“Xikwembu xa le tilweni xi ta veka mfumo lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo, kambe wona wu ta tshama hilaha ku nga riki na makumu.”—Daniyele 2:44.

Mfumo wa Xikwembu i hulumendhe ya le tilweni. Mufumi wa yona, ku nga Yesu Kreste, u ta siva vafumi hinkwavo naswona u ta tiyisekisa leswaku ku rhandza ka Xikwembu a ku endleki etilweni ntsena kambe ni laha misaveni. (Matewu 6:9, 10) Hulumendhe leyi a yi nge siviwi hi yin’wana ya vanhu hikuva i “[mfumo] lowu nga heriki wa Hosi tlhelo Muponisi wa hina Yesu Kreste.” Ku ta va ni ku rhula ka xiviri.—2 Petro 1:11.

“Sathana hi byakwe u tihundzula ntsumi ya ku vonakala. Hikokwalaho a hi nchumu lowukulu loko vatirheli vakwe na vona va tihundzula vatirheli va ku lulama. Kambe makumu ya vona ma ta ya hi mintirho ya vona.”—2 Vakorinto 11:14, 15.

Vukhongeri bya mavunwa byi ta paluxiwa leswaku i mintirho ya Diyavulosi naswona byi ta heriseriwa makumu laha misaveni. Vukhongeri hinkwabyo lebyi nga na xihlawuhlawu ni lebyi halataka ngati byi ta herisiwa. Leswi swi ta pfuna leswaku lava rhandzaka “Xikwembu lexi hanyaka ni xa ntiyiso” va xi gandzela hi ‘ripfumelo rin’we’ ni hi “moya ni ntiyiso.” Swi ta endla leswaku ku va ni ku rhula ni vun’we!—1 Vatesalonika 1:9; Vaefesa 4:5; Yohane 4:23.

“Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:3, 4.

Yehovha Xikwembu u endla leswi leswaku swi koteka hi ku tirhisa N’wana wakwe, Yesu, loyi a nyikeleke vutomi byakwe laha misaveni hikwalaho ka vanhu.  (Yohane 3:16) Ehansi ka nkongomiso wa Yesu, vanhu va ta tlhela va va lava hetisekeke. Ku ta va ku ri hava ku xaniseka hikuva “Xikwembu hi xiviri xi ta va na vona” naswona xi ta sula “mihloti hinkwayo ematihlweni ya vona.” Ku nga ri khale, ku nga hetiseki ni ku xaniseka ku ta va swilo swa nkarhi lowu hundzeke; “lavo lulama va ta dya ndzhaka ya misava, va ta tshama eka yona hi masiku.”—Pisalema 37:29.

‘Yesu Kreste a khoma dragona, nyoka ya khale, ku nga Diyavulosi na Sathana, a n’wi boha ku ringana malembe ya 1000. Kutani a n’wi lahlela ekheleni ro enta, a ri pfala a ri tiyisa, leswaku a nga ha tshuki a hambukisa matiko.’—Nhlavutelo 20:2, 3.

Minkucetelo hinkwayo ya Sathana yi ta va yi nga ha ri kona loko Sathana ni madimona va lahleriwe “ekheleni ro enta,” laha va nga taka va nga koti ku endla nchumu hilaha ku heleleke. A va nge he swi koti ku lawula vanhu leswaku va endla vubihi. Swi ta va leswi chavelelaka ku hanya emisaveni leyi nga riki na nkucetelo wa Sathana ni mimoya yo homboloka!

‘Masiku yo hetelela’ ma ta herisa leswi Yesu a swi vuleke “nhlomulo lowukulu.” U te: “Endzhaku ka sweswo ku ta va ni nhlomulo lowukulu lowu ku nga si tshamaka ku humelela lowu fanaka na wona hi mpfhuka misava yi va kona ku fikela sweswi, e-e, naswona a wu nge he tlheli wu va kona.”—Matewu 24:21.

Nhlomulo wu ta va wukulu hikuva ku ta humelela makhombo lama nga si tshamaka ma humelela. Leswi swi ta endleka eka “nyimpi ya siku lerikulu ra Xikwembu xa Matimba Hinkwawo,” leyi tiviwaka tanihi ‘Armagedoni.’—Nhlavutelo 16:14, 16.

Vanhu va le tindhawini hinkwato lava rhandzaka leswinene va ku langutele hi mahlo-ngati ku herisiwa ka mafambiselo lawa yo homboloka ya swilo. Xiya mikateko yi nga ri yingani leyi va nga ta yi kuma ehansi ka Mfumo wa Xikwembu.

“Ntshungu lowukulu” wu ta pona leswaku wu nghena emisaveni leyintshwa yo rhula: Rito ra Xikwembu ri vula leswaku “ntshungu lowukulu” lowu nhlayo ya wona yi nga ntsandza-vahlayi wu ta “[huma] enhlomulweni lowukulu” leswaku wu ta hanya emisaveni leyintshwa yo lulama. (Nhlavutelo 7:9, 10, 14; 2 Petro 3:13) Leswaku wu ponisiwa wu ta titshega hi Yesu Kreste, “Xinyimpfana xa Xikwembu lexi susaka xidyoho xa misava!”—Yohane 1:29.

Mikateko leyikulu yi ta huma eka dyondzo ya Xikwembu: Emisaveni leyintshwa, “kunene misava yi ta tala hi ku tiva Yehovha.” (Esaya 11:9) Dyondzo ya Xikwembu yi ta katsa swiletelo swa ndlela leyi vanhu hinkwavo va nga hanyaka hi ku rhula ha yona naswona hi ku pfumelelana ni swiyimo. Xikwembu xi tshembisa leswi: “Mina Yehovha, ndzi Xikwembu xa wena, Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba hi yona.”—Esaya 48:17.

Varhandziwa va hina lava feke va ta pfuxiwa emasirheni: Loko Yesu a ri emisaveni, u pfuxe munghana wakwe Lazaro. (Yohane 11:1, 5, 38-44) Xisweswo u kombise leswi a nga ta swi endla ehansi ka Mfumo wa Xikwembu.—Yohane 5:28, 29.

Ku rhula ni vululami swi ta tshama hilaha ku nga heriki: Loko Kreste a fuma, vuhomboloki byi ta va byi nga ha ri kona. Hi swi tivisa ku yini sweswo? Hikuva Yesu u kota ku vona timbilu naswona u ta tirhisa vuswikoti byebyo leswaku a avanyisa vanhu vo lulama ni vo homboloka. Lava alaka ku cinca tindlela ta vona to homboloka a va nge pfumeleriwi leswaku va tshama emisaveni leyintshwa ya Xikwembu.—Pisalema 37:9, 10; Esaya 11:3, 4; 65:20; Matewu 9:4.

Leswi hi swi kambisiseke ko va swilo swi nga ri swingani ntsena eka vuprofeta byo tala bya Bibele lebyi kombetelaka enkarhini lowu taka wo tsakisa. Loko Mfumo wa Xikwembu wu fuma misava, ku ta va ni ku ‘rhula lokukulu’ hilaha ku nga heriki. (Pisalema 37:11, 29) Swilo hinkwaswo leswi vangelaka vanhu switlhavi ni maxangu lawa ma va weleke swi ta herisiwa. Hi nga tiyiseka hi swilo leswi hikwalaho ka xitshembiso lexi xa Xikwembu: “Waswivo, ndzi endla swilo hinkwaswo swi va leswintshwa. . . . Marito lawa ma tshembekile, i ya ntiyiso.”—Nhlavutelo 21:5.