“Vavanuna va fanele ku rhandza vasati va vona ku fana ni mimiri ya vona. Wanuna loyi a rhandzaka nsati wakwe wa tirhandza, hikuva a nga kona munhu loyi a tshameke a venga miri wakwe, kambe wa wu wundla ni ku wu hlayisa.”—VAEFESA 5:28, 29.

Wanuna i nhloko ya ndyangu. (Vaefesa 5:23) Kambe wanuna lonene a nga na tihanyi kumbe a lava leswaku nsati wakwe a endla hinkwaswo leswi a n’wi byelaka swona. U teka nsati wakwe a ri wa nkoka naswona u swi khathalela kahle swilaveko swakwe ni mintlhaveko yakwe. U tlhela a ringeta hi matimba ku n’wi endla a tsaka, a nga n’wi sindzisi ku endla leswi a swi lavaka. (Vafilipiya 2:4) U n’wi byela ndlela leyi a titwaka ha yona, leswi a swi ehleketaka naswona wa swi yingisa leswi nsati wakwe a swi vulaka. A nga n’wi “hlundzukeli ku tlula mpimo” kumbe a n’wi ba kumbe a n’wi tlhava hi marito.—Vakolosa 3:19.

“Wansati u fanele a va ni xichavo xo enta eka nuna wakwe.”—VAEFESA 5:33.

Loko wansati a xixima nuna wakwe a tlhela a seketela swiboho swakwe, u endla leswaku ku va ni ku rhula endyangwini. Loko nuna wakwe a endla xihoxo, a nga n’wi chichi xindzhuti, kambe u va la rhuleke a tlhela a n’wi xixima. (1 Petro 3:4) Loko a lava ku vulavula na yena hi xiphiqo xo karhi, u hlawula nkarhi lowunene wo endla tano ivi a vulavula na yena hi ndlela ya xichavo.—Eklesiasta 3:7.

“Wanuna u ta . . . namarhela nsati wakwe naswona va ta va nyama yin’we.”—GENESA 2:24.

Loko wanuna ni wansati va tekana, va va ni vuxaka lebyikulu. Kutani vatekani va fanele va tirha hi matimba leswaku vukati bya vona byi tshama byi tiyile hi ku tshama va ri karhi va vulavurisana swi huma embilwini ni ku endlelana swilo leswinene. Nakambe va fanele va tshembeka hi ku nga endli swa masangu ni munhu loyi va nga tekanangiki na yena. Loyi a nga tshembekiki eka loyi a tekaneke na yena u n’wi twisa ku vava swinene. U endla leswaku a nga ha n’wi tshembi naswona swi nga dlaya ndyangu.—Vaheveru 13:4.

“Letela n’wana endleleni leyi a faneleke a famba ha yona; hambiloko a kurile a nge yi tshiki.”—SWIVURISO 22:6, nhlamuselo ya le hansi.

Xikwembu xi nyike vatswari vutihlamuleri byo letela vana va vona. Sweswo swi katsa ku va dyondzisa ndlela leyi va faneleke va hanya ha yona ni ku  tlhela va va vekela xikombiso lexinene. (Deteronoma 6:6, 7) Loko n’wana a nga yingisi, mutswari la tlhariheke a nga hatli a hlundzuka. U ‘hatla ku yingisa, a hlwela ku vulavula, a hlwela ku hlundzuka.’ (Yakobo 1:19) Loko mutswari a lava ku tshinya n’wana wakwe, u fanele a endla tano hi ndlela ya rirhandzu, a nga hlundzukanga.

“Vana, yingisani vatswari va n’wina . . . ‘Xixima tata wa wena ni mana wa wena.’” —VAEFESA 6:1, 2.

Vana va fanele va yingisa vatswari va vona va tlhela va va xixima. Loko vana va xixima vatswari va vona, va ta endla leswaku ku va ni ntsako ni ku rhula endyangwini. Vana lava kuleke va xixima vatswari va vona hi ku tiyiseka leswaku va khathaleriwa kahle. Sweswo swi nga ha katsa ku va pfuna leswaku kaya ra vona ri tshama ri ri exiyin’weni lexinene kumbe hi ku va pfuna hi swa timali.—1 Timotiya 5:3, 4.