Bibele yi hi byela leswi Yehovha ni N’wana wakwe Yesu Kreste va nga ta swi endla hi ku xaniseka loku vangiweke hi Sathana Diyavulosi. Bibele yi ri: “N’wana wa Xikwembu [Yesu] u humelerile hi xikongomelo xa ku ta herisa mintirho ya Diyavulosi.” (1 Yohane 3:8) Mafambiselo lawa ya swilo lama taleke hi makwanga, rivengo ni swiendlo swo biha ma ta lovisiwa. Yesu u tshembisa leswaku Sathana Diyavulosi ku nga, “mufumi wa misava leyi u ta cukumeteriwa ehandle.” (Yohane 12:31) Ku ta simekiwa misava leyintshwa yo lulama, laha nkucetelo wa Sathana wu nga ta va wu nga ha ri kona, naswona misava leyi yi ta va ndhawu ya ku rhula.—2 Petro 3:13.

Xana ku ta endleka yini hi vanhu lava alaka hi vomu ku cinca mahanyelo ya vona naswona va hambetaka va endla swilo swo biha? Anakanya hi xitshembiso lexi: “Lavo lulama hi vona lava nga ta tshama emisaveni, naswona lava va pfumalaka xisandzu hi vona lava nga ta sala eka yona. Loko ku ri lavo homboloka, va ta dlayiwa emisaveni; kasi loko ku ri vaxengi, va ta tsuvuriwa eka yona.” (Swivuriso 2:21, 22) Nkucetelo wa vanhu vo homboloka a wu nge he vi kona. Eka swiyimo sweswo swo rhula, vanhu lava yingisaka va ta ya va endliwa lava hetisekeke hakatsongo-tsongo.—Varhoma 6:17, 18; 8:21.

Eka misava yoleyo leyintshwa, Xikwembu xi ta byi herisa njhani vubihi? A xi nge herisi nyiko leyi xi yi nyikeke vanhu ya ku tihlawulela ivi xi va endla va hanya ku fana ni michini leyi kongomisiwaka. Ku ri na sweswo, xi ta dyondzisa vanhu lava yingisaka tindlela ta xona, xi va pfuna va cinca miehleketo ni swiendlo swa vona swo biha.

Xana Xikwembu xi ta endla yini hi makhombo lama humelelaka ma nga languteriwanga? Xi tshembisa leswaku hulumendhe ya Mfumo wa xona yi ta lawula misava ku nga ri khale. Hosi ya Mfumo wolowo leyi hlawuriweke hi Xikwembu i Yesu Kreste loyi a nga ni matimba yo hanyisa lava vabyaka. (Matewu 14:14) Nakambe Yesu u ni matimba yo lawula matimba ya ntumbuluko. (Marka 4:35-41) Xisweswo, a ku nge he vi kona ku xaniseka loku vangiwaka hi “nkarhi ni xiendlakalo lexi nga languteriwangiki.” (Eklesiasta 9:11) Eka Mfumo wa Kreste vanhu a va nge he weriwi hi makhombo.—Swivuriso 1:33.

Xana ku ta endleka yini hi vanhu va ntsandza vahlayi lava feke ku vava va nga ri na nandzu? Emahlweni ko va Yesu a pfuxa munghana wakwe Lazaro u te: “Hi mina ku pfuka ni vutomi.” (Yohane 11:25) Hakunene, Yesu u ni matimba ya ku pfuxa lava feke!

Loko mhaka ya ku hanya emisaveni laha vanhu vo lulama va nga ta ka va nga ha humeleriwi hi swilo swo biha yi ku tsakisa, ha yini u nga tivekeli pakani ya ku dyondza swo tala hi Xikwembu xa ntiyiso ni hi xikongomelo xa xona eBibeleni? Timbhoni ta Yehovha ta laha u tshamaka kona, ti ta swi tsakela ku ku pfuna leswaku u kuma vutivi byolebyo. Hi ku rhamba leswaku u tihlanganisa na tona laha u tshamaka kona kumbe u tsalela vakandziyisi va magazini lowu.