Hi December vanhu vo tala emisaveni hinkwayo va vona swifaniso swa Yesu loko a ha ri ricece. U va a ri exidyelweni, ku nga bokisi lerikulu laha ku hlayisiwaka byanyi bya swifuwo leswaku swi dya kona. Xana hi fanele hi tsundzuka Yesu tanihi n’wana ntsena?— * A hi buleni hi ndlela ya nkoka leyi hi nga n’wi tsundzukaka ha yona. Hi nga dyondza eka leswi humeleleke ntlawa wa varisi lava a va ri enhoveni ekusuhi ni le Betlehema hi vusiku byebyo.

Hi xitshuketa ku humelele ntsumi eka varisi. Yi va byele leswi: “Namuntlha mi velekeriwe Muponisi, loyi a nga Kreste Hosi.” Ntsumi yi tlhele yi va byela leswaku a va ta kuma Yesu a “phutseriwe hi malapi ya tinguvu, [a] etlele exidyelweni.” Hi nkarhinyana tintsumi tin’wana to tala ti sungule “ku vonga Xikwembu.”

A wu ta titwa njhani loko u twa tintsumi ti vonga Xikwembu?— Varisi va tsakile! Va te: “Hakunene a hi fambeni hi ya fika eBetlehema, hi ya vona nchumu lowu wu endlekeke.” Va kume “Mariya swin’we na Yosefa, ni ricece ri etlele exidyelweni.”

Hi ku hatlisa, van’wana na vona va ye eBetlehema laha Mariya na Yosefa a va ri kona. Loko varisi va va byela leswi humeleleke, hinkwavo va hlamarile. Xana wa swi tsakela ku tiva swilo leswi swo hlamarisa?— Hinkwerhu ka hina lava rhandzaka Xikwembu ha swi tsakela. Sweswi a hi voneni leswaku ha yini ku velekiwa ka Yesu ku endle leswaku ku va ni ntsako lowukulu. Leswaku hi endla tano, a hi tlheleleni endzhaku emahlweni ko va Mariya a tekiwa.

Siku rin’wana ntsumi leyi vuriwaka Gabriyele yi endzele Mariya. Yi n’wi tshembise leswaku a ta veleka n’wana loyi a nga ta “va lonkulu naswona u ta vuriwa N’wana wa La nge Henhla-henhla.” Gabriyele u te: ‘U ta va hosi naswona mfumo wakwe a wu nge vi na makumu.’

Mariya a a lava ku tiva ndlela leyi sweswo a swi ta  endleka ha yona, tanihi leswi a nga si tshama a tivana ni wanuna. Kutani Gabriyele u n’wi byele leswi: “Matimba ya La nge Henhla-henhla ma ta ku funengeta. Hikwalaho ka sweswo lexi nga ta velekiwa na xona xi ta vuriwa lexo kwetsima, N’wana wa Xikwembu.” Ku susa N’wana wa Xikwembu etilweni kutani vutomi byakwe byi nghenisiwa embelekweni wa Mariya leswaku a kula a va n’wana—a ku ri singita lerikulu!

Xana u tshama u vona swifaniso leswi kombaka ‘vavanuna vanharhu vo tlhariha’ va endzele Yesu loko a ha ri n’wana swin’we ni varisi?— Hi minkarhi ya Khisimusi swifaniso swo tano swi tolovelekile. Kambe a swi pakanisi. Hakunene ‘vavanuna volavo vo tlhariha’ a ku ri vangoma va swilo swa le mpfhukeni, ku nga vaendli va swilo leswi Xikwembu xi swi solaka. A hi voneni leswaku ku humelele yini loko va fika. Bibele yi ri: “Loko va nghena endlwini, va vona n’wana lontsongo a ri na Mariya mana wakwe.” Kutani hi nkarhi wolowo Yesu a nga ha ri ricece leri tshamaka exidyelweni; a a ri n’wana loyi a a tshama na Yosefa na Mariya endlwini!

Xana vangoma va swilo swa le mpfhukeni va n’wi kume njhani Yesu?— Va kongomisiwe hi “nyeleti,” a yi va kongomisanga eBetlehema kambe yi sungule yi va kongomisa eka Hosi Heroda wa le Yerusalema. Bibele yi vula leswaku Heroda a a lava ku kuma Yesu leswaku a ta n’wi dlaya. Sweswi anakanyisisa hi mhaka leyi. U anakanya leswaku i mani loyi a nga endla leswaku nyeleti yi kongomisa vangoma volavo va swilo swa le mpfhukeni eka Heroda?— A ku nga ri Xikwembu xa ntiyiso, ku nga Yehovha, kambe a ku ri nala wa xona, ku nga Sathana Diyavulosi!

Namuntlha Sathana u ringeta ku endla vanhu va teka Yesu tanihi n’wana la nga pfuniki nchumu. Kambe ntsumi Gabriyele yi byele Mariya yi ku: ‘U ta va hosi naswona mfumo wakwe a wu nge vi na makumu.’ Sweswi Yesu u fuma tanihi Hosi etilweni naswona ku nga ri khale u ta herisa valala hinkwavo va Xikwembu. Leyi hi yona ndlela leyi hi faneleke hi tsundzuka Yesu ha yona naswona hi fanele hi byela van’wana hi mhaka leyi.