Leswi Yesu a pfuneke swisiwana, lava vabyaka ni lava xanisekaka, van’wana va lava ku landzela xikombiso xakwe. Va anakanya leswaku nkarhi wa kahle wo va va endla sweswo i nkarhi wa Khisimusi, lowu minhlangano leyi hlengeletaka mali yo pfuna vanhu lava pfumalaka yi tikarhatelaka ku hlengeleta minhlengo.

Hi nkarhi wa Khisimusi, vanhu vo tala va va va khomekile hi ku xava, ku tihungasa ni ku endzela maxaka ni vanghana. Swilo sweswo hinkwaswo swi va endla va nga ha vi na wona nkarhi, matimba kumbe mali yo pfuna swisiwana, handle ka loko va nyikela mali eka minhlangano leyi hlengeletaka mali yo pfuna lava pfumalaka.

“U nga tshuki u ala ku va endlela leswinene lava swi va lulameleke, loko swi ri ematimbeni ya voko ra wena ku swi endla.” (Swivuriso 3:27) Swisiwana, lava nga ni ndlala ni lava xanisekaka a va xaniseki ntsena hi Khisimusi. Loko u vona leswaku munhu wo karhi u lava mpfuno naswona “swi ri ematimbeni ya voko ra wena” ku n’wi pfuna, ha yini u yimela ku n’wi pfuna hi Khisimusi? Musa ni swiendlo swa wena swi ta katekisiwa.

“Siku rin’wana ni rin’wana ro sungula evhikini, un’wana ni un’wana wa n’wina a a veke swo karhi etlhelo endlwini ya yena a swi hlayisa, hi ku ya hilaha a fuweke hakona.” (1 Vakorinto 16:2) Muapostola Pawulo u nyike Vakreste vo sungula lava a va lava ku pfuna swisiwana ndzayo yoleyo. Xana u nga vekela etlhelo mali kumbe u hlela mali leyi u nga yi nyikaka vanhu kumbe nhlangano lowu tirhisaka mali ya wona hi ndlela leyinene? Hi ndlela yoleyo, u ta tiyiseka leswaku u khathalela lava pfumalaka loko hi hala tlhelo u ri karhi u nyikela leswi u nga swi kotaka.

“Mi nga rivali ku endla leswinene ni ku avelana swilo ni van’wana, hikuva Xikwembu xi tsakisiwa swinene hi switlhavelo swo tano.” (Vaheveru 13:16) Xiya leswaku handle ko “avelana swilo ni van’wana,” hi fanele hi tsundzuka “ku endla leswinene” kumbe ku pfuna van’wana. Hi xikombiso, vatswari lava tlhariheke va dyondzisa vana va vona leswaku va pfuna vanhu lava kuleke hi mintirho ya siku ni siku; va khutaza lava vabyaka hi ku va rhumela khadi, ku va endzela, kumbe ku va bela riqingho; ni ku khathala hi vana van’wana lava nga swisiwana kumbe lava lamaleke. Hikwalaho ka sweswo, vana va dyondza ku va lava hananaka nkarhi hinkwawo.