhi A nge tlheli a endla swo karhi eka munhu yoloye hi ku n’wi hehla kumbe ku n’wi xupula hikwalaho ka swidyoho sweswo. *

Marito lama nga eka Ezekiyele 18:21, 22 ma kombisa ndlela leyi ku rivalela ka Yehovha ku nga ha yona leswaku ku khumba timbilu ta hina. Loko Yehovha a hi rivalela swidyoho swa hina, a nge tlheli a pfuxa swidyoho sweswo hi ku famba ka nkarhi. Ematshan’weni ya sweswo, u lahla swidyoho swa lava hundzukaka enhlaneni wakwe. (Esaya 38:17) Swi fana niloko a sula swidyoho sweswo hilaha ku heleleke.—Mintirho 3:19.

Tanihi vanhu lava nga hetisekangiki, hi lava tintswalo ta Xikwembu. Phela, minkarhi yo tala ha dyoha. (Varhoma 3:23) Kambe Yehovha u lava leswaku hi swi tiva leswaku loko hi hundzuka hi mbilu hinkwayo, u lunghekele ku hi rivalela. Kutani loko a rivalela, wa rivala—hi leswaku a nge he tlheli a pfuxa swidyoho kumbe ku hi xupula enkarhini lowu taka hikwalaho ka swidyoho leswi a hi rivaleleke swona. Hakunene leyi i mhaka leyi chavelelaka! Xana tintswalo ta Xikwembu ti ku susumetela ku lava ku tshinela ekusuhi na xona?

Tindzimana ta Bibele leti u nga ti hlayaka hi July:

▪ Ezekiyele 6–20

[Nhlamuselo ya le hansi]