Bibele yi hi byela leswaku makumu ma ta katsa ku lovisa: “Ku ta va ni nhlomulo lowukulu lowu ku nga si tshamaka ku humelela lowu fanaka na wona hi mpfhuka misava yi va kona ku fikela sweswi. . . . Loko masiku wolawo a ma nga hungutiwanga, ku hava nyama leyi a yi ta ponisiwa.” (Matewu 24:21, 22) Kambe Xikwembu xi hi tshembisa leswaku vanhu vo tala va ta pona: “Misava ya hundza . . . , kambe loyi a endlaka ku rhandza ka Xikwembu u tshama hi masiku.”—1 Yohane 2:17.

Loko u lava ku pona loko misava leyi yi herisiwa kutani “u tshama hi masiku,” u fanele u endla yini? Xana u fanele u sungula ku endla malunghiselelo yo karhi? Doo! Bibele yi hi khutaza leswaku hi rhangisa swilo swa nkoka. Yi ri: “Leswi swilo leswi hinkwaswo swi nga ta n’oka, n’wina mi fanele mi va vanhu va muxaka muni hi tlhelo ra swiendlo swo kwetsima swa ku tikhoma ni swiendlo swa ku tinyiketela loku nga ni vukwembu, mi ri karhi mi rindzela ni ku hamba mi tsundzuka vukona bya siku ra Yehovha.” (2 Petro 3:10-12) Mongo wa mhaka wu kombisa leswaku “swilo leswi hinkwaswo” leswi nga ta n’oka swi katsa vafumi lava kanganyisaka ni lava va va hlawulaka ku ri ni ku hlawula Xikwembu. Swi le rivaleni leswaku ku tihlengeletela xuma a swi nge hi ponisi.

Hakunene, ku ponisiwa ka hina ku katsa ku va hi tinyiketela eka Yehovha Xikwembu ni ku dyondza hi mahanyelo ni swiendlo leswi n’wi tsakisaka. (Sofaniya 2:3) Ematshan’wini ya ku landzela ntshungu ivi hi nga vi na mhaka ni swikombiso leswi nga erivaleni swa leswaku hi hanya eminkarhini ya nkoka, hi fanele hi “tsundzuka vukona bya siku ra Yehovha.” Timbhoni ta Yehovha ti nga ku komba eBibeleni ya wena ndlela leyi u nga ponaka ha yona eka siku leri, leri taka.