Xana u tshame u twisiwa ku vava swinene lerova u kala u rila?— * Swi nga ha endleka leswaku hinkwerhu ka hina hi tshame hi twisiwa ku vava. Kambe hi nga ha va hi nga twisiwanga ku vava emirini ya hina. Un’wana a nga ha va a hi onhe vito. Sweswo swi nga hi vavisa, a hi swona ke?— Xikwembu na xona xi nga twa ku vava loko xi hemberiwa. A hi buleni hi mhaka leyi kutani hi vona ndlela leyi hi nga xi tsakisaka ha yona Xikwembu ematshan’weni yo xi twisa ku vava.

Bibele yi vula leswaku vanhu van’wana lava vuleke leswaku va rhandza Xikwembu va ‘xi twise ku vava.’ Hakunene va ‘twise Xikwembu ku vava!’ I ntiyiso leswaku ku hava munhu loyi a nga vavisaka miri wa Yehovha Xikwembu. U ni matimba hinkwawo. Kutani a hi voneni leswaku ha yini Yehovha a twa ku vava loko hi nga endli leswi a swi lavaka.

Vanhu vambirhi vo sungula lava Yehovha a va tumbuluxeke va n’wi twise ku vava swinene. Vanhu lava vambirhi va vekiwe eParadeyisini laha misaveni leyi a yi vuriwa ‘ntanga wa Edeni.’ A va ri vamani vanhu lavambirhi?— A ku ri Adamu ivi endzhakunyana ku va na Evha. A hi voneni leswaku va endle yini leswi twiseke Yehovha ku vava.

Endzhaku ka loko Yehovha a va veke entangeni wolowo, u va byele leswaku va wu khathalela. U tlhele a va byela leswaku va nga va ni vana nileswaku va nga tshama swin’we entangeni va nga fi. Kambe emahlweni ko va Adamu na Evha va va ni vana, ku humelele nchumu wun’wana wo biha. Xana wa swi tiva leswaku a ku ri yini nchumu wa kona?— Ntsumi yi kucetele Evha ivi yena a kucetela Adamu leswaku va xandzukela Yehovha. A hi voneni ndlela leyi leswi swi humeleleke ha yona.

 Ntsumi yi endle leswaku nyoka, yi vonaka onge yo vulavula. Evha u tsakisiwe hileswi a swi tweke—nyoka yi n’wi byele leswaku u “ta fana ni Xikwembu.” Kutani u endle leswi nyoka yi n’wi byeleke swona. Xana wa swi tiva leswaku u endle yini?—

Evha u dye eka murhi lowu Yehovha a byeleke Adamu leswaku va nga wu dyi. Emahlweni ko va Xikwembu xi tumbuluxa Evha, xi byele Adamu xi ku: “U nga ha tidyela u eneriseka eka murhi wun’wana ni wun’wana wa ntanga. Kambe loko ku ri murhi wa ku tiva leswinene ni leswo biha u nga tshuki u wu dya hikuva siku u nga ta wu dya, u ta fa hakunene.”

Evha a a wu tiva nawu wolowo. Hambiswiritano, u hambete a languta murhi wolowo kutani a vona leswaku “a wu fanelekela ku dyiwa nileswaku a wu navetisa mahlo . . . Hiloko a teka mbhandzu wa wona a dya.” Endzhaku ka sweswo u nyike Adamu kutani “a dya.” Xana u ehleketa leswaku ha yini a endle tano?— Xivangelo a ku ri leswaku Adamu a rhandza Evha swinene ku tlula ndlela leyi a a rhandza Yehovha ha yona. U hlawule ku tsakisa yena ematshan’weni yo tsakisa Xikwembu. Kambe ku yingisa Yehovha i swa nkoka ku tlula ku yingisa munhu wihi na wihi!

Wa yi tsundzuka nyoka leyi vulavuleke na Evha? Hilaha munhu a nga endlaka xipopana leswaku xi vonaka onge xo vulavula, ku ni loyi a endleke leswaku nyoka yoleyo yi vonaka onge yo vulavula. Xana a ku ri rito ra mani leri a ri twala eka nyoka?— A ku ri rito ra “nyoka ya khale, leyi vuriwaka Diyavulosi na Sathana.”

Xana wa yi tiva ndlela leyi u nga n’wi tsakisaka ha yona Yehovha?— U nga endla tano hi ku va minkarhi hinkwayo u tikarhatela ku n’wi yingisa. Sathana u vula leswaku a nga kucetela vanhu leswaku va endla leswi a swi lavaka. Kutani Yehovha u hi khutaza a ku: “N’wananga, tlhariha u tsakisa mbilu yanga, leswaku ndzi ta angula loyi a ndzi tlhontlhaka.” Sathana u tlhontlha Yehovha. U vula leswaku a nga tshikisa un’wana ni un’wana ku N’wi tirhela. Kutani tsakisa Yehovha hi ku n’wi yingisa ni ku n’wi tirhela! Xana u ta tikarhatela ku endla tano?—