VAKRESTE va timiliyoni va hlawula ku ka va nga tlangeli Khisimusi. Xana va titwa njhani hi xiboho xa vona? Xana va vona onge va kayela swin’wana? Xana vana va vona va titwa onge va kayela swin’wana? Xiya leswi Timbhoni ta Yehovha emisaveni hinkwayo ti swi vulaka hi mhaka leyi.

Ku tsundzuka Yesu Kreste: “Emahlweni ko va ndzi va Mbhoni ya Yehovha, a ndzi nga tali ku ya ekerekeni. A ndzi ya ntsena hi Khisimusi kumbe hi Paseka. Hambiswiritano, a ndzi nga ehleketi hi Yesu Kreste. A ndza ha tlangeli Khisimusi, kambe ndzi ya eminhlanganweni ya Vukreste kambirhi hi vhiki naswona ndzi dyondzisa van’wana leswi Bibele yi swi vulaka hi Yesu!”—EVE, AUSTRALIA.

Ntsako lowu tisiwaka hi ku nyika: “Ndza tsaka loko vanhu va ndzi nyika nyiko ndzi nga yi langutelanga. Ndza swi rhandza ku endleriwa swilo ndzi nga swi langutelanga! Nakambe ndzi rhandza ku endlela van’wana makhadi ni swifaniso hikuva swi va endla va va ni ntsako naswona swi endla leswaku na mina ndzi va ni ntsako.”—REUBEN, NORTHERN IRELAND.

Ku pfuna vanhu lava pfumalaka: “Hi rhandza ku nyika vanhu lava vabyaka swakudya. Minkarhi yin’wana hi va yisela swiluva, khekhe kumbe nyiko leyitsongo leswaku hi va tsakisa. Leswi ha swi tsakela hikuva vanhu lava, hi nga va endzela nkarhi wihi na wihi wa lembe.”—EMILY, AUSTRALIA.

Ku hlangana swin’we tanihi ndyangu: “Loko mindyangu ya hina yi hlangana, vana va hina va kota ku tiva vamalume va vona, vahahani, vakokwana ni vamuzala va nga kavanyetiwi hi nchumu. Tanihi leswi hi nga bohekiki ku endla leswi hi masiku yo karhi ntsena elembeni, a hi titwi hi tshikilelekile naswona ndyangu wa hina wa swi tiva leswaku hi wu endzela hileswi hi wu rhandzaka.”—WENDY, CAYMAN ISLANDS.

Ku rhula: “Hi nkarhi wa Khisimusi, swi vonaka ku ri ni swo tala swo swi endla lerova a va talanga vanhu lava ehleketaka hi ku rhula. Leswi sweswi ndzi dyondzeke leswi Bibele yi swi tshembisaka vanhu, ndzi titwa ndzi ntshunxekile. Sweswi ndza swi twisisa leswaku vana va mina va ta tiphina hi vumundzuku lebyi tsakisaka.”—SANDRA, SPAIN.