MUENDLI un’wana wa ndzavisiso u vutise vantshwa lava tlulaka 800 va vukhongeri byo hambana-hambana loko va pfumela leswaku Yesu yi yena muhlamuri wa swikhongelo. Vantshwa lava tlulaka tiphesente ta 60, va vule leswaku va tshemba leswaku Yesu wa hlamula. Kambe eka ndzavisiso wolowo muntshwa un’wana u suse vito leri nge Yesu ivi a tsala Xikwembu.

U anakanya yini? Xana hi fanele hi khongela eka Yesu kumbe eka Xikwembu? * Leswaku u kuma nhlamulo, a hi sunguleni hi kambisisa ndlela leyi Yesu a dyondziseke vadyondzisiwa va yena ku khongela ha yona.

Yesu u hi dyondzisile a tlhela a hi kombisa leswaku hi fanele hi khongela eka mani.

TIDYONDZO TAKWE: Loko un’wana wa vadyondzisiwa vakwe a kombela Yesu a ku: “Hosi, hi dyondzise ndlela ya ku khongela,” u hlamule a ku: “Loko mi khongela, vulani leswi, ‘Tatana.’” (Luka 11:1, 2) Ku engetela kwalaho, eka Dyondzo ya le Ntshaveni leyi dumeke, Yesu u khutaze vayingiseri vakwe ku khongela. U te: ‘Khongelani eka Tata wa n’wina.’ U tlhele a va tiyisekisa a ku: “Tata wa n’wina [wa] swi tiva swilo leswi mi swi lavaka mi nga si swi kombela eka [yena].” (Matewu 6:6, 8) Hi vusiku byakwe byo hetelela a ri munhu wa nyama, Yesu u byele vadyondzisiwa vakwe a ku: “Loko mi kombela xin’wana ni xin’wana eka Tatana, u ta mi nyika xona hi vito ra mina.” (Yohane 16:23) Xisweswo Yesu u hi dyondzise ku va hi khongela eka loyi a nga Tata wakwe ni wa hina ku nga Yehovha Xikwembu.—Yohane 20:17.

XIKOMBISO XA YENA: Loko Yesu a endla hilaha a dyondziseke van’wana ha kona ku khongela, u khongele a ku: “Ndza ku dzunisa erivaleni, Tatana, Hosi ya tilo ni misava.” (Luka 10:21) Siku rin’wana, “Yesu [u tlakusele] mahlo yakwe etilweni a ku: ‘Tatana, ndza nkhensa hikuva u ndzi twile.’” (Yohane 11:41) Loko a ri karhi a fa Yesu u khongele a ku: “Tatana, moya wa mina ndzi wu veka emavokweni ya wena.” (Luka 23:46) Loko Yesu a khongela eka Tata wakwe wa le tilweni, la nga “Hosi ya tilo ni misava,” u veke xikombiso lexi nga erivaleni lexi faneleke xi landzeriwa. (Matewu 11:25; 26:41, 42; 1 Yohane 2:6) Xana valandzeri va Yesu vo sungula a va swi twisisa hi ndlela yoleyo?

Loko ka ha sele mavhiki leswaku Yesu a tlhandlukela etilweni, valandzeri vakwe a va xanisiwa ni ku xungetiwa hi vakaneti va vona. (Mintirho 4:18) I ntiyiso leswaku va khongerile va kombela mpfuno—kambe, va khongele eka mani? ‘Va tlakusele marito ya vona eka Xikwembu hi mianakanyo yin’we,’ va khongela leswaku xi hambeta xi va pfuna “hi vito ra nandza wa [xona] wo kwetsima Yesu.” (Mintirho 4:24, 30) Hikwalaho, vadyondzisiwa va Yesu va landzele nkongomiso wakwe emhakeni ya xikhongelo. Va khongele eka Xikwembu ku nga ri eka Yesu.

Endzhaku ka malembe, muapostola Pawulo u hlamusele ndlela leyi yena ni vanghana vakwe va khongeleke ha yona. U tsalele Vakreste-kulobye a ku: “Hi nkhensa Xikwembu Tata wa Hosi ya hina Yesu Kreste minkarhi hinkwayo loko hi mi khongelela.” (Vakolosa 1:3) Nakambe Pawulo u tsalele vapfumeri-kulobye leswaku “evitweni ra Hosi ya hina Yesu Kreste [va] nkhensa nkarhi hinkwawo hi swilo hinkwaswo eka Xikwembu tlhelo Tata wa hina.” (Vaefesa 5:20) Eka marito lawa, ha swi vona  leswaku Pawulo a a khutaza van’wana leswaku va khongela eka ‘Xikwembu tlhelo Tata wakwe eka hinkwaswo’ kambe va khongela hi vito ra Yesu.—Vakolosa 3:17.

Ku fana ni Vakreste vo sungula, hi nga kombisa rirhandzu ra hina eka Yesu hi ku va hi yingisa ndzayo yakwe emhakeni yo khongela. (Yohane 14:15) Loko hi ri karhi hi khongela eka Tata wa hina wa le tilweni ntsena, ma ta va ya xiviri eka hina marito ya Pisalema 116:1, 2 lama nge: “Ndzi rhandza Yehovha hikuva wa ri twa rito ra mina . . . ndzi ta vitana emasikwini ya mina hinkwawo.” *