TA VATSWARI
8: Vanani xikombiso lexinene
LESWI SWI VULAKA SWONA
Vatswari lava vekelaka vana va vona xikombiso lexinene va hanya hileswi va swi dyondzisaka. Hi xikombiso, a wu nge languteli leswaku n’wana wa wena a vulavula ntiyiso loko a tshame a ku twa u ku, “N’wi byele leswaku a ndzi kona,” loko ku fika munhu a lava ku vulavula na wena.
“Vanhu vo tala va ri, ‘Endla leswi ndzi ku byelaka swona ku nga ri leswi ndzi swi endlaka.’ Kambe sweswo a swi tirhi eka vana. Va fana ni swiponci, va tswonga xin’wana ni xin’wana lexi hi xi vulaka ni lexi hi xi endlaka naswona va swi vona loko hi nga swi endli leswi hi va dyondzisaka swona.”—David.
NSINYA WA NAWU WA LE BIBELENI: “Wena, loyi u chumayelaka u ku ‘U nga tshuki u yiva,’ wa yiva ke?”—Varhoma 2:21.
LEXI ENDLAKA SWI VA SWA NKOKA
Vana va tekelela ngopfu leswi vatswari va vona va swi endlaka ku tlula leswi endliwaka hi tintangha ta vona. Sweswo swi vula leswaku hi wena u faneleke u dyondzisa vana va wena ndlela leyi va faneleke va hanya ha yona hi ku va vekela xikombiso lexinene.
“Hi nga ha byela n’wana nchumu wo karhi hi ku phindhaphindha hi anakanya leswaku a nga hi twi, kambe siku leri hi nga ta endla leswi hi nga te a nga swi endli, u ta hi vutisa. Vana va swi tekela enhlokweni hinkwaswo leswi hi swi endlaka hambiloko hi vona onge a va swi voni.”—Nicole.
NSINYA WA NAWU WA LE BIBELENI: “Vutlhari lebyi humaka ehenhla . . . a byi na vukanganyisi.”—Yakobo 3:17.
LESWI U NGA SWI ENDLAKA
Tikambisise. U hlalela vuhungasi bya njhani? U n’wi khoma njhani nkataku ni vana va wena? U ni vanghana va njhani? Xana wa va anakanyela van’wana? Hi ku komisa, xana u nga swi tsakela leswaku vana va wena va tekelela mahanyelo ya wena?
“Mina ni nuna wa mina a hi va sindzisi vana va hina ku endla swilo leswi na hina swi hi tsandzaka.”—Christine.
Kombela ku rivaleriwa loko u endle swihoxo. Vana va wena va swi tiva leswaku u munhu wa swi endla swihoxo. Loko u endle xihoxo u nga ha byela nkataku kumbe vana va wena u ku, “Ndzi khomele,” loko u endla tano, u va dyondzisa ku tshembeka ni ku titsongahata.
“Vana va hina va dyondza swo karhi loko hi pfumela swihoxo swa hina ivi hi kombela ku rivaleriwa. Loko hi nga endli tano, va ta tiyimelela loko va endla swihoxo.”—Robin.
“Tanihi vatswari vana va dyondza swo tala eka hina naswona mahanyelo ya hina i ya nkoka hikuva va ma vona nkarhi hinkwawo. Mahanyelo ya hina ma fana ni buku leyi tshamaka yi pfulekile leyi va dyondzaka eka yona mikarhi hinkwayo.”—Wendell.
U Nga Ha Tsakela
XIHONDZO XO RINDZA
Dyondzisa Vana Va Wena Ku Va Ni Vutihlamuleri
U nga xi tekelela njhani xikombiso xa Yesu leswaku u va mutswari la humelelaka?
XALAMUKA!
Ku Hetisisa Vutihlamuleri Bya Wena Tanihi Mutswari
U nga n’wi pfuna njhani n’wana wa wena leswaku a lwisana ni mahanyelo yo biha lawa vana va hlangavetanaka na wona namuntlha?
XIHONDZO XO RINDZA
Swi Vula Yini Ku Va Mutswari Lonene?
U nga va kurisa njhani vana leswaku va va ni mahanyelo lamanene?
