LESWI VAN’WANA VA SWI VULAKA

Vaisrayele a va gandzela “xikwembu lexi rhandzaka tinyimpi.”

LESWI BIBELE YI SWI VULAKA

Matiko lawa Vaisrayele va ma hluleke a ma ri ni madzolonga naswona a ma endla mikhuva yo nyenyetsa yo tanihi ku endla timhaka ta masangu ni xirho xa ndyangu kumbe swiharhi naswona a ma nyikela vana leswaku va va magandzelo. Endzhaku ko va Xikwembu xi va lehisele mbilu nkarhi wo leha, xi te: “Matiko lawa ndzi ma hlongolaka emahlweni ka n’wina ma tiendle lama nga tengangiki hi swilo leswi hinkwaswo.”—Levhitika 18:21-25; Yeremiya 7:31.

“Yehovha Xikwembu xa wena u hlongola matiko lawa emahlweni ka wena hikwalaho ka vuhomboloki bya wona.”—Deteronoma 9:5.

LESWI U NGA HA VAKA U SWI XIYILE

Eka tinyimpi to tala, vafundhisi va ntlawa ha wun’we va vula leswaku Xikwembu xa va seketela. Buku leyi nge, The Causes of War yi ri: “Mikarhi hinkwayo vukhongeri byi seketela tinyimpi hinkwato leti lwiwaka.”

LESWI BIBELE YI SWI VULAKA

Yehovha a nga lavi leswaku Vakreste va lwa ni valala va vona. Muapostola Pawulo u tsalele Vakreste a ku: “Loko swi koteka, swi titshege hi n’wina, vanani ni ku rhula ni vanhu hinkwavo. Mi nga tirihiseli.”—Varhoma 12:18, 19.

Ematshan’weni yo byela valandzeri vakwe leswaku va ya etinyimpini, Yesu u te: “Hambetani mi rhandza valala va n’wina, mi khongelela lava mi xanisaka; leswaku mi tikombisa mi ri vana va Tata wa n’wina la nge matilweni.” (Matewu 5:44, 45) Hambiloko matiko lama va tshamaka eka wona ma ya etinyimpini, Vakreste a va katseki eka tona hikuva a hi “xiphemu xa misava.” (Yohane 15:19) Loko Xikwembu xi lava leswaku vagandzeri va xona emisaveni hinkwayo va rhandza valala va vona ni leswaku va nga vi xiphemu xa misava, xana swi nga kotekisa ku yini leswaku xi seketela tinyimpi namuntlha?

“Mfumo wa mina a hi xiphemu xa misava leyi. Loko mfumo wa mina a wu ri xiphemu xa misava leyi, valanguteri va mina a va ta va va lwile leswaku ndzi nga nyiketiwi eka Vayuda. Kambe, hilaha swi nga hakona, mfumo wa mina a wu humi exihlobyeni lexi.”—Yohane 18:36.

LESWI VAN’WANA VA SWI VULAKA

Tinyimpi a ti nge heli. Buku leyi nge War and Power in the 21st Century yi ri: “Tinyimpi a ti nge pfuki ti herile. Vanhu van’wana va tshemba leswaku tinyimpi ti ta tshama ti ri kona.”

LESWI BIBELE YI SWI VULAKA

Tinyimpi ti ta hela loko ku lovisiwe vanhu vo homboloka. Ku nga ri khale Mfumo wa Xikwembu lowu fumaka ku suka etilweni wu ta herisa matlhari hinkwawo emisaveni ni ku dyondzisa vanhu ku kondletela ku rhula. Bibele yi hi tiyisekisa leswaku Xikwembu xi ta “lulamisa timhaka ta matiko yo tala ya le kule swinene. Kutani va ta fula mabanga ya vona ma va swikomu ni mafumu ya vona ma va swikhutulo. A va nge ri tlakusi banga, tiko rin’wana ku lwa ni tiko rin’wana, naswona a va nge he dyondzi nyimpi.”—Mikiya 4:3.

Bibele yi dyondzisa leswaku loko ku fuma Mfumo wa Xikwembu a ku nge he vi na mfumo lowu nga ta fuma vanhu leswaku wu tivuyerisa, kumbe mfumo lowu vekaka milawu leyi endlaka vanhu lava fumiwaka hi wona va xandzuka kumbe va va ni xihlawuhlawu. Hikwalaho tinyimpi ti ta hela. Xikwembu xi tshembisa leswaku “a va nge endli swo biha kumbe ku onha . . . hikuva kunene misava yi ta tala hi ku tiva Yehovha kukota mati lama funengetaka lwandle.”—Esaya 11:9.

“U herisa tinyimpi ku ya fika emakumu ya misava. Vurha u byi tshova hi le xikarhi naswona u tshovelela fumu; Tigolonyi u ti hisa endzilweni.”—Pisalema 46:9.