Rirhandzu ri vula ku rhandza vanhu hi mbilu hinkwayo. Munhu loyi a nga ni rirhandzu u swi kombisa hi marito ni hi swiendlo swakwe malunghana ni ndlela leyi a titwaka ha yona hi vanhu lava a va rhandzaka, hambiloko ku endla tano swi lava leswaku a titsona swo karhi.

Muxe u kombise leswaku wa xi rhandza Xikwembu. Hi ndlela yihi? Tsundzuka marito lama tsariweke eka 1 Yohane 5:3, leyi nge: “Ku rhandza Xikwembu, hi kona ku hlayisa swileriso swa xona.” Tanihi leswi Muxe a a rhandza Xikwembu, u yingise swileriso swa xona. Eka hinkwaswo leswi Xikwembu xi n’wi kombeleke leswaku a swi endla—ku sukela eka xiavelo xakwe xo tika xo ya eka Faro loyi a a ri ni matimba ku ya eka ntirho lowu a wu tikomba wu olova wa ku tshambuluta nhonga yakwe eka Nambu wo Tshwuka—Muxe u yingisile. Ku nga khathariseki leswaku xileriso xexo a xi olova ku xi endla kumbe a xi tika, Muxe u xi hetisisile. “U endle tano.”—Eksoda 40:16.

Muxe a a rhandza Vaisrayele-kulobye. A va swi xiya leswaku Yehovha a a tirhisa Muxe leswaku a kongomisa vanhu vakwe, kutani va phofulele Muxe swiphiqo swa vona swo hambana-hambana. Ha hlaya: “Vanhu va hambeta va yimile emahlweni ka Muxe ku sukela nimixo ku fikela nimadyambu.” (Eksoda 18:13-16) Ehleketa ndlela leyi Muxe a a karhele ha yona endzhaku ka loko a yingisele Vaisrayele loko va n’wi phofulela swiphiqo swa vona siku hinkwaro! Kambe leswi Muxe a a rhandza vanhu, a a swi tsakela ku va pfuna.

Handle ko va yingisa ntsena, Muxe u tlhele a khongelela vanhu lava a va rhandza. U tlhele a khongelela ni vanhu lava n’wi khomeke hi ndlela yo biha! Hi xikombiso, loko Meriyamu sesi wa Muxe a gungulela Muxe, Yehovha u n’wi be hi nhlokonho. Ematshan’weni yo va Muxe a tsaka hi ku xupuriwa ka Meriyamu, hi ku hatlisa u n’wi khongelerile eka Yehovha a ku: “Oho Xikwembu, ndza ku kombela! N’wi horise, ndza ku kombela!” (Tinhlayo 12:13) Xana i yini xin’wana handle ka rirhandzu lexi a xi ta va xi endle leswaku Muxe a endla xikhongelo xexo lexi pfumalaka vutianakanyi?

Hi nga tekelela Muxe hi ku hlakulela ku va ni rirhandzu leri enteke eka Xikwembu. Rirhandzu ro tano ri ta hi susumetela ku yingisa swileriso swa xona “ku suka embilwini.” (Varhoma 6:17) Loko hi yingisa Yehovha swi suka etimbilwini ta hina, hi endla leswaku a tsaka. (Swivuriso 27:11) Na hina ha vuyeriwa. Phela, loko hi tirhela Xikwembu hikwalaho ka rirhandzu ra xiviri, a hi nge endli leswinene ntsena leswaku hi hetisisa nawu kambe hi ta swi endla hi ku va hi swi tsakela!—Pisalema 100:2.

Ndlela yin’wana leyi hi nga tekelelaka Muxe ha yona i ku hlakulela ku va ni rirhandzu leri nga riki na vutianakanyi eka van’wana. Loko vanghana kumbe maxaka ya hina ma hi phofulela leswi ma karhataka, rirhandzu ri ta hi susumetela ku (1) rhiya ndleve; (2) ku ma twela vusiwana; ni ku (3) endla leswaku ma swi tiva leswaku ha khathala ha wona.

Ku fana na Muxe, hi nga khongelela lava hi va rhandzaka. Loko va hi phofulela swiphiqo swa vona, hi nga karhateka loko ku ri hileswaku a hi nge endli nchumu leswaku hi swi tlhantlha. Hi nga ha vula hi ku, “Ndzi khomeli kambe lexi ndzi nga xi endlaka i ku ku khongelela.” Kambe tsundzuka: “Xikombelo xa munhu la lulameke, loko xi endliwa, xi ni matimba lamakulu.” (Yakobo 5:16) Swikhongelo swa hina entiyisweni swi nga susumetela Yehovha ku endlela munhu nchumu lowu a a nga ta n’wi endlela wona. Ku hava nchumu wo antswa lowu hi nga wu endlelaka vanhu lava hi va rhandzaka ku tlula ku va hi va khongelela. *

Xana a wu pfumeli leswaku hi nga dyondza swo tala eka Muxe? Hambileswi a a ri munhu ku fana na hina, u veke xikombiso lexi hlamarisaka xa ripfumelo, ku titsongahata ni rirhandzu. Loko hi ya hi tekelela xikombiso xakwe, hi ta ya hi vuyeriwa ku katsa ni vanhu van’wana.—Varhoma 15:4.