Nhlangano wa Matiko wu vula leswaku vanhu va fanele va va ni vun’we “emisaveni hinkwayo.” Nhlangano lowu wu lava leswaku vanhu va va ni vun’we, va xixima timfanelo ta vanhu ni ku sirhelela misava. Hikwalaho ka yini? Maher Nasser loko a vulavula eka UN Chronicle u vule leswaku misava yi tele hi “vukungundzwana, maxelo yo biha, ku hambana loku nga kona exikarhi ka swisiwana ni swigwili, madzolonga, ku rhurhisiwa ka vanhu, vutherorisi ni mavabyi lama tlulelaka ni swin’wana.”

Van’wana a va anakanya leswaku swi nga antswa loko ko kumiwa mfumo lowu nga ta fuma misava hinkwayo. Va katsa Dante wa le Italy, loyi a ri mutivi wa filosofi, mutlhokovetseri tlhelo n’watipolitiki (u velekiwe hi 1265 a fa hi 1321) na Albert Einstein loyi a ri mutivi wa sayense (u velekiwe hi 1879 a fa hi 1955). Dante u vule leswaku misava a yi nge vi ni ku rhula loko ku ri ni mimfumo yo tala leyi avaneke. U tshahe marito ya Yesu Kreste lama nge, “Mfumo wun’wana ni wun’wana lowu avaneke hi vuwona wa wa.”—Luka 11:17.

Endzhaku ka Nyimpi ya Vumbirhi ya Misava, laha ku tirhisiweke tibomo timbirhi ta atom, Albert Einstein, u tsalele Swirho Hinkwaswo swa Nhlangano wa Matiko papila. U te: “Nhlangano wa Matiko wu fanele wu ba mhunti ya ha ri ni mahika, hi ku veka mfumo lowu nga ta endla leswaku misava hinkwayo yi sirheleleka.”

Kambe, xana van’watipolitiki lava nga ta vumba mfumo wolowo a va nge vi ni vukungundzwana, va tsandzeka ku hetisisa leswi va swi tshembiseke ni ku tshikilela van’wana? Kumbe va ta fana ni vafumi lava van’wana vo homboloka lava nga kona namuntlha? Swivutiso leswi swi hi tsundzuxa marito lama vuriweke hi Nkulukumba Acton, n’wamatimu wa le Britain loyi a nga te: “Vulawuri byi tikomba byi onha naswona vulawuri lebyi nga riki na swipimelo bya onha swinene.”

Nilokoswiritano, leswaku vanhu va tiphina hi ku rhula ka xiviri, hi fanele hi va ni vun’we. Kambe hi nga swi endlisa ku yini sweswo? Xana swi nga koteka? Bibele yi vula leswaku swa koteka. Entiyisweni swi nga koteka. Njhani? Mfumo lowu nga ta rhangela a wu nge vi ni van’watipolitiki lava nga ni vukungundzwana. I mfumo lowu nga ta fuma hi Xikwembu. Ku engetela kwalaho, mfumo wolowo wu ta swi veka erivaleni leswaku Xikwembu hi xona xi faneleke xi fuma misava. I yini mfumo wolowo? Bibele yi wu vitana “Mfumo wa Xikwembu.”—Luka 4:43.

Yesu Kreste a anakanya hi Mfumo wa Xikwembu loko a vula leswi eka xikhongelo xa Hosi: “Mfumo wa wena a wu te. Ku rhandza ka wena a ku endleke . . . emisaveni.” (Matewu 6:9, 10) Mfumo wa Xikwembu wu ta endla leswaku ku rhandza ka Xikwembu ku endleka emisaveni, ku nga ri ku rhandza ka lava kwetlembetanaka hi ku fuma kumbe vanhu lava nga ni vutianakanyi.

Mfumo wa Xikwembu wu tlhela wu vuriwa “Mfumo wa matilo.” (Matewu 5:3) Hikwalaho ka yini? Hikuva wu ta fuma misava hinkwayo wu ri etilweni. Leswi swi vula yini? Swi vula leswaku mfumo lowu, lowu nga ta fuma misava hinkwayo, a wu nge hi koxi mali kumbe swa le mandleni ku fana ni mimfumo ya misava. Hi nkarhi wolowo vanhu hinkwavo va ta ku hefu!

Hilaha rito leri nge “mfumo” ri kombisaka hakona, Mfumo wa Xikwembu i wa xiviri. Hosi ya wona i Yesu  Kreste loyi a nyikiweke hi Xikwembu matimba yo fuma. Bibele yi vula leswi hi Yesu:

• “Ku fuma ka vuhosana ku ta va ekatleni ra yena . . . Ku fuma ka vuhosana ni ku rhula a swi nge vi na makumu.”—Esaya 9:6, 7.

• “A nyikiwa ku fuma ni xindzhuti ni mfumo, leswaku vanhu, vanhu va matiko ni tindzimi hinkwato va n’wi tirhela. Ku fuma ka yena [a ku nge] hundzi.”—Daniyele 7:14.

• “Mfumo wa misava se i mfumo wa Hosi ya hina [Xikwembu] ni wa Kreste.”—Nhlavutelo 11:15.

Leswaku ku hetiseka xikhongelo xa Hosi lexi vuriweke hi Yesu, Mfumo wa Xikwembu wu ta endla ku rhandza ka Xikwembu emisaveni. Vanhu hinkwavo lava nga ta fumiwa hi wona va ta dyondza ku khathalela misava leswaku yi va ndhawu leyinene yo hanya eka yona.

Ku tlula kwalaho, Mfumo wa Xikwembu wu ta dyondzisa vanhu milawu ya xona. Hinkwavo va ta dyondzisiwa milawu leyi fanaka. A ku nge vi na ku avana. Esaya 11:9 yi ri: “A va nge endli swo biha kumbe ku onha . . . hikuva kunene misava yi ta tala hi ku tiva Yehovha kukota mati lama funengetaka lwandle.”

Vanhu emisaveni hinkwayo va ta va ni ku rhula ni vun’we ku nga leswi Nhlangano wa Matiko a wu swi navela. Pisalema 37:11 yi ri: “Hakunene va ta kuma ntsako lowu heleleke eku rhuleni lokukulu.” Hi nkarhi wolowo marito yo fana ni “vugevenga,” “ku thyakisiwa ka mbango,” “vusweti,” ni “nyimpi” a ma nge he tirhisiwi. Kambe leswi swi ta endleka rini? Xana Mfumo wa Xikwembu wu ta sungula rini ku fuma? Wu ta fuma njhani? Naswona u nga vuyeriwa njhani eka wona? A hi xiyeni.