VANJHINIYARA va hlamarisiwa hi ndlela leyi risokoti ri kotaka ha yona ku rhwala swilo leswi tikaka ku tlula miri wa rona. Leswaku va twisisa vuswikoti lebyi, vanjhiniyara eYunivhesiti ya Ohio State, le U.S.A., va endle vulavisisi bya risokoti hi switirhisiwa swa le ka tikhompyuta. Switirhisiwa leswi swi endliwe hi ku tirhisa swifaniso swa X-ray (micro CT scans) ni ku encenyeta matimba lama risokoti ri ma tirhisaka loko ri tlakula swilo.

Nhamu ya rona i ya nkoka swinene hikuva hi yona yi endlaka leswaku ri kota ku rhwala swilo swo tika hi nomu. Tisele leti oloveke leti nga enhan’wini ya risokoti ti khumbana ni miri ni nhloko ya rona ku fana ni tintiho leti petsiweke. Un’wana wa vaendli va ndzavisiso wolowo u ri: “Ndlela leyi tisele leti olovaka ti joyiniweke ha yona ni miri swi pfuna leswaku nhamu ya rona yi kota ku tirha kahle. Ndlela leyi hlamarisaka leyi tisele ni miri wa rona swi hlanganeke ha yona swi endla leswaku nhamu yi kota ku rhwala swilo swo tika.” Valavisisi va pfumela leswaku ndlela leyi risokoti ri tirhisaka nhamu ya rona ha yona swi ta pfuna eku endleni ka tirhoboto.

U anakanya yini? Xana nhamu ya risokoti ni ndlela leyi swirho swa rona leswi rharhanganeke swi hlanganaka ha yona, swi lo tiendlekela kumbe swi lo endliwa?