A RI xe kahle eAfrika Vupela-dyambu. Emoyeni a ku nun’hwela murhu lowu virisiwaka ni rhayisi. Vavasati a va ri karhi va hundza va dzenengele mindzhwalo leyikulu etinhlokweni ta vona. A ku ri ni pongo ra vanhu lava hlekaka swi huma embilwini ri pfangane ni ra vanhu lava holovaka. Hambileswi a ka ha ri mixo, dyambu a ri hisa lerova vusokoti a byi famba byi tlakuse ni makhwiri.

Loko wu vona Yovo kumbe mulungu, ntlawa wa vana wu sungule ku yimbelela ni ku cina hi ndlela ya leswaku murhumiwa a wu languta, wu ri ni ntshembo wa leswaku u ta wu nyika nyiko. Risimu ra kona ri sungule hi marito lama nge “Yovo, Yovo, bon soir” kutani ri hetelela hi lama nge “Xana u nga hi nyika nyiko yo nkhensa leswi hi ku endleleke swona?” Mufana un’wana a nga ri eku yimbeleleni. Loko ndzi ri karhi ndzi famba, u ndzi landzelerile kutani a sungula ku kombetela hi mavoko. A swi vonaka a tirhisa ririmi ra mavoko. EUnited States, ndzi dyondze Ririmi ra Mavoko ra le Amerika kambe eBenin ku vulavuriwa Xifurwa.

Ndzi ringete ku kombetela maletere ya nhungu ya vito ra mina. Mufana yoloye u n’wayitele hi ntsako. U ndzi khome hi voko hi famba eka switarata swo lala hi ya ekaya ka vona laha ku nga ni yindlu ya makamara mambirhi leyi akiweke hi switina. Swirho swa ndyangu wa ka vona swi tile swi ta ndzi rhendzela. Hinkwavo ka vona a va tirhisa ririmi ra mavoko. Xana a ndzi fanele ndzi endla yini? Ndzi kombetele vito ra mina hi mavoko kutani ndzi tsala ehansi ndzi va byela leswaku ndzi murhumiwa loyi a dyondzisaka Bibele naswona a ndzi ta tlhela ndzi vuya. Vaakelani van’wana lava kotaka ku vulavula na vona va tile, hinkwavo ka vona a va pfumela hi nhloko. Ndzi tibyele leswi, ‘I yini leswi ndzi tipeteke eka swona?’

Loko ndzi ri ekaya, ndzi tibyele ndzi ku: ‘Ku fanele ku ri na munhu loyi a nga pfunaka vanhu lava leswaku va dyondza hi xitshembiso xa Xikwembu, lexi nge: “Tindleve ta lava nga twiki ti ta pfuriwa.”’ (Esaya 35:5) Ndzi endle ndzavisiso wo karhi. Ndzavisiso lowu a wa ha ku endliwa wu kombise leswaku ku ni vanhu va 12 000 lava nga twiki ni lava nga twiki kahle eBenin. Ndzi tsake ni swikunwana loko ndzi tshubula leswaku eswikolweni swa vanhu lava nga twiki a ku tirhisiwa Ririmi ra Mavoko ra le Amerika ku nga ri Ririmi ra Mavoko ra le Furwa. Kambe ndzi ve ni gome loko ndzi kuma leswaku ku hava Mbhoni ya Yehovha ni yin’we laha leyi a yi tiva Ririmi ra Mavoko ra le Amerika. Ndzi phofulele Mbhoni ya kwalaho ndzi ku, “Ndzi navela onge ku nga ta munhu loyi a tivaka Ririmi ra Mavoko ra le Amerika a ta pfuna.” U hlamule a ku: “U kona wena, a hi swona ke?” A a tiyisile! Ndzi ode buku leyi a yi ta ndzi pfuna ni ti-DVD ta Ririmi ra Mavoko ra le Amerika  leti kandziyisiweke hi Timbhoni ta Yehovha. Swikhongelo swa mina swo lava mpfuno swi hlamuriwile loko Mbhoni leyi ri tivaka kahle Ririmi ra Mavoko ra le Amerika yi rhurha eCameroon yi ta eBenin.

Vanhu vo tala va twe leswaku a ndzi dyondza ririmi ra mavoko. Ndzi byeriwe leswaku ndzi fanele ndzi endzela Brice loyi a nga mupendi wa mimfungho. Ndhawu yakwe yo tirhela eka yona leyi a yi endliwe hi marhavi ya mirhi ya ncindzu lama rhungiweke swin’we a yi phyuphyisa eka maxelo lama hisaka. Ekhumbini ra yena a ku ri ni mihlovo yo hambana-hambana ya tipende leyi vangiweke hileswi a chukucha tiburachi takwe. U phumunhe ritshuri eka switulu swo hlayanyana kutani a ndzi honolela a yimela leswaku ndzi sungula. Ndzi hoxe DVD eka muchini wa mina wo tlanga ha wona lowu khomekaka hi voko. U koke xitulu xakwe a tshinela eka xikirini lexitsongo. U kombetele a ku: “Ndza swi twisisa! Ndza swi twisisa!” Vana va vaakelani va hlengeletanile kutani va tlakusa tinhamu leswaku va ta vona. Un’wana u huwelerile a ku, “Ha yini va hlalela filimi ku nga ri na mpfumawulo?”

Minkarhi hinkwayo loko ndzi endzela Brice, vanhu lava a va ta va ta vona DVD a va ya va engeteleka. Hi ku hatlisa Brice ni van’wana va sungule ku ta eminhlanganweni ya hina ya Vukreste. Ku va ndzi ringeta ku va tolokela swi ndzi pfune ku dyondza ririmi ra mavoko hi ku hatlisa. Loko ntlawa wu ri karhi wu kula, vanhu van’wana va tile va ta ndzi lava. Hi xikombiso, siku rin’wana movha wa mina wa khale wu sungule ku rhasa loko ndzi ba magoji hileswi a ndzi ringeta ku papalata timbuti ni tinguluve. Kutani hi xitshuketa ku twale mpfumawulo endzhaku. Ndzi tibyele leswi, ‘Kumbexana movha wu tlhele wu onhaka!’ Ndzi kume leswaku movha a wu nga onhakanga, kambe a ku ri wanuna loyi a nga twiki loyi a tsutsuma endzhaku ka movha wa mina a ringeta ku endla leswaku ndzi n’wi twa hilaha a nga kotaka hakona—hi ku va a wu ba!

Ku sungule ku va ni mintlawa ya Ririmi ra Mavoko ra le Amerika emadorobeni man’wana. Loko ku hleriwe minongonoko ya ririmi ra mavoko eka ntsombano wa hina wa lembe ni lembe, ndzi ve un’wana wa lava komberiweke ku toloka. Loko ndzi ri karhi ndzi ya eplatifomo kutani ndzi yimela xivulavuri leswaku xi sungula, ndzi anakanye loko ndzi sungula eka xiavelo xa mina. A ndzi tibyela leswi, ‘I yini leswi engetelekeke leswi ndzi nga swi endlaka tanihi murhumiwa eAfrika?’ Loko ndzi languta vayingiseri, ndzi swi tivile leswaku ndzi kume nhlamulo—ku va murhumiwa loyi a pfunaka vanhu lava nga twiki. A ndza ha tibyeli ndzi ku, ‘I yini leswi ndzi tipeteke eka swona?’