LESWI ku sukela khale rito leri ra “mukaneti wa Kreste” a ri tirhisiwa eka swilo swo tala, ku nga ha va eka vanhu va le vuhosini ni le ka tifilimi, swi fanerile ku vutisa hi ku: “I vamani vakaneti va Kreste?” Xana xiga lexi xa hi khumba hi ndlela yo karhi namuntlha? Swi le rivaleni leswaku loko hi lava nhlamuselo ya xiga lexi hi fanele hi languta eBibeleni hikuva hilaha xiga lexi xi humelelaka kona minkarhi ya ntlhanu.

Muapostola Yohane hi yena ntsena mutsari wa Bibele la tirhiseke xiga lexi nge “mukaneti wa Kreste.” Xana xiga lexi u xi hlamusele njhani? Xiya marito lawa eka buku ya Yohane wo sungula: “Vana lavatsongo, i nkarhi wo hetelela, naswona, hilaha mi tweke hakona leswaku mukaneti wa Kreste wa ta, hambi sweswi ku ni vakaneti va Kreste vo tala; ku nga mhaka leyi hi kumaka eka yona vutivi bya leswaku se i nkarhi wo hetelela. Va humile eka hina, kambe a va nga ri va wona muxaka wa hina . . . Muhembi i mani loko ku nga ri loyi a landzulaka leswaku Yesu i Kreste? Yoloye i mukaneti wa Kreste, loyi a landzulaka Tatana ni N’wana.”—1 Yohane 2:18, 19, 22.

Hi dyondza yini eka marito lawa? Yohane u vulavule hi “vakaneti va Kreste vo tala,” leswi swi komba leswaku a hi munhu un’we kambe i ntlawa wa vanhu. Vanhu lava nga vakaneti va Kreste va hangalasa mavunwa, va kaneta leswaku Yesu i Kreste kumbe Mesiya va tlhela va ringeta ku onha mhaka ya leswaku Xikwembu ni N’wana wa xona Yesu Kreste va ni vuxaka lebyikulu. Vanhu volavo va tivula vayimeri va Kreste kambe leswi ‘va humeke eka hina,’ va hambukile eka leswi Bibele yi swi dyondzisaka. Ntlawa wolowo a wu ri kona loko Yohane a tsala papila rakwe hi “nkarhi wo hetelela” lowu swi nga endlekaka leswaku a ku ri ku hela ka nkarhi wa vaapostola.

I yini swin’wana leswi Yohane a swi tsaleke hi vakaneti va Kreste? Loko a vulavula hi vaprofeta va mavunwa u te: “Marito hinkwawo lama huhuteriweke lama pfumelaka leswaku Yesu Kreste u tile a ri wa nyama ma huma eka Xikwembu. Ku tlula kwalaho, lawa i marito lama huhuteriweke ya mukaneti wa Kreste lawa mi tweke leswaku ma ta, naswona sweswi se ma le misaveni.” (1 Yohane 4:2, 3) Eka papila rakwe ra vumbirhi Yohane u tlhele a vula marito lawa: “Ku humelele vaxisi vo tala emisaveni, vanhu lava nga pfumeriki leswaku Yesu Kreste u tile a ri wa nyama. Loyi i muxisi ni mukaneti wa Kreste.” (2 Yohane 7) Swi le rivaleni leswaku Yohane a a swi twisisa leswaku vakaneti va Kreste hi lava hangalasaka mavunwa hi Yesu Kreste ni tidyondzo takwe.

Khale Yohane a nga si tsala mayelana ni vaxisi lava, Yesu Kreste u tsundzuxe valandzeri vakwe a  ku: “Tivoneleni vaprofeta va mavunwa lava taka va ambale nguvu ya nyimpfu, kambe endzeni va ri timhisi leti kakatlulaka.” (Matewu 7:15) Hilaha ku fanaka muapostola Pawulo u lemukise Vakreste va le Tesalonika a ku: “Ku nga tshuki ku va ni la mi kanganyisaka hi mukhuva wo karhi, hikuva [siku ra Yehovha] a ri nge fiki ku nga si fika vugwinehi ni munhu wo kala nawu a nga si hlavuteriwa, n’wana wa ku lovisiwa.”—2 Vatesalonika 2:3.

Xisweswo, eminkarhini ya vaapostola, vaprofeta va mavunwa ni vagwinehi a va ri kona naswona a va ri hlasela vandlha ra Vukreste. Hinkwavo lava hangalasaka mavunwa ni vukanganyisi bya vukhongeri mayelana na Yesu Kreste ni tidyondzo ta yena, va katseka eka xiga lexi nge “vakaneti va Kreste.” Pawulo u hlamusele ndlela leyi Yehovha a titwaka ha yona loko a ku i “vana va ku lovisiwa.”

Xana vakaneti va Kreste va kona namuntlha? Vanhu ni minhlangano leyi nga vakaneti va Kreste, a va pfumeli eka Kreste ni tidyondzo takwe. Va hangalasa mavunwa ni vuxisi leswaku va pfilunganya vanhu va nga tivi Tatana loyi a nga Yehovha Xikwembu ni N’wana wa xona Yesu Kreste. Hi ni xivangelo lexi twalaka xa ku va hi tivonela eka vuxisi byo tano bya vukhongeri. A hi kambisiseni swikombiso swimbirhi.

Se i khale tikereke ti dyondzisa vanhu dyondzo ya Vunharhu-un’we, ti vula leswaku Tatana ni N’wana i nchumu wun’we. Vakaneti va Kreste va tumbeta ntiyiso hi Yehovha Xikwembu na Yesu Kreste. Mavunwa lawa ma endla leswaku vanhu va nga n’wi tekeleli Yesu Kreste ni ku va vanghana va Xikwembu hilaha Bibele yi va khutazaka hakona leswaku va endla tano.—1 Vakorinto 11:1; Yakobo 4:8.

Tikereke na tona ti pfilunganya vanhu hi ku tirhisa Tibibele leti nga riki na vito ra Xikwembu, ku nga Yehovha. Va endla tano hambileswi vito ra Yehovha ri humelelaka minkarhi ya kwalomu ka 7 000 eka matsalwa ya Bibele yo sungula. Sweswo swi endle leswaku vanhu va nga xi tivi Xikwembu xa ntiyiso.

Ku tiva vito ra Xikwembu ku nga Yehovha, swi pfune vanhu vo tala leswaku va va vanghana va xona. Richard i un’wana wa lava pfunekeke, loko a tsundzuka ndlela leyi Timbhoni ta Yehovha timbirhi a ti n’wi dyondzisa ha yona. U ri: “Va ndzi kombe vito ra Xikwembu xa ntiyiso eBibeleni, ku nga Yehovha. Ku tiva leswaku Xikwembu xi ni vito swi ndzi tsakise ngopfu hikuva a ndzi nga swi tivi.” Ku sukela hi nkarhi wolowo, u cince mahanyelo ya yena, a hanya hi milawu ya Bibele leswaku a ta tsakisa Yehovha. U tlhele a ku: “Ku tiva vito ra Xikwembu swi ndzi pfunile leswaku ndzi va munghana wa xona.”

Se i khale vakaneti va Kreste va endla leswaku vanhu vo tala va va emunyameni, va nga xi tivi Xikwembu. Kambe ku dyondza Rito ra Xikwembu Bibele, swi endla leswaku hi tiva vakaneti va Kreste hi tlhela hi balekela mavunwa ni vuxisi bya vukhongeri bya vona.—Yohane 17:17.