Xana u lava ku tiva ntiyiso malunghana ni Xikwembu—leswaku i mani, leswi xi swi rhandzaka, leswi xi swi vengaka ni leswi ku rhandza ka xona ku nga swona? ERitweni rakwe, ku nga Bibele, Yehovha Xikwembu u hlavutela ntiyiso hinkwawo malunghana na yena. Kambe a hi un’wana ni un’wana loyi a nga hlayaka Bibele kutani a twisisa ntiyiso wolowo hi ku helela. Ha yini? Hikuva ku twisisa ntiyiso wolowo i lunghelo; a ri kumiwi hi un’wana ni un’wana. A hi kambisiseni leswi Yesu a swi vuleke hi mhaka leyi.—Hlaya Matewu 11:25.

Ndzimana yoleyo yi sungula hi marito lama nge: “Enkarhini wolowo Yesu a angula a ku.” Kutani leswi Yesu a lavaka ku swi vula kumbexana i nhlamulo ya leswi a swa ha ku endleka. A ha ku tshinya vanhu va le mitini yinharhu ya le Galeliya laha a endleke mintirho ya matimba. (Matewu 11:20-24) U nga ha tivutisa, ‘Ha yini un’wana ni un’wana a nga vonaka mintirho ya masingita ya Yesu kambe a nga wu tshembi ntiyiso lowu a wu dyondziseke kutani a n’wi landzela?’ Ku va vanhu va nga anguli a swi fambisana ni langutelo ra vona ra ku oma tinhloko.—Matewu 13:10-15.

Yesu a a swi tiva leswaku ku va hi kota ku twisisa ntiyiso malunghana ni Xikwembu lowu kumekaka eBibeleni, hi lava swilo swimbirhi: Mpfuno wa Xikwembu ni ku va ni timbilu letinene. Yesu u ri: “Tatana, ndza ku dzunisa erivaleni, Hosi ya tilo ni misava, hikuva swilo leswi u swi fihlele lavo tlhariha ni lava nga ni ku twisisa kutani u swi hlavutele swihlangi.” Xana wa swi xiya leswaku ha yini ku twisisa ntiyiso lowu kumekaka eBibeleni swi nga ha tekiwaka tanihi lunghelo? Yehovha u ni mfanelo yo endla xiboho xa leswaku i vamani lava a lavaka ku va hlavutela ntiyiso hikuva i “Hosi ya tilo ni misava.” Un’wana ni un’wana u ni lunghelo ro twisisa ntiyiso; Xikwembu a xi na xihlawuhlawu. Hi le ka swiyimo swihi laha xi hlavutelaka ntiyiso wa Bibele eka van’wana kutani xi fihlela van’wana?

Yehovha u rhandza vanhu lava titsongahataka, ku nga ri lava titlakusaka. (Yakobo 4:6) Yehovha u fihlela “lavo tlhariha ni lava nga ni ku twisisa” ntiyiso—vanhu va misava ni lava dyondzekeke lava tikukumuxaka va vona onge a va wu lavi mpfuno wakwe. (1 Vakorinto 1:19-21) Kambe u hlavutele ntiyiso eka “swihlangi”—lava taka eka yena hi timbilu hinkwato, va kombisa ku titsongahata ku fana ni n’wana. (Matewu 18:1-4; 1 Vakorinto 1:26-28) Yesu, N’wana wa Xikwembu, a a tiva vanhu lava titsongahataka ni lava titlakusaka. Varhangeri vo tala va vukhongeri lava titlakusaka ni lava dyondzekeke a va nga ri twisisi rungula ra Yesu, kambe vaphasi va tinhlampfi lava titsongahataka a va ri twisisa. (Matewu 4:18-22; 23:1-5; Mintirho 4:13) Hilaha ku fanaka, vanhu van’wana lava fuweke ni lava dyondzekeke lava kombiseke ku titsongahata ka xiviri va ve valandzeri va Yesu.—Luka 19:1, 2, 8; Mintirho 22:1-3.

Hi vuyela eka xivutiso lexi vutisiweke eku sunguleni ka xihloko: Xana u lava ku tiva ntiyiso malunghana ni Xikwembu? Loko swi ri tano, u nga kuma nchavelelo hi ku tiva leswaku Xikwembu a xi va rhandzi vanhu lava titekaka va ri tintlhari ta misava. Hi hala tlhelo, xi rhandza vanhu lava tintlhari ta misava ti va langutelaka ebodlheleni. Loko u hlaya Rito ra Xikwembu u ri ni langutelo ra ku titsongahata, u nga ha va exikarhi ka lava Yehovha a va nyikaka nyiko ya risima—ku nga ku twisisa ntiyiso malunghana na yena. Ku twisisa ntiyiso wolowo swi ta endla leswaku vutomi bya wena byi va ni xikongomelo sweswi naswona swi nga ku yisa “evuton’wini bya xiviri”—ku nga vutomi lebyi nga heriki emisaveni leyintshwa leyi Xikwembu xi yi tshembiseke vanhu vo lulama lebyi nga kwala nyongeni. *—1 Timotiya 6:12, 19; 2 Petro 3:13.