Ndzi velekiwe eAcul, ku nga xidorobana lexi kumekaka evupeladyambu bya Guatemala. Ndyangu wa ka hina i wa rixaka ra Maixil lava tumbulukeke eka Vamaya. Ndzi kule ndzi vulavula ririmi ra rixaka rerhu ni Xipaniya. Evutsongwanini bya mina a ku ri ni nyimpi ya xin’wana manana leyi heteke malembe ya 36 eGuatemala. Enkarhini wolowo ku fe vanhu vo tala va Maixil.

Loko ndzi ri ni malembe ya mune, buti wa mina loyi a a ri ni malembe ya nkombo, u bulukeriwe hi bomo leyi a a yi tlangisa. Khombo ra kona yi n’wi dlayile kasi mina yi ndzi siye ndzi fe mahlo. Endzhaku ka sweswo, ndzi kulele exikolweni xa vana lava feke mahlo eDorobeni ra Guatemala, laha ndzi dyondzeke ku hlaya Braille. A ndzi nga pfumeleriwi ku bula ni van’wana, swichudeni kulorhi a swi ndzi nyenya naswona xivangelo xa kona a ndzi xi tivi. Leswi a ndzi ri ni xivundza, a ndzi ti langutela hi mahlongati tin’hweti timbirhi hi lembe, leti a ndzi ti heta ekaya na manana hikuva a a ndzi chavelela ni ku va ni musa. Kambe lexi twisaka ku vava, hi leswaku manana u file loko ndzi ri ni malembe ya khume. Ku feriwa hi munhu loyi ku nga yena ntsena a a ndzi rhandza, swi ndzi tshove mbilu.

Loko ndzi ri ni malembe ya 11, ndzi tlhelele eDorobeni ra ka hina ndzi ya tshama ni buti wa mina loyi hi nga va makwavo hi tatana swin’we ni ndyangu wakwe. A va ndzi khathalela, kambe a ku nga ri na loyi a ndzi ta rilela eka yena. Minkarhi yin’wana a ndzi rilela Xikwembu ndzi ku: “Ha yini manana a file? Hikwalaho ka yini ndzi fe mahlo?” Vanhu va ndzi byele leswaku makhombo lawa hinkwawo i ku rhandza ka Xikwembu. Ndzi tibyele leswaku Xikwembu a xi na ntwelavusiwana. A ndzi lava ku tisunga kambe ndzi tsandzekile hileswi a ku nga ri na loyi a a ta ndzi pfuna.

Ku fa mahlo swi ndzi siye ndzi titwa ndzi nga sirhelelekangi. Loko ndza ha ri ntsongo ndzi xanisiwe ko talanyana hi timhaka ta masangu. A ndzi byi vikanga vugevenga byebyo hi ku anakanya leswaku vanhu a va na mhaka na mina. A ndzi nga tali ku vulavula ni vanhu kasi na vona a va nga ndzi tekeli enhlokweni. A ndzi tshikilelekile naswona a ndzi nga swi rhandzi ku tshama ni vanhu hileswi a ndzi nga va tshembi.

Loko ndza ha ri muntshwa, vatekani van’wana va Timbhoni ta Yehovha va tile eka mina hi nkarhi wo wisa exikolweni. Va komberiwe hi un’wana wa vadyondzisi va mina, loyi a a ndzi twela vusiwana. Va ndzi byele hi ntshembo wa ku pfuxiwa ka vafi lowu nga eBibeleni ni  leswaku mahlo ya lava nga voniki ma ta pfuriwa. (Esaya 35:5; Yohane 5:28, 29) Swi ndzi tsakisile leswi va ndzi dyondziseke swona kambe a swi ndzi tikela ku burisana na vona hikuva a ndzi nga swi tolovelanga ku vulavula ni vanhu. Hambileswi a ndzi nga swi tsakeli ku vulavula na vona, hi musa ni ku lehisa mbilu a va tshikanga ku ndzi endzela va ta bula na mina hi Bibele. Vatekani lava, a va famba mpfhuka lowu tlulaka tikhilomitara ta khume, va tsemakanya ni ntshava leswaku va fika edorobeni ra ka hina.

Loko buti a ndzi hlamusela leswaku i vanhu va njhani, a a tala ku vula leswaku i vanhu lava ambalaka kahle kambe a hi swifumi. Hambiswiritano, a va ndzi tsakela naswona a va ndzi tisela tinyiko. Sweswo swi endle ndzi swi xiya leswaku i Vakreste va ntiyiso ntsena lava nga endlaka tano.

Ndzi dyondze Bibele hi ku pfuniwa hi minkandziyiso ya Braille. A ndzi swi twisisa leswi a ndzi swi dyondza kambe swin’wana a swi ndzi tikela ku swi amukela. Hi xikombiso, a swi ndzi tikela ku pfumela leswaku Xikwembu xa ndzi rhandza, ni leswaku vanhu va nga kota ku ndzi komba rirhandzu rolero. A ndzi swi twisisa leswaku ha yini Yehovha a pfumelela ku xaniseka, kambe a swa ha ndzi tikela ku n’wi teka tanihi Tatana la nga ni rirhandzu. *

Hakatsongotsongo, leswi ndzi swi dyondzeke eMatsalweni swi ndzi pfunile ku cinca mianakanyo ya mina emhakeni leyi. Hi xikombiso, ndzi dyondze leswaku Xikwembu xi twa ku vava loko vanhu va xaniseka. Loko Xikwembu xi vulavula hi vagandzeri va xona lava a va khomiwa hi ndlela yo biha, xi te: “Entiyisweni ndzi vone ku xaniseka ka vanhu va mina . .  . Ndza ku tiva swinene ku vava loku va ku twaka.” (Eksoda 3:7) Loko ndzi ya ndzi twisisa timfanelo ta Yehovha, ndzi nyiketele vutomi bya mina eka yena. Ndzi khuvuriwe hi 1998 kutani ndzi va Mbhoni ya Yehovha.

Endzhakunyana ka loko ndzi khuvuriwile, ndzi ye eka xikolo xa lava feke mahlo ekusuhi ni doroba ra Escuintla. Nkulu un’wana evandlheni ra kwalaho u twe hi swiphiqo leswi ndzi langutanaka na swona loko ndzi fanele ndzi ya eminhlanganweni edorobeni ra ka hina. Phela vandlha ra le kusuhi a ri ri etlhelo lerin’wana ra ntshava leyi vatekani lava a ndzi dyondza na vona Bibele a va hundza eka yona, kutani a swi ndzi tikela swinene ku famba riendzo rero. Kutani nkulu loyi u ndzi hlanganise ni ndyangu wun’wana wa Timbhoni ta Yehovha eEscuintla, lowu ndzi pfuneke leswaku ndzi kota ku va kona eminhlanganweni ya Vukreste. Ninamuntlha va ha ndzi khathalela ku fana ni n’wana wa vona.

Loko ndzo lava ku hlamusela hinkwaswo swiendlo leswinene swa rirhandzu leswi vamakwerhu va ndzi endleleke swona, ri nga tlhava ri kala ri ya pela. Hinkwaswo leswi swi endla ndzi swi vona leswaku ndzi le xikarhi ka Vakreste va ntiyiso.—Yohane 13:34, 35.

Sweswi a ndza ha titwi ndzi ri xikangalafula ni ku kala ntshembo. Vutomi bya mina se byi ni xikongomelo. Ndzi tshama ndzi khomekile hi ku dyondzisa vanhu Bibele, ematshan’weni yo tshamela ku anakanya hi ku va ndzi fe mahlo. Ndzi ni lunghelo ra ku va nkulu wa vandlha ni ku nyikela tinkulumo leti sekeriweke eBibeleni eka mavandlha ya le kusuhi. Ndzi tlhele ndzi va ni nkateko wo nyikela tinkulumo etinhlengeletanweni ta xifundzha laha a ku hlangane vanhu va magidi.

Hi 2010, ndzi thwase eka Xikolo xa Ndzetelo wa Vutirheli (lexi sweswi xi vuriwaka Xikolo xa Vachumayeri va Mfumo) lexi khomeriweke aEl Salvador. Xikolo lexi xi ndzi pfune leswaku ndzi kota ku dyondzisa kahle evandlheni. Endzhaku ko dyondzisiwa exikolweni lexi, ndzi titwe ndzi ri wa nkoka swinene eka Yehovha Xikwembu, hikuva u kota ku dyondzisa munhu un’wana ni un’wana ku endla ntirho wakwe.

Yesu u te: “Ku nyika swi tisa ntsako lowukulu ku tlula ku amukela.” (Mintirho 20:35) Namuntlha ndzi nga vula leswaku ndzi tsakile hakunene, hambileswi enkarhini lowu hundzeke a ndzi nga anakanyi leswaku sweswo swi nga koteka, sweswi na mina se ndza swi kota ku pfuna van’wana.