Xigevenga lexi hi nga dyondzaka ha xona hi lexi Yesu a vulavulaka na xona exifanisweni. Xigevenga xexo xi tisorile eka vugevenga bya xona. Xi kombele Yesu xi ku: “U ndzi tsundzuka loko u nghena emfun’weni wa wena.” Sweswi hilaha u swi vonaka hakona eka xifaniso lexi, Yesu u vulavula ni xigevenga lexi. Xana wa swi tiva leswi Yesu a swi vuleke eka xona?— * Yesu u xi tshembise a ku: “Ndzi tiyisile namuntlha ndzi ri eka wena, u ta va na mina eParadeyisini.”

Xana u anakanya leswaku Paradeyisi yi ta va yi ri njhani?— Ku tiyiseka leswaku hi kuma nhlamulo leyinene, a hi vulavuleni hi Paradeyisi leyi Xikwembu xi yi endleleke wanuna ni wansati wo sungula, ku nga Adamu na Evha. Xana Paradeyisi yoleyo a yi ri kwihi? Xana a yi ri etilweni kumbe emisaveni?—

U be kona loko u vula leswaku a yi ri emisaveni. Kutani loko hi ehleketa hi xigevenga xi ri “eParadeyisini,” hi fanele hi anakanya ha xona xi ri karhi xi hanya laha misaveni loko yi va paradeyisi. Xana Paradeyisi yoleyo yi ta va yi ri njhani?— A hi voneni.

Endzhaku ka loko Yehovha Xikwembu a tumbuluxe mpatswa wo sungula, ku nga Adamu na Evha, Bibele yi vula leswaku u va veke eparadeyisini laha misaveni. A yi vitaniwa ‘ntanga wa Edeni.’ Xana wa swi anakanya leswaku a wu xonge hi ndlela yihi ‘ntanga wa Edeni?— Hakunene a wu koka mahlo naswona a ku ri ndhawu yo saseka swinene yo tshama eka yona ku tlula yin’wana ni yin’wana leyi munhu a nga tshama a yi vona namuntlha!

Xana u anakanya yini? Xana Yesu u ta va laha misaveni ni xigevenga lexi tisoleke eka swidyoho swa xona?— Nikatsongo, Yesu u ta va a ri etilweni a ri karhi a fuma tanihi Hosi ehenhla ka misava leyi nga Paradeyisi. Kutani Yesu u ta va a ri na xigevenga xexo hikuva u ta xi pfuxa eka lava feke ni ku vona leswaku xa khathaleriwa eParadeyisini ya laha misaveni.  Kambe ha yini Yesu a pfumelele wanuna loyi a nga xigevenga leswaku a hanya eParadeyisini?— A hi buleni ha swona.

I ntiyiso leswaku xigevenga lexi xi endle swilo swo biha. Kambe ku ni vanhu van’wana va tibiliyoni lava hanyeke emisaveni. Hambiswiritano, vo tala va vona, va endle swilo swo biha hikuva a va nga si tshama va dyondzisiwa malunghana na Yehovha ni leswi a lavaka leswaku va swi endla.

Kutani vanhu vo fana ni volavo, ku katsa ni xigevenga lexi Yesu a vulavuleke na xona emhandzini, va ta pfuxeriwa evuton’wini eParadeyisini kona kwala misaveni. Va ta dyondzisiwa leswi ku rhandza ka Xikwembu swi vulaka swona. Kutani va ta swi kombisa leswaku va rhandza Yehovha.

Xana wa swi tiva leswaku va ta swi kombisa njhani sweswo?— Hi ku endla leswi Xikwembu xi lavaka leswaku va swi endla. Mawaku ndlela leyi swi nga ta tsakisa ha yona ku hanya eParadeyisini naswona minkarhi hinkwayo u va ni vanhu lava rhandzaka Yehovha ni ku tlhela va rhandzana!