BIBELE yi ri: “A ku na munhu la tshameke a vona Xikwembu.” (Yohane 1:18) Xivumbeko xa Xikwembu xa vangama lerova a ku na xivumbiwa ni xin’we xa nyama ni ngati lexi nga xi vonaka ivi xi hanya. (Eksoda 33:20) Hambiswiritano, minkarhi yin’wana ku vikiwe leswaku Yehovha u kombe vavanuna lava hlawuriweke xivono xa le tilweni. Un’wana wa vavanuna volavo i muprofeta Daniyele. A swi kanakanisi leswaku leswi a swi voneke swi n’wi endle a xi xixima—naswona swi fanele swi endla leswaku na hina hi xi xixima. Xiya ndlela leyi Daniyele a swi hlamuseleke ha yona leswi a nyikiweke lunghelo ro va a swi vona exivonweni. *—Hlaya Daniyele 7:9, 10.

“Nkulukumba wa Masiku.” Xithopo lexi nge “Nkulukumba wa Masiku,” lexi tirhisiwaka hi Daniyele ntsena, xi kombisa “munhu la kuleke hi malembe.” (Daniyele 7:9, 13, 22) Yehovha u kule ku fika kwihi hi malembe? Tanihi leswi a nga “Hosi leyi nga riki na makumu” ku va kona ka yena ku suka enkarhini wa khale swinene—ku tlhela ku fika enkarhini lowu taka hilaha ku nga heriki. (1 Timotiya 1:17; Yudha 25) Ku va kona ka Xikwembu hilaha ku nga riki na makumu swi hi tiyisekisa leswaku vutlhari bya xona a byi pimiwanga, hikuva Bibele yi hlanganisa ku kula ni vutlhari. (Yobo 12:12) I ntiyiso leswaku swa tika leswaku mianakanyo ya hina leyi komeke yi twisisa mhaka ya ku va kona hilaha ku nga riki ni makumu. Kambe xana hi nga langutela leswaku hi xi twisisa hi ku helela Xikwembu lexi nga ni vutlhari lebyi nga pimanisiwiki na nchumu?—Varhoma 11:33, 34.

Xiya leswaku Nkulukumba wa Masiku u “tshama ehansi.” Hi xikongomelo xihi? Tindzimana leti nga ekusuhi ti hi pfuna ku kuma nhlamulo, ti tirhisa marito yo tanihi “Huvo” ni “vuavanyisi.” (Daniyele 7:10, 22, 26) Xisweswo, eka xivono lexi, Yehovha a a tshame ehansi tanihi Muavanyisi. Xana a a ta avanyisa vamani? Matiko ya misava lawa ma hlamuseriweke tanihi swivandzana eku sunguleni ka xivono xa Daniyele. * (Daniyele 7:1-8) Xana Yehovha i Muavanyisi wa njhani?

“Swiambalo swakwe a swi base ku fana ni gamboko, misisi ya nhloko yakwe a yi fana ni voya lebyi baseke.” Muhlovo wo basa wu yimela vululami ni vutengi. Loko voya byi nga si endliwa nchumu, byi va byi ri byo basa. Xisweswo, misisi leyi fanaka ni voya yi va yi ri yo basa. Xana wa swi vona hi mahlo ya mianakanyo leswi Daniyele a swi voneke? Xana wa n’wi vona hi mahlo ya mianakanyo Muavanyisi loyi a nga ni misisi yo basa loyi kumbexana a ambaleke nguvu yo leha yo basa bya gamboko? Tinhlamuselo to tano ta swiendlakalo leswi voniwaka hi mahlo ya mianakanyo ti hi tiyisekisa leswaku vuavanyisi bya Yehovha byi lulamile naswona byi endliwa hi vutlhari. I Muavanyisi loyi a nga ni musa loyi a tsakaka loko hi n’wi tshemba hilaha ku heleleke ni ku n’wi xixima.

“A ku ri ni magidi-gidi lawa a ma hambeta ma n’wi tirhela, ni va 10000 va andzisiwe ka 10000 lava a va tshama va yime emahlweni ka yena.” I vamani vatirheli lava va le tilweni? Bibele yi kombetela eka tintsumi tanihi ‘vatirheli va Xikwembu.’ (Pisalema 104:4) Leswi kumbexana ti fikaka eka magidi ya timiliyoni, tintsumi ta Xikwembu ti khomekile hi ku ‘hetisisa rito ra xona’ ni ku ‘endla ku rhandza ka xona.’ (Pisalema 103:20, 21) Xana sweswo a hi vumbhoni lebyi engetelekeke bya leswaku Xikwembu xi ni vutlhari lebyi nga pimiwangiki? I mani loko ku nga ri Yehovha loyi a nga kotaka ku va ni vuthu ra le tilweni lerikulu leri hlelekeke ni ku va leri tshamaka ri khomekile ku ringana nkarhi lowu nga pimekiki?

Xivono xa Daniyele xi hi susumetela ku tshemba Yehovha, Nkulukumba wa Masiku. Vuavanyisi byakwe byi lulamile naswona vutlhari byakwe bya tshembeka. Ha yini u nga dyondzi swo tala hi ndlela leyi u nga tshinelaka ha yona ekusuhi ni Xikwembu lexi nga ni vutlhari lebyikulu?