MHAKA YA DAMI

Eku sunguleni papa a pandziwa hi nhloko ntsena. Kambe loko yi ya yi nyanya ku pandza, mama u fonele ambulense. Ndza ha tsundzuka loko va xilamulelamhangu va n’wi teka. A ndzi nga swi tivi leswaku a ku ri ro hetelela ndzi n’wi vona. Endzhaku ka masiku manharhu, papa u dlayiwe hi vuvabyi bya ku pfimba ka misiha ya byongo. A ndzo va ni malembe ya tsevu ntsena.

Ku ringana malembe yo tala a ndzi titwa nandzu hikwalaho ka rifu ra papa. A ndzi tshamela ku swi vona hi mahlo ya mianakanyo loko va xilamulelamhangu va n’wi teka naswona a ndzi tivutisa leswaku ha yini ndzi yimile ndzi nga endlanga nchumu. A ndzi languta vanhu lava dyuhaleke lava vabyaka kutani ndzi tivutisa ndzi ku, ‘Ha yini papa a file kambe vona va ha hanya?’ Hi ku famba ka nkarhi, mama u ndzi pfunile leswaku ndzi n’wi byela ndlela leyi ndzi titwaka ha yona. Nakambe leswi hi nga Timbhoni ta Yehovha, vandlha ri hi seketerile swinene.

Vanhu van’wana va anakanya leswaku loko u feriwa hi munhu loyi u n’wi rhandzaka u to rila swi helela kwalaho kutani u ya emahlweni ni vutomi, kambe a swi vanga tano eka mina. Mina ndzi sungule ku twa ku vava loko se ndzi ri muntshwa.

Vantshwa lava feriweke hi vatswari ndzi va khutaza hi marito lawa: “Byela munhu loyi u n’wi tshembaka ndlela leyi u titwaka ha yona. U nga kuma leswaku loko u hatla u tiphofula u ta hatla u hlakarhela.”

I ntiyiso leswaku swa tika ku endla swilo swin’wana hileswi papa a feke. Kambe ndzi chaveleriwa hi tsalwa ra Nhlavutelo 21:4, leri vulaka leswaku ku nga ri khale Xikwembu “xi ta sula mihloti hinkwayo ematihlweni ya [hina], rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”

MHAKA YA DERRICK

Swin’wana swa leswi ndzi swi tsundzukaka ndzi swi endla na papa hi loko hi phasa tihlampfi ni loko hi etlela etintshaveni. A a rhandza tintshava.

Se a swi ri ni nkarhinyana papa a ri ni vuvabyi bya mbilu naswona ndzi tsundzuka ndzi n’wi endzela exibedlhele kan’we kumbe kambirhi ndza ha ri ntsongo. Kambe a ndzi nga swi twisisi leswaku vuvabyi byakwe a byi ri ni khombo ku fikela kwihi. Papa u dlayiwe hi vuvabyi lebyi loko ndzi ri ni malembe ya kaye.

Endzhaku ka loko a file ndzi rile ngopfu. A ndzi twa onge ndzi helela hi moya naswona a ndzi nga lavi ku vulavula na munhu. A ndzi nga si tshama ndzi titwa hi ndlela leyi naswona a ndzi nga ha lavi ku endla nchumu. Eku sunguleni ntlawa wa kereke wa vantshwa lowu a ndzi ri eka wona a wu ndzi twela vusiwana kambe a swi tlhaveriwanga hi dyambu. Vantshwa  va ntlawa wolowo a va vula marito yo fana ni lawa, “A ku ri nkarhi wa leswaku papa wena a fa” ni lama nge, “Xikwembu xi n’wi tekile” ni lama nge, “Se u le tilweni.” Leswi a va ndzi byela swona a swi nga ndzi enerisi kambe a ndzi nga swi tivi leswi Bibele yi swi dyondzisaka hi mhaka leyi.

Kutani mama u sungule ku dyondza Bibele ni Timbhoni ta Yehovha naswona hi ku famba ka nkarhi mina na buti wa mina hi sungule ku dyondza Bibele. Hi dyondze hi xiyimo lexi vafi va nga le ka xona, ku katsa ni xitshembiso lexi chavelelaka xa Xikwembu xa ku pfuxiwa ka vafi. (Yohane 5:28, 29) Kambe tsalwa leri ndzi pfuneke swinene i ra Esaya 41:10, laha Xikwembu xi nge: “U nga chavi, hikuva ndzi na wena. U nga languti ematlhelweni, hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna.” Ku tiva leswaku Yehovha u na mina swi ndzi chavelele ngopfu naswona ni sweswi ndza ha chaveleleka.

MHAKA YA JEANNIE Loko ndzi ri na malembe ya nkombo mama u dlayiwe hi vuvabyi bya khensa. Siku leri a feke ha rona a ndzi twa onge ndzo lorha. U fele ekaya naswona vakokwana wa mina a va ri kona. Ndzi tsundzuka ndzi vona vanhu hinkwavo va rhurile. Naswona hi siku rero hi lalele hi matandza. A ndzi vona onge misava yi yime hi nhloko.

Endzhaku ka rifu ra mama ndzi hete malembe yo tala ndzi ehleketa leswaku ndzi fanele ndzi va ni xivindzi leswaku ndzi chavelela ndzisana ya mina. Sweswo a swi vula leswaku a ndzi fanele ndzi endla onge a ndzi twi ku vava. Ninamuntlha, ndza ha pfa ndzi tumbeta ndlela leyi ndzi titwaka ha yona. Ndza swi tiva leswaku sweswo swi nga ndzi vavisa.

Ndza ha yi tsundzuka ndlela leyi vandlha ra hina ra Timbhoni ta Yehovha ri hi kombeke rirhandzu ni ku hi seketela ha yona. Hambileswi a ha ha ku sungula ku ya eminhlanganweni ya Timbhoni, ti hi seketerile onge hiloko se hi ri ni malembe hi ri karhi hi hlanganyela na tona. Papa a nga boheki ku hi swekela ku ringana lembe hikuva minkarhi hinkwayo a ti hi tisela swakudya.

Tsalwa leri ndzi ri rhandzaka ngopfu i Pisalema 25:16, 17. Eka rona mupisalema u kombela Xikwembu a ku: “Hundzuluxela xikandza xa wena eka mina, u ndzi komba tintswalo; hikuva ndzi tshama ndzi ri ndzexe naswona ndza xaniseka. Maxangu ya mbilu ya mina ma andzile; Ndzi humese emaxangwini ya mina.” Swa ndzi chavelela ku tiva leswaku a ndzi ndzexe loko ndzi ri emaxangwini. Xikwembu xa ndzi seketela. Bibele yi ndzi pfunile leswaku ndzi kota ku ya emahlweni ni vutomi ni ku dzikisa mianakanyo ya mina eka swilo leswinene ni ku va ni ntshembo eka xitshembiso lexi nga eBibeleni xa ku pfuxiwa ka vafi. Ndzi ni ntshembo wo tlhela ndzi vona mama a hanye kahle emisaveni leyi nga paradeyisi.—2 Petro 3:13.

Xana u nga swi tsakela ku twa leswi engetelekeke hi nchavelelo lowu humaka eBibeleni eka lava nga ni gome? Kopa Broxara leyi nge “Loko U Feriwa Hi Loyi U N’wi Rhandzaka” mahala. Yana eka www.pr418.com/ts languta eka MINKANDZIYISO > TIBUKU NI TIBROXARA.