EDyondzweni yakwe ya le Ntshaveni, Yesu u byele valandzeri vakwe a ku: “N’wina mi munyu wa misava; kambe loko munyu wu heleriwa hi ntamu wa wona, ku dzunga ka wona ku nga pfuxetisiwa ku yini? A wu nge he tirhi nchumu kambe wu ta cukumetiwa ehandle wu kandziyeriwa hi vanhu.” (Matewu 5:13) Munyu wu sivela ku bola. Hikwalaho, swi nga ha endleka xikombiso xa Yesu a xi vula leswaku vadyondzisiwa vakwe va nga swi kota naswona va fanele va sirhelela van’wana eka ku bola emoyeni ni le mahanyelweni.

Loko yi vulavula hileswi Yesu a swi vuleke malunghana ni munyu lowu heleriwaka hi ntamu wa wona, The International Standard Bible Encyclopedia yi ri: “Munyu lowu humaka eLwandle Leri Feke a wu katsane ni timinerali tin’wana; kutani loko munyu wu tsakama, a wu n’oka ivi ku sala timinerali leti nga riki ni nantswo.” Kutani swa twisiseka leswi Yesu a vuleke leswaku leswi saleke ‘a swi nge he tirhi nchumu kambe swi ta cukumetiwa ehandle swi kandziyeriwa hi vanhu.’ Buku leyi yi ya emahlweni yi ku: “Hambileswi munyu lowu humaka eLwandle Leri Feke a wu ri wa xiyimo xa le hansi loko wu ringanisiwa ni munyu lowu humaka emalwandle man’wana hileswi a wu nga basanga, a wu kumeka hi ku olova hikuva munhu a a ta kota ku wu rhwalela eribuweni kutani sweswo swi endle leswaku lwandle leri ri va rona ntsena leri vanhu va le Palestina va kumaka munyu eka rona.”

Yesu u vulavule hi xifaniso xa wansati un’wana loyi a lahlekeriweke hi yin’wana ya tidrakma ta khume leti a a ri na tona kutani a teka rivoni a kukula yindlu yakwe hi vukheta kukondza a yi kuma. (Luka 15:8-10) Enkarhini wa Yesu, drakma a yi ringana ni muholo wa kwalomu ka siku rin’we kutani ku lahlekeriwa hi yona a ku ri ku lahlekeriwa lokukulu. Kambe xiendlakalo lexi a xi hlamuseleke a xi twisiseka eka vanhu van’wana.

Tibuku tin’wana ti komba leswaku minkarhi yin’wana vavasati a va tirhisa timali ta nsimbi leswaku va khavisa hi tona. Swi nga ha endleka Yesu a a vulavula hi mali ya nsimbi leyi a yi ri nchumu wa risima wo khavisa ha wona endyangwini wa wansati ku ringana nkarhi wo leha kumbe xiphemu xa tinyiko leti a ti humesiwa loko a tekiwa. Hambiloko a swi ri hi ndlela leyi kumbe swi nga ri ha yona, ku lahlekeriwa hi yin’wana ya timali ta khume ta nsimbi a swi ta endla leswaku wansati yoloye a karhateka swinene ku yi kuma.

Ku tlula kwalaho, ndlela leyi tindlu to tala ta le nkarhini wa Yesu a ti akiwe ha yona a yi endla leswaku ku vonakala ni ku hisa ku nga ngheni ngopfu. Loko ti ri ni mafasitere, a ma va ma nga talanga ngopfu. Laha hansi a ti vekeriwe byanyi kumbe tinhlanga leti omeke ta swimilana swo hambana-hambana. Loko mali ya nsimbi yo wa, a swi tika ku yi kuma. Muhlamuseri un’wana wa Bibele u ri: “Hikwalaho, loko xilo xitsongo, xo tanihi mali, xi lahleka endhawini yo tano, ku vonakala ka rivoni ni ku kukula yindlu a ku ri swilo leswi tolovelekeke leswi munhu a a ta swi endla leswaku a kota ku xi kuma.”