“XANA ndzi dyohe yini? Ha yini Xikwembu xi ndzi lahlele mavoko? Sweswo i swivutiso leswi pfilunganyeke Sidnei wa malembe ya 24 wa le Brazil. Endzhaku ko humeleriwa hi mhangu loko a ri endhawini ya mintlango yo tshwiririkela ematini, u lamarile a nga ha koti ku famba.

Ku xaniseka loku vangiwaka hi timhangu, vuvabyi, ku feriwa, timhangu ta ntumbuluko kumbe tinyimpi, swi nga endla leswaku vanhu va nga ha xi tshembi Xikwembu. Leswi swi tolovelekile. Yobo wa le minkarhini ya khale, u humeleriwe hi makhombo hi ku landzelelana. Hi xihoxo u sole Xikwembu a ku: ‘Ndzi kombele mpfuno eka wena, kambe a wu ndzi hlamuli; ndzi yimile, leswaku u ta rhiya ndleve ya wena eka mina. U tihundzule leswaku u va ni tihanyi eka mina; hi voko ra wena ra matimba u ni vulala eka mina.’—Yobo 30:20, 21.

Kambe Yobo a a nga swi tivi leswaku i mani muvangi wa makhombo ya yena ni leswaku ha yini ma n’wi humelela. Lexi tsakisaka hileswaku Bibele ya hi pfuna hi twisisa leswaku ha yini hi weriwa hi makhombo ni leswi hi faneleke hi swi endla loko ma humelela.

Loko Bibele yi vulavula hi Xikwembu yi ri: “Ntirho wakwe wu hetisekile, hikuva tindlela takwe hinkwato i vululami. Xikwembu xa vutshembeki, lexi nga riki na vuhomboloki; xi ni vululami naswona xi hava xisandzu.” (Deteronoma 32:4) Hikwalaho, xana swa twala leswaku Xikwembu xa ‘vululami lexi nga riki ni xisandzu’ xi xanisa vanhu kumbe xi tirhisa makhombo leswaku xi va xupula kumbe ku va ringa?

Ku hambana ni sweswo Bibele yi ri: “Loko a ri endzingweni, munhu a nga vuli a ku: ‘Ndzi ringiwa hi Xikwembu.’ Hikuva Xikwembu xi nga ka xi nga ringiwi hi swilo swo biha naswona xona a xi ringi munhu.” (Yakobo 1:13) Entiyisweni Bibele yi hi dyondzisa leswaku Xikwembu xi vumbe vanhu vo sungula va hetisekile. Xi nyike vanhu vo sungula Adamu na Evha kaya ro saseka, leri nga ni hinkwaswo leswi a va swi lava ni ntirho lowu a va fanele va wu endla. Xikwembu xi va byele xi ku: “Tswalanani mi andza, mi tata misava, mi yi fuma.” A xi kona lexi a xi ta endla leswaku Adamu na Evha va nga xi tshembi Xikwembu.—Genesa 1:28.

Kambe namuntlha vutomi bya tika. Vanhu va kayakaya swinene. Hi yona mhaka Bibele yi nge: “Ntumbuluko hinkwawo wu hambeta wu konya ni ku vaviseka swin’we ku ta fika sweswi.” (Varhoma 8:22) Xana swi onhake kwihi?

Ku va hi twisisa leswaku ha yini hi xaniseka, hi fanele hi tsundzuka nkarhi lowu ku xaniseka ku sunguleke ha wona. Hi ku xisiwa hi ntsumi leyi xandzukeke leyi vuriwaka Sathana Diyavulosi, Adamu na Evha va fularhele nawu wa Xikwembu emhakeni ya leswinene ni leswo biha, hi ku honisa xileriso xa Xikwembu xa leswaku va nga dyi “murhi wa ku tiva leswinene ni leswo biha.” Diyavulosi u byele Evha leswaku loko va nga xi yingisi Xikwembu a va nge fi, hi ndlela yoleyo a a vula leswaku Xikwembu xa hemba. Sathana u tlhele a vula leswaku Xikwembu xi va tsona lunghelo ra ku tihlawulela leswinene ni leswo biha. (Genesa 2:17; 3:1-6) A a vula leswaku vanhu a va ta tihanyela kahle loko a va nga ri ehansi ka Xikwembu. Sweswo hinkwaswo swi endle leswaku ku va ni xivutiso lexi nge—Xana Xikwembu a xi faneleka ku fuma?

Diyavulosi u tlhele a pfuxa mhaka yin’wana. U hehle vanhu hi ku vula leswaku va tirhela Xikwembu hi ku lava swo karhi. Loko Diyavulosi a vulavula hi Yobo wo tshembeka eka Xikwembu u te: “Xana wena a wu vekanga rihlampfu ku n’wi sirhelela ni ku sirhelela yindlu yakwe ni hinkwaswo leswi a nga na swona matlhelo hinkwawo? . . . Kambe, ndzi kombela leswaku u cinca u tshambuluta voko ra wena, u khumba hinkwaswo leswi a nga na swona kutani u vona loko a nga ta ka a nga ku rhukani exikandzeni.” (Yobo 1:10, 11) Hambileswi marito ya Sathana a ma kongomisiwe eka Yobo, xikongomelo xa wona hi leswaku vanhu hinkwavo va gandzela Xikwembu leswaku va kuma swo karhi.

Xana a yi ta va yihi ndlela leyinene ya ku lulamisa timhaka leti hinkwato? Xikwembu lexi nga ni vutlhari hinkwabyo, xi te ni ndlela leyinene leyi tshembekaka ya ku lulamisa swilo. (Varhoma 11:33) Xi pfumelele vanhu ku tilawula ku ringana nkarhi wo karhi naswona sweswo a  swi ta kombisa leswaku kahlekahle i mani loyi a nga ni mfanelo ya ku fuma.

Swiyimo swo tika leswi nga kona namuntlha laha misaveni, swi swi kombisa kahle leswaku mimfumo ya vanhu yi tsandzekile. Vafumi va tsandzekile ku tisa ku rhula, nsirhelelo ni ntsako, ematshan’wini ya sweswo va onha misava. Leswi Bibele yi swi vulaka i ntiyiso loko yi ku: “Munhu loyi a fambaka a nga ka a nga wu kongomisi nkondzo wa yena.” (Yeremiya 10:23) I Mfumo wa Xikwembu ntsena lowu nga ta tisa ku rhula, ntsako ni vutomi lebyinene evanhwini hikuva lexi i xikongomelo xa Xikwembu.—Esaya 45:18.

Xikwembu xi ta xi hetisisa njhani xikongomelo xa xona hi vanhu? Tsundzuka leswaku Yesu u dyondzise valandzeri vakwe ku khongela va ku: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:10) Hi nkarhi lowu faneleke, Xikwembu xi ta tirhisa Mfumo wa xona leswaku xi herisa ku xaniseka hinkwako. (Daniyele 2:44) Vusweti, mavabyi ni rifu swi ta hela. Kasi loko ku ri swisiwana, Bibele yi vula leswaku Xikwembu xi ta ‘kutsula swisiwana leswi kombelaka ku pfuniwa.’ (Pisalema 72:12-14) Eka vavabyi Bibele yi tshembisa yi ku: “Ku hava munhu la tshamaka kona la nga ta ku: ‘Ndza vabya.’” (Esaya 33:24) Hambi ku ri eka vafi lava nga emianakanyweni ya Xikwembu, Yesu u te: “Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena kutani va huma.” (Yohane 5:28, 29) Mawaku switshembiso swonghasi!

Endzhaku ka malembe ya kwalomu ka 17 a lamarile, Sidnei loyi ku vulavuriweke ha yena eku sunguleni ka xihloko lexi, u ri: “A ndzi swi tiva leswaku mhangu leyi yi nga ndzi humelela a yi vangiwanga hi Xikwembu, kambe a ndzi anakanya leswaku xi ndzi lahlele mavoko. Minkarhi yin’wana ndzi va ni gome ndzi tlhela ndzi rila loko ndzi ehleketa hi ku lamala ka mina. Kambe, Bibele yi ndzi pfunile ndzi twisisa leswaku ku lamala ka mina a hi nxupulo lowu humaka eka Xikwembu. Bibele yi vula leswaku ‘nkarhi ni xiendlakalo lexi nga languteriwangiki swa hi wela hinkwerhu.’ Ku khongela eka Yehovha ni ku hlaya matsalwa yo karhi, swi endla leswaku ndzi tshama ndzi ri ni vuxaka ni Xikwembu ni ku ndzi tiyisa swinene.”—Eklesiasta 9:11; Pisalema 145:18; 2 Vakorinto 4:8, 9, 16.

Loko hi tshama hi tsundzuka leswaku ha yini Xikwembu xi pfumelela ku xaniseka ni leswaku ku ta hela ku nga ri khale, swa hi pfuna leswaku hi tshama hi ri karhi hi tshemba Xikwembu. Ha tiyiseka leswaku Xikwembu i “muhakeri wa lava va xi lavaka hi mbilu hinkwayo.” Hinkwavo lava tshembaka Xikwembu ni N’wana wa xona a va nge khomisiwi tingana.—Vaheveru 11:6; Varhoma 10:11.