1, 2. (a) ‘Nyiko ya Xikwembu ya mahala leyi nga hlamuselekiki’ yi katsa yini? (b) Hi swihi swivutiso leswi hi nga ta swi kambisisa exihlokweni lexi?

YEHOVHA u hi nyike nyiko leyinene ngopfu ya rirhandzu loko a rhumela N’wana wakwe, Yesu emisaveni! (Yohane 3:16; 1 Yohane 4:9, 10) Muapostola Pawulo u hlamusele nyiko leyi tanihi “nyiko . . . ya mahala leyi nga hlamuselekiki.” (2 Vakorinto 9:15) Ha yini Pawulo a vule marito wolawo?

² Pawulo a swi tiva leswaku gandzelo ra Yesu i xitiyisekiso xa leswaku switshembiso hinkwaswo swa Xikwembu leswinene swi ta hetiseka. (Hlaya 2 Vakorinto 1:20.) Leswi swi vula leswaku ‘nyiko ya Xikwembu ya mahala leyi nga hlamuselekiki’ yi katsa gandzelo ra Yesu ni swilo hinkwaswo leswinene ku katsa ni rirhandzu leri Yehovha a hi kombaka rona. Nyiko leyi ya nkoka swinene swa tika ku yi hlamusela hi ndlela leyi hi nga ta yi twisisa hilaha ku heleleke. Xana nyiko leyi yo hlawuleka yi fanele yi hi endla hi titwa njhani? Naswona xana yi nga hi susumetela njhani ku lunghiselela Xitsundzuxo xa rifu ra Kreste hi Ravunharhu, March 23, 2016?

3, 4. (a) U titwa njhani loko munhu wo karhi a ku nyika nyiko? (b) Xana nyiko yo hlawuleka yi nga byi cinca njhani vutomi bya wena?

³ Ha tsaka loko munhu wo karhi a hi nyika nyiko. Kambe tinyiko tin’wana i ta nkoka swinene lerova ti cinca vutomi bya hina. Hi xikombiso, ti anakanye u katseke eka vugevenga byo karhi. Xigwevo xa kona i rifu. Kambe hi xitshuketa, munhu loyi u nga n’wi tiviki a vula leswaku xigwevo xa wena xi yisiwa eka yena. U tiyimisele ku ku fela! Nyiko yoleyo yo hlamarisa yi nga endla u titwa njhani?

⁴ Nyiko yoleyo yo hlawuleka ni leyi humaka embilwini yi nga ku endla u endla ku cinca evuton’wini bya wena. Hi ntolovelo, u nga tlhela u titwa u susumeteleka ku kombisa van’wana malwandla, rirhandzu ni ku tlhela u va rivalela. Vutomi bya wena hinkwabyo u ta lava ku kombisa leswaku wa swi tlangela leswi u endleriweke swona.

5. Nyiko ya Xikwembu ya nkutsulo i ya nkoka swinene ku tlula tinyiko letin’wana hi ndlela yihi?

⁵ Nyiko leyi Xikwembu xi hi nyikeke yona ya nkutsulo i ya nkoka swinene ku tlula xikombiso lexi hi vulavuleke ha xona. (1 Petro 3:18) Anakanya hi mhaka leyi: Hinkwerhu ka hina hi velekiwe hi ri ni xidyoho xa Adamu naswona ha fa hikwalaho ka xona. (Varhoma 5:12) Rirhandzu ri susumetele Yehovha leswaku a rhumela Yesu emisaveni leswaku a ta fela vanhu hinkwavo, leswaku a “nantswa rifu hikwalaho ka vanhu hinkwavo.” (Vaheveru 2:9) Kambe gandzelo ra Yesu ri ta endla swo tala ku tlula sweswo! Ri ta ri herisela makumu rifu. (Esaya 25:7, 8; 1 Vakorinto 15:22, 26) Hinkwavo lava kombisaka ripfumelo eka Yesu va ta hanya hi ku rhula va tsakile hilaha ku nga heriki, tanihi tihosi na Kreste etilweni kumbe tanihi vanhu lava nga ta fumiwa hi Mfumo wa Xikwembu laha misaveni. (Varhoma 6:23; Nhlavutelo 5:9, 10) Hi yihi mikateko yin’wana leyi nga ta tisiwa hi nyiko ya Yehovha?

6. (a) Hi yihi mikateko leyi tisiwaka hi nyiko ya Yehovha leyi u yi languteleke hi mahlongati? (b) Vula swilo swinharhu leswi nyiko ya Xikwembu yi hi susumetelaka ku swi endla.

⁶ Nyiko ya Xikwembu yi ta endla leswaku misava yi va paradeyisi, lava vabyaka va ta hanyisiwa ni lava feke va ta pfuxiwa. (Esaya 33:24; 35:5, 6; Yohane 5:28, 29) Ha n’wi rhandza Yehovha ni N’wana wakwe hi leswi va hi nyikeke “nyiko . . . ya mahala leyi nga hlamuselekiki.” Nyiko leyi yi ta hi susumetela ku endla yini? Yi ta hi susumeta (1) ku tekelela Yesu Kreste hilaha hi nga kotaka hakona, (2) ku rhandza vamakwerhu ni (3) ku rivalela van’wana swi huma embilwini.

7, 8. Hi fanele hi titwa njhani hi rirhandzu ra Kreste naswona ri fanele ri hi susumetela ku endla yini?

⁷ Xo sungula, hi fanele hi susumeteleka ku tirhisa vutomi bya hina leswaku hi xixima Yesu. Muapostola Pawulo u te: “Rirhandzu leri Kreste a nga na rona ra hi susumeta.” (Hlaya 2 Vakorinto 5:14, 15.) Pawulo a a swi tiva leswaku loko hi amukela rirhandzu lerikulu ra Yesu, ri ta hi susumetela ku rhandza Yesu ni ku n’wi xixima. Loko hi swi twisisa hilaha ku heleleke leswi Yehovha a nga hi endlela swona, rirhandzu rakwe ri ta hi susumetela ku hanya hi ndlela leyi kombisaka leswaku hi xixima Yesu. Xana hi nga swi endlisa ku yini sweswo?

⁸ Rirhandzu ra Yehovha ri ta hi susumetela ku tekelela xikombiso xa Yesu, ni ku landzela mikondzo ya yena hilaha hi nga kotaka hakona. (1 Petro 2:21; 1 Yohane 2:6) Loko hi yingisa Xikwembu na Kreste hi kombisa leswaku ha va rhandza. Yesu u te: “Loyi a nga ni swileriso swa mina a tlhela a swi hlayisa, hi yena loyi a  ndzi rhandzaka. Hi ku fanana loyi a ndzi rhandzaka u ta rhandziwa hi Tatana, naswona ndzi ta n’wi rhandza, ndzi tikombisa eka yena erivaleni.”—Yohane 14:21; 1 Yohane 5:3.

9. I ntshikilelo wihi lowu hi langutaneke na wona?

⁹ Hi nkarhi lowu wa Xitsundzuxo, i swinene ku anakanyisisa hi ndlela leyi hi hanyaka ha yona. Tivutise: ‘Hi le ka tindlela tihi leti se ndzi tekelelaka Yesu eka tona? Hi kwihi laha ndzi faneleke ndzi antswisa kona?’ I swa nkoka ku tivutisa swivutiso leswi hikuva misava yi lava hi hanya hi ndlela leyi yi hanyaka ha yona. (Varhoma 12:2) Loko hi nga tivoneli, hi nga ha titwa hi boheka ku tekelela vadyondzisi va misava, vanhu lava dumeke ni tinghwazi ta mintlango. (Vakolosa 2:8; 1 Yohane 2:15-17) Hi nga lwisana njhani ni ntshikilelo lowu?

10. Hi swihi swivutiso leswi hi nga tivutisaka swona hi nkarhi lowu wa Xitsundzuxo naswona tinhlamulo ta swona ti fanele ti hi susumetela ku endla yini? (Vona xifaniso lexi nga eku sunguleni ka xihloko lexi.)

¹⁰ Hi nkarhi lowu wa Xitsundzuxo i swinene ku tinyika nkarhi wo kambisisa swiambalo, tifilimi ni vuyimbeleri bya hina, swin’we ni leswi nga eka tikhomphyuta, tiselfoni kumbe ti-tablet ta hina. Tivutise: ‘Loko Yesu a ri laha kutani a vona leswi ndzi swi ambaleke, xana a swi ta ndzi khomisa tingana?’ (Hlaya 1 Timotiya 2:9, 10.) ‘Xana swiambalo swa mina a swi ta kombisa leswaku ndzi mulandzeri wa Kreste? Xana Yesu a a ta swi tsakela ku hlalela tifilimi leti ndzi ti hlalelaka? Xana a a ta byi yingisela vuyimbeleri bya mina? Loko Yesu o lomba selfoni kumbe tablet ya mina, xana a ndzi ta khomiwa hi tingana hi leswi a a ta swi vona? Xana a swi ta ndzi tikela ku hlamusela Yesu leswaku ha yini ndzi tsakisiwa hi mintlangu ya tivhidiyo leyi ndzi yi tlangaka?’ Ndlela leyi hi rhandzaka Yehovha ha yona yi fanele yi hi susumetela ku cukumeta nchumu wun’wana ni wun’wana lowu nga fanelangiki eka Mukreste, ku nga khathariseki leswaku wu durha ku fikela kwihi. (Mintirho 19:19, 20) Loko hi nyiketela vutomi bya hina eka Yehovha, hi n’wi tshembise ku tirhisa vutomi bya hina leswaku hi yingisa Kreste. Hi fanele hi cukumeta nchumu wun’wana ni wun’wana lowu nga ta endla leswaku swi hi tikela ku tekelela Yesu.—Matewu 5:29, 30; Vafilipiya 4:8.

11. (a) Ndlela leyi hi rhandzaka Yehovha na Yesu ha yona yi hi pfuna njhani entirhweni wo chumayela? (b) Rirhandzu ri hi susumetela njhani ku pfuna van’wana evandlheni?

¹¹ Rirhandzu ra hina eka Yesu ri hi susumetela ku chumayela ni ku dyondzisa hi ku hiseka. (Matewu 28:19, 20; Luka 4:43) Xana u nga hlela xiyimiso xa wena xa siku ni siku leswaku u kota ku heta tiawara ta 30 kumbe 50 entirhweni wo chumayela tanihi phayona ra nkarhinyana, hi nkarhi lowu wa Xitsundzuxo? Makwerhu un’wana loyi a feriweke hi nsati loyi a ri ni malembe ya 84 a a ehleketa leswaku a nge swi koti ku phayona hikwalaho ka leswi a dyuhaleke ni leswi a vabyaka. Kambe maphayona ya le vandlheni ra yena a ma lava ku n’wi pfuna. Ma n’wi pfune hi xo famba ni ku n’wi hlawulela nsimu leyi faneleke leyi a ta yi tirha. Hikwalaho ka sweswo, u kote ku fikelela pakani yakwe ya tiawara ta 30. Xana u nga pfuna makwerhu wo karhi evandlheni ra ka n’wina leswaku a va phayona ra nkarhinyana hi March kumbe April? I ntiyiso leswaku a hi hinkwerhu lava hi nga phayonaka, kambe hi nga tirhisa nkarhi ni matimba ya hina leswaku hi antswisa ntirho wa hina wa nsimu. Loko hi endla tano, hi ta kombisa leswaku hi susumetiwa hi rirhandzu ra Yesu ku fana na Pawulo. I yini swin’wana leswi rirhandzu ra Xikwembu ri nga ta hi susumetela ku swi endla?

12. Rirhandzu ra Xikwembu ri hi susumetela ku endla yini?

¹² Xa vumbirhi, rirhandzu ra Xikwembu ri  fanele ri hi susumetela ku rhandza vamakwerhu. Muapostola Yohane u tsale a ku: “Varhandziwa, loko leyi ku ri ndlela leyi Xikwembu xi hi rhandzeke ha yona, kutani hina hi boheka ku rhandzana.” (1 Yohane 4:7-11) Loko hi amukela rirhandzu ra Xikwembu, hi fanele hi rhandza vamakwerhu. (1 Yohane 3:16) Hi nga va kombisa njhani leswaku ha va rhandza?

13. Hi xihi xikombiso lexi Yesu a hi vekeleke xona xo rhandza vanhu van’wana?

¹³ Xikombiso xa Yesu xi hi kombisa ndlela leyi hi nga rhandzaka van’wana ha yona. Loko a ri laha misaveni, u pfune vanhu, ngopfungopfu lava titsongahataka. U horise lava vabyaka, lava lamaleke, lava nga voniki, lava nga twiki ni lava nga vulavuriki. (Matewu 11:4, 5) Ku hambana ni varhangeri va vukhongeri, Yesu a a rhandza ku dyondzisa vanhu lava lavaka ku dyondza hi Xikwembu. (Yohane 7:49) A a rhandza lava titsongahataka naswona u tirhe hi matimba leswaku a va pfuna.—Matewu 20:28.

14. U nga endla yini ku kombisa leswaku u rhandza vamakwerhu?

¹⁴ Nkarhi wa Xitsundzuxo i nkarhi lowunene wo anakanyisisa hi ndlela leyi hi nga pfunaka vamakwerhu evandlheni, ngopfungopfu lava dyuhaleke. Xana u nga va endzela vamakwerhu lava, lava rhandzekaka? Xana u nga va tisela swakudya, u va pfuna hi mintirho ya le kaya, u va pfuna hi xo famba leswaku va ya eminhlanganweni kumbe u va rhamba leswaku va tirha na wena ensin’wini? (Hlaya Luka 14:12-14.) Pfumelela rirhandzu ra Xikwembu ri ku susumetela ku rhandza vamakwerhu!

15. Hi yihi mhaka leyi hi faneleke hi yi tekela enhlokweni?

¹⁵ Xa vunharhu, rirhandzu ra Yehovha ri hi susumetela ku rivalela vamakwerhu. Hinkwerhu ka hina hi kume xidyoho ni rifu eka Adamu, kutani a nga kona loyi a nga vulaka a ku: “A ndzi wu lavi nkutsulo.” Hambi ku ri malandza yo tshembeka swinene ya Xikwembu ma wu lava nyiko ya nkutsulo. Hinkwerhu ka hina hi rivaleriwe xidyoho lexikulu! Ha yini swi ri swa nkoka ku yi tekela enhlokweni mhaka leyi? Nhlamulo ya kona yi kumeka eka xin’wana xa swifaniso swa Yesu.

16, 17. (a) Hi dyondza yini eka xifaniso xa Yesu xa hosi ni mahlonga? (b) Endzhaku ko anakanyisisa hi xifaniso xa Yesu, i yini leswi u tiyimiseleke ku swi endla?

¹⁶ Yesu u vulavule hi xifaniso xa hosi leyi rivaleleke hlonga ra yona leri a ri yi kolota tidenari ta 60 000 000. Kambe endzhaku ka sweswo, hlonga rolero a ri ri rivalelanga hlongakulobye leri a ri ri kolota tidenari titsongo ta 100. Tintswalo leti kombisiweke hi hosi a ti fanele ti susumetele hlonga leri ku rivalela hlongakulobye. Hosi yi hlundzukile loko yi twa leswaku hlonga leri a ri ri rivalelanga hlonga leri a ri ri kolota mali yitsongo. Yi te: “Hlonga ro homboloka, ndzi sule nandzu wa wena hinkwawo, loko u ndzi kombela. Xana na wena, a wu nga fanelanga u ve ni tintswalo eka hlonga-kuloni, hilaha na mina ndzi veke ni tintswalo hakona eka wena?” (Matewu 18:23-35) Ku fana ni hosi, Yehovha u hi rivalele xikweleti lexikulu.  Rirhandzu ni tintswalo ta Yehovha swi fanele swi hi susumetela ku endla yini?

¹⁷ Loko hi ri karhi hi tilunghiselela Xitsundzuxo, hi nga ha tivutisa leswi: ‘Xana makwerhu wo karhi u ndzi twise ku vava? Xana swa ndzi tikela ku n’wi rivalela?’ Loko swi ri tano, lowu i nkarhi lowunene wo tekelela Yehovha loyi a “lunghekele[ke] ku rivalela.” (Nehemiya 9:17; Pisalema 86:5) Loko hi tlangela tintswalo letikulu leti Yehovha a hi kombeke tona, hi ta komba van’wana tintswalo ni ku va rivalela swi huma embilwini. Loko hi nga va rhandzi vamakwerhu ni ku tlhela hi va rivalela, a hi nge languteli leswaku Yehovha a hi rhandza ni ku hi rivalela. (Matewu 6:14, 15) Loko hi rivalela van’wana, a swi vuli swona leswaku a va hi twisanga ku vava kambe swi ta hi pfuna leswaku hi va ni vumundzuku lebyinene.

18. Rirhandzu ra Xikwembu ri n’wi pfune njhani makwerhu un’wana leswaku a tiyiselela ku nga hetiseki ka makwerhu un’wana?

¹⁸ Swi nga ha tika ku tiyiselela ku nga hetiseki ka vamakwerhu. (Hlaya Vaefesa 4:32; Vakolosa 3:13, 14.) Makwerhu un’wana wa xisati la endleke sweswo i Lily. ^[1] (Vona nhlamuselo ya le hansi.) U pfune Carol la nga noni. Hi xikombiso, a a heleketa Carol kun’wana ni kun’wana laha a lava ku ya kona hi movha, a a n’wi pfuna ku xava swilo ni ku n’wi pfuna hi swilo tala. Hambileswi Lily a a endla sweswo hinkwaswo, minkarhi hinkwayo Carol a n’wi xopaxopa naswona minkarhi yin’wana a swi nga n’wi oloveli ku n’wi pfuna. Kambe Lily u anakanyisise hi timfanelo letinene ta Carol naswona u n’wi pfune malembe yo tala ku fikela loko Carol a vabya swinene ivi a fa. Hambileswi Lily a swi n’wi tikela ku pfuna Carol, u ri: “Ndzi swi langutele hi mahlongati ku vona Carol loko a pfuxiwa. Ndzi lava ku n’wi tiva loko se a hetisekile.” Swi le rivaleni leswaku rirhandzu ra Xikwembu ri ta hi susumetela ku tiyiselela vamakwerhu ni ku wu langutela hi mahlongati nkarhi lowu vanhu hinkwavo va nga ta va va hetisekile.

19. ‘Nyiko ya Xikwembu ya mahala leyi nga hlamuselekiki’ yi ku susumetela ku endla yini?

¹⁹ Yehovha u hi nyike “nyiko . . . ya mahala leyi nga hlamuselekiki.” Onge hi nga yi tlangela minkarhi hinkwayo! Nkarhi wa Xitsundzuxo i nkarhi lowunene wo anakanyisisa hi swilo hinkwaswo leswi Yehovha na Yesu va hi endleleke swona. Onge rirhandzu ra vona ri nga hi susumetela ku tekelela Yesu hilaha hi nga kotaka hakona, hi rhandza vamakwerhu ni ku va rivalela swi huma embilwini.