Thekinoloji Yi Byi Khumba Njhani Vuswikoti Bya Wena Byo Ehleketa?
Vanhu va tshama va ri eku dyondzeni, ku nga ha va swa xikolo, swa ntirho kumbe swin’wana. Thekinoloji yi nga pfuna. A swi si tshama swi olova hi ndlela leyi ematin’wini ku kuma rungula ro tala hi ndlela leyi, laha u nga bohekiki ku huma ekaya ka wena kumbe hambi ku ri ku suka laha u nga tshama kona.
Hambiswiritano, vo tala lava yi tirhisaka ngopfu thekinoloji va kuma leswaku . . .
-
swa va tikela ku dzikisa miehleketo loko va ri karhi va hlaya.
-
swa va tikela ku dzikisa miehleketo eka ntirho wun’we.
-
va hatla va phirheka loko va ri voxe.
LESWI U FANELEKE U SWI TIVA
KU HLAYA
Hakanyingi vanhu lava tirhisaka switirhisiwa swa thekinoloji mikarhi yin’wana va hatla va hlaya rungula leswaku va ta kuma mongo wa kona.
I swinene ku hundzisa matihlo loko u lava ku hatla u kuma nhlamulo ya xivutiso xo karhi. Hambiswiritano, sweswo swi nga endla u nga twisisi loko u fanele u dzika eka mhaka yo karhi.
MHAKA YO ANAKANYISISA HI YONA: Xana u ni vuswikoti byo fikela kwihi byo hlaya rungula ro leha? Xana ku endla tano swi nga yi antswisa njhani ndlela leyi u hlayaka ha yona?—SWIVURISO 18:15.
KU DZIKISA MIEHLEKETO
Vanhu van’wana va tibyela leswaku thekinoloji yi va endla va kota ku endla swilo swimbirhi hi nkarhi wun’we, hi xikombiso, va rhumela vanghana marungula loko hi hala tlhelo va ri karhi va hlaya. Kambe loko va endla swilo swimbirhi hi nkarhi wun’we, va nge swi endli kahle, ngopfungopfu loko haswimbirhi swi lava ku dzikisa miehleketo.
Hambileswi swi tikaka ku dzikisa miehleketo ni ku papalata swikavanyeto, swi ta ku pfuna ku dyondza. Muntshwa la vuriwaka Grace u ri: “U endla swihoxo switsongo naswona a wu vi na ntshikilelo lowukulu. Ndzi dyondze leswaku swa antswa ku dzikisa miehleketo eka nchumu wun’we hi nkarhi wo karhi ni ku papalata ku endla mitirho yo tala hi nkarhi wun’we.”
MHAKA YO ANAKANYISISA HI YONA: Xana ku endla swilo swo tala hi nkarhi wun’we swi endla leswaku u nga twisisi ni ku tsundzuka leswi u swi hlayaka?—SWIVURISO 17:24.
LOKO U RI WEXE
Vanhu van’wana a va tshunxeki loko va ri voxe endhawini leyi ku miyeleke, kutani va tirhisa thekinoloji leswaku va tihungasa. Wansati loyi a vuriwaka Olivia u ri: “Ndza phirheka loko ndzi tshama timinete ta 15 ndzi nga languti foni ya mina, tablet kumbe ku lumeka TV.”
Hambiswiritano, loko munhu a ri yexe u va ni nkarhi wa nkoka wo anakanyisisa, ku nga xiphemu xa nkoka xo dyondza, eka vantshwa ni vanhu lavakulu.
MHAKA YO ANAKANYISISA HI YONA: Xana u kota ku wu tirhisa kahle nkarhi lowu u vaka u ri wexe?—1 TIMOTIYA 4:15.
LESWI U NGA SWI ENDLAKA
KAMBISISA NDLELA LEYI U YI TIRHISAKA HA YONA THEKINOLOJI
U nga yi tirhisa hi tindlela tihi thekinoloji leswaku u antswisa vuswikoti bya wena byo ehleketa? Xana ndlela leyi u yi tirhisaka ha yona thekinoloji yi nga byi khumba njhani vuswikoti bya wena byo dzikisa miehleketo ni ku dyondza?
NSINYA WA NAWU WA LE BIBELENI: “Hlayisa vutlhari ni vuswikoti byo ehleketa.”—SWIVURISO 3:21.
U Nga Ha Tsakela
XALAMUKA!
Xana U Khomeke Ngopfu?
Vanhu vo tala swa va tikela ku endla mitirho ya ku tihanyisa ni ku tlhela va hetisisisa vutihlamuleri bya le kaya. I yini lexi endlaka swi tika? Va nga endla yini?
