HI TINDLELA to karhi, swichudeni swa Bibele leswi titsongahataka swi fana ni valavisisi va nsuku. Swichudeni swo tano swi fanele swi tirha hi matimba ni ku ya emahlweni swi lavisisa Matsalwa leswaku swi kuma vutlhari lebyi nga pimanisiwiki na nchumu. Tanihi swichudeni swa Bibele hi nga dyondza yini hi ku va hi kambisisa tindlela tinharhu leti nsuku wu kumiwaka ha tona?

Ehleketa u ri karhi u famba eribuweni ra nambu kutani u vona xiribyana xa nsuku lexi vangamaka hileswi xi tlhaviweke hi dyambu. Wa tsaka hileswi u kumeke nsuku kutani wa wu rhwalela. Xiribyana lexi xa nsuku i xitsongo ni le ka nhloko ya ritlhongwe ra mencisi naswona xi kala ku tlula dayimani. U languta ematlhelo ku vona loko ku ri ni swiribyana swin’wana swa nsuku.

Hilaha ku fanaka, hi siku leri u nga taka u nga ri rivali, nandza wa Yehovha u ku endzerile leswaku a bula na wena hi ntshembo lowu kumekaka eBibeleni. Kumbexana, wa ha swi tsundzuka kahle loko u kuma ntiyiso ro sungula. U nga ha va u wu kume loko u vona vito ra Xikwembu, leri nge Yehovha, ro sungula eBibeleni. (Ps. 83:18) Kumbexana loko u dyondze leswaku u nga va munghana wa Yehovha. (Yak. 2:23) U nambe u swi tiva leswaku u kume nchumu wo antswa ku tlula nsuku! Naswona swi nga ha endleka u sungule ku hisekela ku kuma vutivi lebyi engetelekeke.

Mahlanhla ya nsuku minkarhi yin’wana ya hlengeletana eswinambyanini kumbe eminkoveni. Valavisisi va nsuku va nga ha kuma nsuku wo tala lowu hlengeletaneke, lowu nga durhaka tidolara ta makume ya magidi.

Loko u sungula ku dyondza Bibele ni Timbhoni ta Yehovha, u nga ha va u titwe ku fana ni mulavisisi wa nsuku loyi a kumeke nsuku wo tala lowu hlengeletaneke. Ku anakanyisisa hi Matsalwa swi nga ha va swi engetele vutivi bya wena, ku nga nchumu lowu ku akeke hi tlhelo ra moya. Loko u ri karhi u nghenisa ntiyiso lowu wa risima wa le Bibeleni, u dyondze ndlela leyi u nga tshinelaka ha yona eka Yehovha ni ku tihlayisa erirhandzwini ra yena ni ku langutela vutomi lebyi nga heriki.​—Yak. 4:8; Yudha 20, 21.

 Tanihi mulavisisi la lavaka mahlanhla ya nsuku lama hlengeletaneke, swi nga ha endleka u hisekele ku lava ntiyiso. Endzhaku ko dyondza ntiyiso wa xisekelo wa le Bibeleni, u nga ha va u susumeteleke ku teka magoza lama endleke leswaku u tinyiketela ni ku khuvuriwa.​—Mat. 28:19, 20.

Mulavisisi a nga ha kuma nsuku lowutsongo endzeni ka maribye. Swiphemu swin’wana swa maribye lawa swi ni nsuku wo tala lerova ku nga ceriwa ribye rero leswaku ku humesiwa nsuku wolowo. Loko u ri languta ro sungula, swi nga endleka u nga voni nsuku eka ribye rero. Ha yini? Hikuva ribye rin’we ri nga va ni tigireme ta khume ta nsuku! Nilokoswiritano, mulavisisi wa nsuku a nga endla matshalatshala leswaku a wu cela.

Ku laveka matshalatshala leswaku munhu a engetela “dyondzo ya masungulo malunghana na Kreste.” (Hev. 6:1, 2) U fanele u tirha hi matimba leswaku u kuma tinhla ni ku dyondza swo karhi loko u hlaya Bibele. Kutani u nga endla yini leswaku u vuyeriwa eka dyondzo ya munhu hi yexe ya Bibele, hambiloko se u ri ni malembe u ri karhi u yi endla?

Tshama u tiyimisele ku dyondza. Anakanyisisa swinene hi leswi u nga le ku swi hlayeni. Yana emahlweni u endla matshalatshala, u ta kuma vutlhari bya Xikwembu ni nkongomiso wa xona. (Rhom. 11:33) Leswaku u ya u tiva swo tala hi Bibele, endla ndzavisiso hi minkandziyiso leyi nga kona hi ririmi ra wena. Lava nkongomiso lowu u wu lavaka ni tinhlamulo ta swivutiso leswi u nga na swona hi Bibele. Vutisa van’wana hi matsalwa lawa va vonaka ma pfuna swinene ni ku va khutaza. Byela van’wana tinhla leti u ti kumeke loko u ri karhi u dyondza Rito ra Xikwembu.

I ntiyiso leswaku pakani ya wena a hi ku va u va ni vutivi byo tala ntsena. Muapostola Pawulo u hi lemukise leswaku “vutivi bya tikukumuxa.” (1 Kor. 8:1) Hikokwalaho, tikarhatele ku titsongahata ni ku va ni ripfumelo leri tiyeke. Ku va ni vugandzeri bya ndyangu ni dyondzo ya Bibele ya munhu hi yexe nkarhi ni nkarhi swi ta ku pfuna leswaku u hanya hi ku pfumelelana ni milawu ya Yehovha naswona swi ta ku susumetela ku pfuna van’wana. Kasi xa nkoka swinene, u ta tsaka hikuva u kume nchumu wo antswa ku tlula nsuku.​—Swiv. 3:13, 14.