A NDZI nge pfuki ndzi rivale nkarhi lowu a ndzi hlengeletane ni ndyangu wa mina eka swakudya swo fihlula hi Musumbhunuku nimixo, hi August 22, 2005. Vutomi bya mina a byi ri ekhombyeni lerikulu, tanihi leswi a ndzi ri ni tshumba lerikulu ebyongweni. Nuna wa mina Krishna u khongerile kutani ndzi vulavula ni ndyangu.

Ndzi te: “Ndzi ya exibedlhele leswaku ndzi ya endla vuhandzuri lebyi nga ha vekaka vutomi bya mina ekhombyeni lerikulu, kutani hinkwenu ka n’wina mi fanele mi langutela xin’wana ni xin’wana lexi nga humelelaka. Ndzi endle malunghiselelo ya nkosi wa mina leswaku mi nga karhateki. N’wina lava gandzelaka Yehovha, ndzi kombela leswaku mi nga tshiki ku n’wi gandzela. Kasi n’wina van’wana hinkwenu, ndzi kombela leswaku mi amukela dyondzo ya Bibele nileswaku mi ya eminhlanganweni ya hina ya Vukreste. Hi ndlela yoleyo mi nga kota ku va ni ntshembo lowu ndzi nga na wona wa misava leyintshwa leyi taka leyi eka yona vagandzeri va ntiyiso va Xikwembu va nga ta hanya hilaha ku nga heriki va ri ni rihanyo leri hetisekeke emisaveni leyi nga paradeyisi.”

Emahlweni ko va ndzi mi chumbutela vuyelo bya vuhandzuri bya mina, ndzi pfumeleleni ndzi mi byela ndlela leyi ndzi kurisiweke ha yona ni leswaku swi te njhani ndzi tiva Xikwembu xa ntiyiso.

Ndyangu wa ka hina a wu tshama endlwini leyikulu leyi akiweke hi mapulanga ni mazenge leyi nga ehenhla ka ntshava edorobeni leri nga eribuweni ra Durban, eAfrika Dzonga. Leswaku hi fika egedeni ya yindlu ya ka hina, a hi fanele hi rhanga hi ku khandziya switepisi swa 125 ku suka egondzweni lerikulu. Switepisi swoleswo a swi kongoma eka ndlela yo koma leyi nga ni nhova yi tlhela yi lala leyi a yi hi yisa egedeni ya nsimbi. Etlhelo ka gede a ku ri ni tempele ya kokwa wa mina wa xisati, leyi a yi ri ni swifaniso swa swikwembu swa Mahindu. Kokwana u ndzi byele leswaku a ndzi ri “n’wana wa tempele” (leswi hi Xihindu swi vulaka mandir kī baccā) ni leswaku swikwembu leswi a hi swi gandzela hi swona leswi endleke leswaku ndzi velekiwa. Emahlweni ka tempele leyi a ku ri ni switepisi swo tshwuka leswi pholichiweke leswi yaka eka rivanti ra le mahlweni. A ku ri ni yindlu leyikulu, leyi a yi ri ni phacisi yo leha, khixi lerikulu leri nga ni xitofu xa malahla, tikamara ta nkombo to etlela eka tona ni kamara rin’we leri nga eka muako wa le handle. Endlwini yoleyo a hi tshama hi ri 27, laha a ku ri vakokwa wa mina, tata wa mina ni tindzisana takwe tinharhu ta majaha, rikotse ra ka vona ra xisati ni mindyangu ya vona.

A swi nga olovi ku khathalela swilaveko swa ndyangu wo tano lowukulu. Kambe mhaka ya leswaku swirho hinkwaswo swa ndyangu swi tshama swin’we endlwini yin’we leyikulu swi endle leswaku hi va ni vun’we ni ku hi endla hi va ni swilo swo tala swo tsakisa leswi hi swi tsundzukaka. Vingi va mune, ku katsa ni mana wa mina, Gargee Devi, a va avelana mintirho ya le kaya. A va cincana ku sweka ni ku basisa. Kokwa wa mina wa xinuna a a ri nhloko ya ndyangu naswona a a xava swakudya swa ndyangu hinkwawo. Hi Ravunharhu wun’wana ni wun’wana vakokwa wa mina a va ya emakete va ya xava nyama, mihandzu ni matsavu ya ku ringana vhiki. A hi tala ku tshama ehansi ka ndzhuti wa murhi wa muphayini laha a hi kota ku vona epatwini leswaku hi va rindza loko va vuya emakete. Hi ku hatlisa loko hi va vona va chika ebazini va ri ni tibasikiti ta vona letikulu, a hi chika eswitepisini swa 125 hi ya va pfuna ku rhwala leswi va swi xaveke hi swi yisa ekaya.

Exirhapeni xa hina, a hi ri ni murhi wo leha wa ncindzu lowu swinyenyana leswi vitaniwaka ti-mynahs a swi ake xisaka xa swona eka wona. A hi swi vona loko swi haha swi ya eka xona ni loko swi famba naswona a hi swi twa loko swi yimbelela. Kokwa wa mina wa xisati a a tshama eswitepisini emahlweni  ka yindlu kutani a hi byela switori, onge hiloko a hlamusela mimpfumawulo leyi endliwaka hi ti-mynahs. Ndzi ni swilo swo tala swo tsakisa leswi ndzi swi tsundzukaka leswi hi avelaneke swona ekaya rolero! A hi hleka, hi rila, hi tlanga, hi n’wayitela, hi avelana—hi tiphine hi ku tshama swin’we tanihi ndyangu wun’we lowukulu. Xa nkoka swinene, laha hi kona laha hi sunguleke ku dyondza hi Muvumbi wa hina, ku nga Yehovha, ni N’wana wakwe, ku nga Yesu Kreste.

Emahlweni ko va hi dyondza hi Yehovha, vugandzeri bya hina bya Mahindu a byi katsa mihivahivana yo tala ya siku ni siku. Nakambe minkarhi yin’wana a hi va ni minkhuvo leyikulu, leyi eka yona a hi rhamba vaendzi leswaku va ta xixima swikwembu swo hambana-hambana ni swikwembu-kati. Eka yin’wana ya minkhuvo yoleyo, kokwa wa mina wa xisati a a biwa hi riphume kutani a vulavula ni mimoya naswona exikarhi ka vusiku a ku endliwa switlhavelo swa swiharhi leswaku a tsakisa mimoya yoleyo. Nakambe kokwa wa mina wa xinuna a dumile laha a hi tshama kona hikwalaho ka minyikelo yakwe leyi a yi pfuneta eku akiweni ni le ku fambisiweni ka swikolo ni titempele ta Mahindu.

Hi 1972, kokwa wa mina wa xinuna u sungule ku vabya kutani a fa. Endzhakunyana ka tin’hweti ti nga ri tingani, un’wana wa vamhani-ntsongo va mina loyi a vuriwaka Indervathey, loyi nakambe a a tiviwa tanihi Jane, u amukele timagazini ta Xihondzo xo Rindza ni Xalamuka! eka Timbhoni ta Yehovha timbirhi. U tivone nandzu leswi a nga ti rhambangiki ekaya ka hina leswaku ti ta bula na yena. Minkarhi hinkwayo a hi ti hlongola Timbhoni. Kambe loko ti tlhela ti vuya, mhani-ntsongo u ti rhambile leswaku ti nghena kutani a vulavula na tona hi swiphiqo swa vukati leswi a swi katsa ku va papa-ntsongo a nwa byala ku tlula mpimo. Vaakelani ni maxaka a va khutaze mhani-ntsongo leswaku a dlaya vukati. Timbhoni ti hlamusele langutelo ra Xikwembu hi vukati. (Matewu 19:6) Mhani-ntsongo u tsakisiwe hi ndzayo ya Bibele ni xitshembiso xa yona xa vutomi byo antswa lebyi nga ta va kona laha misaveni. * U endle xiboho xo va a nga n’wi tshiki papa-ntsongo kutani a sungula ku va ni dyondzo ya Bibele ya nkarhi na nkarhi ni Timbhoni. Loko a ri karhi a dyondza ekamareni ro dzumba eka rona ekaya ka hina, vingi lavan’wana a va yingisela bulo va ri emakamareni ya vona.

Eku heteleleni, vingi hinkwavo va hlanganyele eka dyondzo ya Bibele. Mhani-ntsongo Jane u byele van’wana leswi a a swi dyondza naswona a a tala ku hi hlayela ni ku hi hlamusela timhaka leti a a ti hlaya ebukwini leyi nge Listening to the Great Teacher. * Loko vapapa-ntsongo va mina va kume leswaku vamhani-ntsongo va mina a va dyondza Bibele, va sungule ku hi kaneta. Un’wana wa vapapa-ntsongo va mina u teke tibuku ta hina hinkwato, ku katsa ni Bibele, a ti hisa. A va hi rhuketela va tlhela va hi ba loko hi ya eminhlanganweni. Tata wa mina hi yena ntsena loyi a nga swi endli sweswo; a a nga si tshama a hi arisa ku dyondza hi Yehovha. Vingi volavo hinkwavo va mune va hambete va ya eminhlanganweni ni ku kurisa rirhandzu ra vona hi Yehovha Xikwembu.

Hi 1974 mhani-ntsongo wa mina Jane u khuvuriwile a va Mbhoni ya Yehovha, ivi endzhakunyana ka sweswo ku landzela mana wa mina ni vamhani-ntsongo lavan’wana. Hi ku famba ka nkarhi, kokwa wa mina u tshike swiendlo swakwe swa vukhongeri bya Xihindu. Se a ku hundze malembe yo tala ndzi ri karhi ndzi famba na vona, ndzi va kona eka minhlangano hinkwayo ya Vukreste. Kutani eka ntsombano lowukulu wa Timbhoni ta Yehovha, Mbhoni leyi vuriwaka Shameela Rampersad yi ndzi vutise yi ku,  “Xana u ta khuvuriwa rini?” Ndzi yi hlamule ndzi ku, “A ndzi nge khuvuriwi hikuva ku hava munhu loyi a tshameke a ndzi dyondzela Bibele.” Yi kombele ku dyondza na mina. Eka ntsombano lowu landzeleke hi December 16, 1977 ndzi khuvuriwile. Eku heteleleni, eka swirho swa 27 swa ndyangu wa ka hina leswi a hi tshama na swona, 18 wa swona swi khuvuriwile. Kambe hi nkarhi lowu ndzi endliweke vuhandzuri ha wona, tata wa mina Sonny Deva a ha ri Muhindu.

Marito lama tsariweke eka Vafilipiya 4:6, 7 ma ndzi pfune swinene, ngopfu-ngopfu endzhaku ka loko ndzi ri ni tshumba lerikulu ebyongweni. Tindzimana teto ti ri: “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.” Swa tika ku ka u nga “vileli ha nchumu,” ngopfu-ngopfu loko u byeriwe leswaku u nga ha fa nkarhi wun’wana ni wun’wana. Eku sunguleni a ndzi rila kutani ndzi khongela eka Yehovha. Ku sukela hi nkarhi wolowo, ndzi ve ni “ku rhula ka Xikwembu loku tlulaka miehleketo hinkwayo.”

Yehovha Xikwembu u ndzi khome hi voko ra yena ra xinene, hi ndlela yo fanekisela naswona entiyisweni a ndzi twa onge u ndzi kongomise ku ya fika emakumu. (Esaya 41:13) U ndzi pfune leswaku ndzi va ni xivindzi xo hlamusela madokodela lama a ma ta ndzi tshungula ku tiyimisela ka mina ku yingisa nawu wa Bibele wo papalata ngati. (Mintirho 15:28, 29) Hikwalaho ka sweswo, dokodela loyi a a ta ndzi handzula ni dokodela la titivataka va pfumerile ku ndzi endla vuhandzuri handle ko ndzi pompela ngati. Endzhaku ka sweswo, dokodela loyi a ndzi handzuleke u vule leswaku vuhandzuri byi fambe kahle naswona tshumba hinkwaro ri susiwile. U tlhele a vula leswaku a a nga si tshama a vona muvabyi a hola hi ku hatlisa endzhaku ka vuhandzuri lebyikulu bya byongo.

Endzhaku ka mavhiki manharhu ndzi fambise dyondzo ya Bibele ndzi ri emubedweni. Loko mavhiki ya nkombo ma hela, ndzi sungule ku tlhela ndzi chayela, ndzi ya entirhweni wo chumayela ni ku tlhela ndzi ya eminhlanganweni ya Timbhoni ta Yehovha. Ndza wu tlangela mpfuno wa vamakwerhu va mina lava nga Vakreste lava tirheke na mina entirhweni wo chumayela. A va tiyiseka leswaku a ndzi ndzexe naswona ndzi fika ekaya ndzi hlayisekile. Ndzi tshemba leswaku ku yingisa tikhasete leti rhekhodiweke ta Bibele ni ku dzika eka swilo swa moya swi ndzi pfune leswaku ndzi hlakarhela hi ku hatlisa.

Ndzi tlhele ndzi va ni ntsako loko ndzi twa leswaku endzhaku ka vuhandzuri bya mina, tata wa mina u pfumele ku dyondza Bibele ni Timbhoni. U khuvuriwe a ri ni malembe ya 73 naswona sweswi u tirhela Yehovha hi ku hiseka. Swirho swo tlula 40 swa ndyangu wa ka hina sweswi swi hlangana na hina evugandzerini bya Yehovha. Hambileswi ndzi nga ha swi kotiki ku jikisa mahlo ya mina ma languta eximatsini hikwalaho ka leswi xipalapala xa mina xi hlanganisiweke hi nsimbi, ndzi wu langutele hi mahlo-ngati nkarhi lowu Yehovha a nga ta endla “swilo hinkwaswo swi va leswintshwa” eParadeyisini leyi taka ya laha misaveni.—Nhlavutelo 21:3-5.

Ndzi katekisiwe hi nuna la nga ni rirhandzu, tlhelo nkulu loyi a nga Mukreste ni n’wana wa hina wa nhwanyana wo saseka Clerista loyi a ndzi seketelaka loko ndzi ri karhi ndzi hambeta ndzi tirha tanihi muchumayeri wa nkarhi hinkwawo. Yehovha Xikwembu u byi katekise swinene vutirheli bya mina. Ku fikela sweswi, ndzi kote ku pfuna swo tala swa swichudeni swa mina swa Bibele ku vona matimba ya Rito ra Xikwembu evuton’wini bya swona. Swo tlula 30 eka swona sweswi swi tinyiketele eka Xikwembu ni ku khuvuriwa.

Hi mbilu leyi taleke hi ntshembo, ndzi wu langutele hi mahlo-ngati nkarhi lowu Yehovha Xikwembu a nga ta hi ntshunxa eka fambiselo leri, leri vavaka ra swilo kutani a hi yisa emisaveni leyi nga paradeyisi.