Xana u tshame u tekeriwa ehansi? Xana ku tshame ku ariwa xikombelo xa wena, u aleriwa ku endleriwa ntirho wo karhi, kumbe u tekeriwa ehansi hikwalaho ka rixaka ra wena kumbe hikwalaho ka xiyimo xa timali? Loko swi ri tano, a wu wexe. Hambiswiritano, hi lawa mahungu yo tsakisa: Swilo sweswo leswi susaka xindzhuti, hambileswi swi tolovelekeke emisaveni a swi humeleli etilweni. Muapostola Petro la nga Mukreste u vule a nga tipfinyingi leswaku “Xikwembu a xi yi hi nghohe.”—Hlaya Mintirho 10:34, 35.

Petro u vule marito wolawo endhawini leyi nga tolovelekangiki—a ri ekaya ka Korneliyo loyi a a ri wa Vamatiko. Petro, loyi a a ri Muyuda u hanye hi nkarhi lowu Vayuda a va teka Vamatiko tanihi lava nyameke naswona a va nga amukeleki leswaku va gandzela. Kutani ha yini Petro a a ri ekaya ka Korneliyo? Hikuva Yehovha Xikwembu a a hlele nhlangano wolowo. Petro a kombiwe xivono hi Xikwembu laha a byeriweke leswi: “Tshika ku vula leswaku swilo leswi Xikwembu xi swi basiseke swi nyamile.” Hi siku ra le mahlweni ka kwalaho, Petro a a nga swi tivi leswaku Korneliyo a a kombiwe xivono lexi eka xona ntsumi yi n’wi leriseke leswaku a vitana Petro. (Mintirho 10:1-15) Loko Petro a xiye leswaku Yehovha a katseka eka mhaka leyi, u nambe a sungula ku vulavula.

Petro u te: “Hakunene ndza swi xiya leswaku Xikwembu a xi yi hi nghohe.” (Mintirho 10:34) Rito ra Xigriki leri hundzuluxeriweke ri va ku nga “yi hi nghohe” hi ku kongoma ri vula ku nga “hlawuli ndluwa u siya hove.” Malunghana ni rito leri, xidyondzi xin’wana xi ri: “Ri kombetela eka muavanyisi loyi a langutaka munhu exikandzeni kutani a n’wi gweva, ku nga ri hi ku ya hi nandzu wakwe kambe hikwalaho ka ndlela leyi a langutekaka ha yona.” Xikwembu a xi hlawuli vanhu hi ku ya hi rixaka, tiko, xiyimo xa timali kumbe swilo swin’wana leswi vonakaka.

Ematshan’weni ya sweswo, Yehovha u vona leswi nga embilwini ya hina. (1 Samuwele 16:7; Swivuriso 21:2) Petro u tlhele a ku: “Eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” (Mintirho 10:35) Ku chava Xikwembu swi vula ku xi xixima, ku xi fundzha, ku xi tshemba ni ku papalata swilo leswi nga xi tsakisiki. Ku endla swo lulama swi katsa ku endla leswi nga swinene emahlweni ka Xikwembu hi ku swi rhandza. Yehovha u tsakela munhu loyi mbilu yakwe yi xiximaka ni ku tlhela yi n’wi susumetela leswaku a endla leswinene.—Deteronoma 10:12, 13.

Loko u tshame u tekeriwa ehansi kumbe u kombisiwa xihlawuhlawu, u ni xivangelo lexi twalaka xa ku khutazeka hi marito ya Petro malunghana na Xikwembu. Yehovha u kokela vanhu va matiko hinkwawo evugandzerini bya ntiyiso. (Yohane 6:44; Mintirho 17:26, 27) U yingisa ni ku hlamula swikhongelo swa vagandzeri vakwe ku nga khathariseki rixaka, tiko kumbe xiyimo xa vona xa timali. (1 Tihosi 8:41-43) Hi nga tiyiseka leswaku loko Yehovha a hi languta a ri etilweni, u vona rixaka rin’we ntsena—rixaka ra vanhu. Xana u susumeteleka ku dyondza swo tala hi Xikwembu lexi nga yiki hi nghohe?