Tinhlamulo Ta Swivutiso Swa Bibele
Siku ra Vuavanyisi i yini?
Ha yini siku ra vuavanyisi ri ta va nkarhi wo tsakisa?
Hi minkarhi ya ku tsariwa ka Bibele, Xikwembu xi tirhise vaavanyisi leswaku xi ponisa vanhu va xona eka vanhu lava a va va tshikilela. (Vaavanyisi 2:18) Bibele yi hlamusela Siku ra Vuavanyisi tanihi nkarhi wo tsakisa lowu Yehovha loyi a nga Muavanyisi wa misava hinkwayo, a nga ta ponisa vanhu eka xiyimo lexi nga riki na vululami.—Hlaya Pisalema 96:12, 13; Esaya 26:9.
Xikwembu xi veke Yesu leswaku a tisa vululami eka lava hanyaka ni lava feke. (Mintirho 10:42; 17:31) Vanhu vo tala va fe va nga xi tivi Xikwembu. Hikwalaho, hi Siku ra Vuavanyisi, Yesu u ta pfuxa vanhu volavo leswaku va ta tiva va tlhela va rhandza Xikwembu xa ntiyiso.—Hlaya Mintirho 24:15.
Ha yini Siku ra Vuavanyisi ri ta heta malembe ya gidi?
Vafi va ta pfuxiwa hi nkarhi wa malembe ya gidi. (Nhlavutelo 20:4, 12) Va fanele va nyikiwa nkarhi wa ku dyondza hi tindlela ta Xikwembu va tlhela va xi yingisa. Ku hambana ni mavonelo ya vanhu, Bibele yi vula leswaku vanhu va ta avanyisiwa hi ku ya hi leswi va nga ta swi endla endzhaku ko pfuxiwa.—Hlaya Varhoma 6:7.
Bibele yi tlhela yi hlamusela siku ra vuavanyisi leri nga ta fika hi ku hatlisa, loko malembe ya gidi ma nga si sungula. Siku rolero ri tlhela ri vuriwa makumu hilaha ku hlamuseriwaka hakona eka magazini lowu. Hi siku rolero, Xikwembu xi ta herisa vanhu hinkwavo vo homboloka, lava nga xi xiximiki. (2 Petro 3:7) Hikwalaho, hi fanele hi tiyimisela ku kombisa rirhandzu ra hina eka Xikwembu.—Hlaya 2 Petro 3:9, 13.
