Ndzi velekiwe eSanto Domingo, le Dominican Republic naswona ndzi rikotse eka vana va mune. Vatswari va mina a va dyondzekile naswona a va lava leswaku hina vana va vona hi kulela endhawini leyi nga ni vanhu lavanene ni lava tshembekeke. Eka malembe ya mune emahlweni ko va ndzi velekiwa, vatswari va mina va hlangane ni varhumiwa va Mamormon. Leswi a va tsakisiwa hi ndlela leyi vantshwa a va base ni ku languteka ha yona, hi ku hatlisa vatswari va mina va endle xiboho xa leswaku ndyangu wa ka hina wu va wun’wana wa mindyangu yo sungula ku va swirho swa Kereke ya Jesus Christ of Latter-day Saints kumbe Kereke ya Mormon.

Loko ndzi ri karhi ndzi kula, ndzi tiphine hi swinkhubyana swa le kerekeni ni ku xixima vutomi bya ndyangu bya Mamormon ni milawu ya mahanyelo. A ndzi tinyungubyisa hi ku va ndzi ri Mumormon naswona ndzi tiendlele pakani yo va murhumiwa.

Loko ndzi va ni malembe ya 18 ndyangu wa ka hina wu rhurhele eUnited States leswaku ndzi ta ya eyunivhesiti leyinene. Endzhakunyana ka lembe, mhani-ntsongo ni nuna wakwe lava a va ri Timbhoni ta Yehovha va hi endzerile eFlorida. Va hi rhambile leswaku hi ya na vona entsombanweni wa Bibele. Ndzi tsakisiwe hileswi un’wana ni un’wana loyi a a ri ekusuhi na mina a ri karhi a languta matsalwa ni ku tsala tinhla. Kutani ndzi kombele xitsalo ni phepha kutani na mina ndzi sungula ku endla hilaha ku fanaka.

Endzhaku ka ntsombano mhani-ntsongo ni nuna wakwe va vule leswaku tanihi leswi a ndzi tsakela ku va murhumiwa, va nga ndzi pfuna leswaku ndzi dyondza swo karhi hi Bibele. A ndzi ehleketa leswaku i vonelo ra kahle hikuva hi nkarhi wolowo a ndzi tiva swo tala swinene hi Buku ya Mormon ku tlula Bibele.

Loko hi ri karhi hi bula hi Bibele eka riqingho, nkarhi hinkwawo mhani-ntsongo ni nuna wakwe a va ndzi khutaza ku ringanisa tidyondzo ta mina ni tidyondzo ta Bibele. A va lava leswaku ndzi tikumela ntiyiso hi ndzexe.

 A ku ri ni swilo swo tala leswi a ndzi swi amukerile swa Mamormon kambe a ndzi nga tiyiseki leswaku swilo sweswo swi fambisana njhani ni Matsalwa. Mhani-ntsongo u ndzi rhumele magazini wa Xalamuka! wa November 8, 1995, lowu kandziyisiweke hi Timbhoni ta Yehovha, lowu a wu katsa swihloko swin’wana leswi vulavulaka hi ripfumelo ra Mamormon. Swi ndzi hlamarisile ku tiva leswaku a ndzi nga ti tivi tidyondzo to tala ta Mamormon. Sweswo swi ndzi susumetele ku lavisisa eka Web site ya Mamormon leswaku ndzi tiyisekisa loko leswi tsariweke eka Xalamuka! ku ri ntiyiso. A ku ri ntiyiso naswona ntiyiso wolowo ndzi wu tiyisekise loko ndzi endzela timuziyamu ta Mamormon eUtah.

Minkarhi hinkwayo a ndzi tshemba leswaku Buku ya Mormon ni Bibele a swi nga kanetani. Kambe loko ndzi sungule ku hlaya Bibele hi vukheta ndzi xiye ku kanetana loku a ku ri kona exikarhi ka tidyondzo ta Mamormon ni leswi tsariweke eBibeleni. Hi xikombiso, Ezekiyele 18:4 yi vula leswaku moya-xiviri wa fa. Hambiswiritano Buku ya Mormon, eka Alma 42:9, yi ri: “Moya a wu fi.”

Ku engetela eka ku nga fambisani ka tidyondzo teto, a ndzi karhatiwa hi moya wa vutiko lowu a wu dyondzisiwa hi Mamormon. Hi xikombiso, Mamormon ma dyondzisiwa leswaku ntanga wa Edeni a wu ri eTikweni ra Jackson, eMissouri, le U.S.A. Nakambe varhangeri va kereke va dyondzisa leswaku “siku rin’wana Xikwembu xi ta fuma misava hinkwayo hi ku tirhisa hulumundhe ya le United States.”

A ndzi tivutisa loko dyondzo ya Mamormon yi ta humelela ematikweni man’wana, yo tanihi le tikweni leri ndzi velekiweke eka rona. Ndzi bule hi mhaka leyi eka madyambu man’wana loko ndzi amukela riqingho leri humaka eka muntshwa loyi a nga Mumormon loyi a ri karhi a leteriwa ku va murhumiwa. Ndzi n’wi vutise loko a ta tiyimisela ku lwa ni Mamormon-kulobye loko tiko ra ka vona ri lwa na vona. Swi ndzi hlamarisile loko a vula leswaku ina! Ndzi ti lavisise hi vuenti tidyondzo leti a ndzi pfumela eka tona ni ku tlhela ndzi vulavurisana ni varhangeri lava nga ni vutihlamuleri va Kereke ya Mormon. Ndzi byeriwe leswaku tinhlamulo ta swivutiso swa mina a ti ta hlamuriwa siku rin’wana loko ku vonakala ku ya ku voninga.

Hikwalaho ko hetiwa matimba hi nhlamuselo ya vona, ndzi tikambisise swinene swin’we ni xivangelo xa mina xo lava ku va murhumiwa wa Mormon. Ndzi xiye leswaku xivangelo xin’wana lexi a xi endla ndzi lava ku va murhumiwa hileswi a ndzi lava ku pfuna vanhu van’wana. Kasi xivangelo xin’wana lexi a xi ndzi endla ndzi lava ku va murhumiwa hileswi a ndzi lava leswaku vanhu va ndzi xixima. Kambe a ndzi nga tivi swo tala hi Xikwembu. Hambileswi enkarhini lowu hundzeke a ndzi hete minkarhi yo tala ndzi hlaya Bibele, a ndzi nga yi teki yi ri ya nkoka. A ndzi nga xi tivi xikongomelo xa Xikwembu hi misava kumbe hi vanhu.

Swin’wana swa swilo leswi ndzi swi dyondzeke eBibeleni ni Timbhoni ta Yehovha, i vito ra Xikwembu, leswi endlekaka loko munhu a file ni ntirho wa Yesu eku hetisiseni ka xikongomelo xa Xikwembu. Eku heteleleni ndzi sungule ku tiva buku leyi ya risima naswona ndzi tiphine hi ku byela van’wana ntiyiso lowu a ndzi wu dyondza. Minkarhi hinkwayo a ndzi swi tiva leswaku Xikwembu xi kona, kambe sweswi ndzi vulavula na xona hi xikhongelo tanihi Munghana wa mina lonkulu. Ndzi khuvuriwe ndzi va Mbhoni ya Yehovha hi July 12, 2004, naswona endzhaku ka tin’hweti ta tsevu ndzi sungule ntirho wa nkarhi hinkwawo evutirhelini bya Vukreste.

Ku ringana malembe ya ntlhanu, ndzi tirha eyindlu-nkulu ya Timbhoni ta Yehovha eBrooklyn, le New York. Ndzi tiphina swinene leswi ndzi kotaka ku pfuna eku kandziyisiweni ka Tibibele ni minkandziyiso leyi sekeriweke eBibeleni leyi vuyerisaka vanhu va timiliyoni emisaveni hinkwayo naswona ndzi hambeta ndzi tiphina hi ku pfuna vanhu leswaku va dyondza hi Xikwembu.