Dyondzo leyi humaka eBibeleni yi ni matimba yo hundzula vutomi bya vanhu. Xiya swikombiso swimbirhi: Ricardo na Andres.

RICARDO: Loko ndzi ri ni malembe ya 15, ndzi joyine ntlawa wa tinsulavoya. Vanghana va mina lavantshwa a va ndzi kucetela ku endla swilo swo biha. Ndzi tivekele pakani ya ku tshama ejele malembe ya khume. Sweswo swi nga ha twala ku ri vuphukuphuku. Laha a ndzi tshama kona, vanhu lava tshameke malembe yo tala ejele a va naveriwa va tlhela va xiximiwa. Kutani a ndzi lava ku fana na vona.

Ndzi endle hinkwaswo leswi endliwaka hi tinsulavoya, a ndzi dzaha tidrugs, a ndzi rhandza ku endla timhaka ta masangu naswona a ndzi ri ni madzolonga. Madyambu man’wana hi sungule ku duvulana ni tinsulavoya tin’wana. A ndzi ehleketa leswaku ndzi ta dlayiwa kambe ndzi dye hansi, ndzi nga vavisekanga. Ku sukela siku rero ndzi sungule ku dya marhambu ya nhloko, ndzi anakanya hi vutomi bya mina ni tipakani ta mina kutani ndzi endle xiboho xo cinca. A ndzi ta swi endla njhani? I yini lexi a xi ta ndzi pfuna?

Maxaka ya mina yo tala a ma nga tsakanga. A ma ri ni swiphiqo swo tala. Kambe a swi nga ri tano hi ndyangu wa malume. A ndzi swi tiva leswaku va ni mahanyelo lamanene naswona va tirhisa misinya ya milawu ya Bibele. Va tshame va ndzi dyondzisa leswaku vito ra Xikwembu i Yehovha. Kutani endzhaku ka loko ku ve ni ku duvulana, ndzi khongele eka Yehovha, ndzi n’wi vitana hi vito ra yena ni ku n’wi kombela leswaku a ndzi pfuna. Lexi ndzi hlamariseke, hi xa mundzuku xa kona ndzi endzeriwe hi Timbhoni ta Yehovha! Hi sungule ku dyondza Bibele.

Swi nga si ya kwihi, ndzi tikume ndzi khome nyarhi hi timhondzo. Vanghana va mina va khale a va ndzi fonela, va ndzi rhamba leswaku ndzi ya dzumba na vona. Hambileswi a swi nga olovi, ndzi arile. A ndzi tiyimisele ku ya emahlweni ndzi dyondza Bibele naswona ndza tsaka hi leswi ndzi tekeke xiboho xexo! Vutomi bya mina byi cince swinene naswona ndzi ve ni ntsako wa xiviri.

Ndzi tsundzuka ndzi byela Xikwembu hi xikhongelo leswaku ndzi tshame ndzi navela ku tshama malembe ya khume ejele, leswaku ndzi ta xiximiwa tanihi un’wana wa tinsulavoya. Kutani ndzi xi kombele leswaku xi ndzi pfuna ndzi tirha malembe ya khume tanihi muchumayeri wa nkarhi hinkwawo, hi xikongomelo xo pfuna van’wana hilaha na mina ndzi pfuniweke hakona. Xikwembu xi hlamule xikhongelo xa mina hikuva ndzi ni malembe ya 17 ndzi ri muchumayeri wa nkarhi hinkwawo! Naswona nyangwa wa jele a ndzi wu tivanga.

Vanghana va mina va khale, va gweviwe ku tshama malembe yo tala ejele. Van’wana se va funye buwa. Ndzi khensa maxaka ya mina ya Timbhoni. A va tiyimisele ku hanya  hi ndlela leyi hambaneke ni ya van’wana, va kongomisiwa hi Bibele. A ndzi va xixima ku tlula ni ntlawa wa tinsulavoya. Ku engetela kwalaho, ndza xi khensa Xikwembu ku va xi ndzi pfune leswaku ndzi cinca vutomi.

ANDRES: Ndzi velekiwe endhawini leyi a ku ri ni vusweti laha tidrugs, ku yiva, ku dlaya ni vunghwavava a ku ri tshamela maxelo. Papa a ri xilovekelo naswona a godzomberiwe hi ku dzaha khokheyini. Mama na papa a va hanya bya kondlo ni ximanga, a va fumbutelana ni ku tlhela va nyiketana hi marito.

Ndzi sungule ku va xilovekelo ni ku dzaha tidrugs ndza ha ri ntsongo. A ndzi heta nkarhi wo tala ndzi ri eswitarateni, ndzi yiva ni ku xavisa leswi ndzi swi yiveke. Loko se ndzi kurile, papa u ringete ku tiendla munghana wa mina hi ku ndzi dyondzisa swilo swo huma endleleni, u ndzi dyondzise ku xavisa tidrugs ni ku xavisa swilo leswi a swi nga ri enawini etikweni. Mali a ndzo nusa kunene. Kutani siku rin’wana maphorisa ma te ekaya, va ndzi khomile va ndzi gweva malembe ya ntlhanu hikwalaho ka leswi a ndzi lava ku dlaya munhu.

Siku rin’wana nimixo ku endliwe xitiviso eka xikurisamarito xa le jele, ku tivisiwa leswaku swivochwa swi rhambiwa eka dyondzo ya Bibele leyi a yi khomiwa hi Timbhoni ta Yehovha. Na mina ndzi yile. Leswi a swi dyondzisiwa kwalaho a swi twisiseka kutani ndzi sungule ku dyondza Bibele na Timbhoni. Ti swi andlale erivaleni leswi Matsalwa ma swi dyondzisaka, ti tlhela ti ndzi dyondzisa mahanyelo lamanene lama tsakisaka Xikwembu.

Ndzi swi xiyile leswaku a ndzi nga ta swi kota ku endla ku cinca handle ko pfuniwa, ngopfungopfu hi leswi a ndzi karhatiwa hi swivochwakulorhi leswi a swi nga swi tsakeli leswi a ndzi swi endla. Kutani ndzi khongele eka Yehovha leswaku a ndzi nyika matimba ni vutlhari naswona u ndzi pfunile. Ematshan’weni yo khomiwa hi rhumbyana, ndzi ve ni xivindzi xo dyondzisa swivochwa swin’wana Bibele.

Loko va ndzi tshunxa, a ndzi khomiwe hi rhumbyana, a ndzi navela onge ndzi ngo tshama ejele! Loko ndzi huma, swivochwa swin’wana swi ndzi lerile. Swin’wana a swi ku, “U famba kahle mufundhisi.”

Swa ndzi chavisa loko ndzi anakanya leswaku vutomi bya mina a byi ta va byi ri njhani loko a ndzi nga pfumelelanga Xikwembu xi ndzi dyondzisa. Ndza tsaka leswi Xikwembu xi ndzi kombiseke rirhandzu ematshan’wini yo ndzi teka ndzi ri xikangalafula. a