NHLOKOMHAKA LEYI DYONDZIWAKA 40
‘Ku Tisa Vo Tala Eku Lulameni’
“Lava tisaka vo tala eku lulameni va ta vangama ku fana ni tinyeleti hilaha ku nga heriki.”—DAN. 12:3.
RISIMU 151 Xi Ta Vitana
LESWI HI NGA TA SWI DYONDZA *
1. Hi swihi swilo swo tsakisa leswi nga ta endleka eka hina hi nkarhi wa Mfumo wa Kreste wa Gidi ra Malembe?
KU TA va nkarhi wo tsakisa loko vanhu va sungula ku pfuxiwa laha misaveni hi nkarhi wa Mfumo wa Kreste wa Gidi ra Malembe! Hinkwavo lava nga feriwa hi vanhu lava va va rhandzaka va swi langutele emahlweni ku tlhela va va vona. Na Yehovha u titwa tano. (Yobo 14:15) Ehleketa ndlela leyi vanhu va nga ta tsaka hayona emisaveni hinkwayo loko vanhu lava va va rhandzaka va pfuxiwa. Hilaha hi dyondzeke ha kona eka nhlokomhaka leyi hundzeke, “lava lulameke” lava mavito ya vona ma tsariweke ebukwini ya vutomi, va ta pfuka va “kuma vutomi.” (Mit. 24:15; Yoh. 5:29) Kumbexana vo tala va maxaka ya hina va ta va van’wana lava nga ta pfuxiwa ku sungula loko vafi va pfuxiwa. * Nakambe “lava nga lulamangiki,” ku nga vanhu lava nga kumangiki nkarhi lowu eneleke wo tiva Yehovha kumbe ku n’wi tirhela loko va nga si fa, va ta “pfukela ku avanyisiwa.”
2-3. (a) Hi ku ya hi Esaya 11:9, 10, hi rihi tsima lerikulu ro dyondzisa vanhu leri nga ta endliwa emisaveni leyintshwa? (b) Hi ta kambisisa yini eka nhlokomhaka leyi?
2 Hinkwavo lava nga ta pfuxiwa swi ta lava leswaku va dyondzisiwa. (Esa. 26:9; 61:11) Hikwalaho swi ta lava leswaku ku endliwa tsima lerikulu ro dyondzisa vanhu. (Hlaya Esaya 11:9, 10.) Hikwalahokayini? Hikuva vanhu lava nga lulamangiki lava pfuxiweke va fanele va dyondza hi Yesu Kreste, Mfumo wa Xikwembu, nkutsulo ni ndlela leyi vito ra Yehovha ri nga ra nkoka hayona ni leswaku hikwalahokayini yena a ri yexe a ri ni mfanelo yo fuma. Hambi ku ri lava lulameke swi ta lava leswaku va dyondza hi leswi Yehovha a swi dyondziseke vanhu vakwe hakatsongotsongo mayelana ni xikongomelo xakwe hi misava. Malandza man’wana yo tshembeka ma fe rito ra Xikwembu ku nga Bibele yi nga si tsariwa. Lavo lulama ni lava nga lulamangiki swi ta lava va dyondza swo tala.
3 Eka nhlokomhaka leyi, hi ta kambisisa swivutiso leswi landzelaka leswi nge: Ri ta endliwa njhani tsima leri lerikulu ro dyondzisa? Xana tsima leri ri ta fambisana njhani ni ku va mavito ma tsariwa kumbe ma nga tsariwi ebukwini ya vutomi? Hi fanele hi ti tekela enhlokweni tinhlamulo ta swivutiso leswi namuntlha. Hilaha hi nga ta swi vona hakona, vuprofeta byin’wana byo tsakisa lebyi kumekaka ebukwini ya Daniyele ni ya Nhlavutelo, byi ta hi pfuna hi swi twisisa kahle leswi nga ta endleka loko vafi va pfuxiwa. A hi rhange hi ku kambisisa swilo swo tsakisa leswi profetiweke eka Daniyele 12:1, 2.
“LAVA FEKE VA TA PFUKA”
4-5. Daniyele 12:1 yi kombisa yini hi leswi nga ta endleka enkarhini wa makumu?
4 Hlaya Daniyele 12:1. Buku ya Daniyele yi vulavula hi swilo swo tsakisa leswi a swi ta endleka hi ku landzelelana enkarhini wa makumu. Hi xikombiso, Daniyele 12:1 yi kombisa leswaku Mikayele, loyi ku nga Yesu Kreste u ‘yimela vanhu va Xikwembu.’ Xiphemu xexo xa vuprofeta xi sungule ku hetiseka hi 1914 loko Yesu a hlawuriwa ku va Hosi ya Mfumo wa Xikwembu wa le tilweni.
5 Hambiswiritano, Daniyele u tlhele a byeriwa leswaku Yesu a a ta “teka goza” hi “nkarhi wa maxangu lama nga si tshamaka ma va kona ku sukela loko matiko ma ve kona ku fika enkarhini wolowo.” “Nkarhi [lowu] wa maxangu” i “nhlomulo lowukulu” lowu boxiweke eka Matewu 24:21. Yesu u ta teka goza ro lwela vanhu va Xikwembu loko ku hela nkarhi wa maxangu, ku nga Armagedoni. Buku ya Nhlavutelo na yona yi hlamusela vanhu volavo tanihi ‘ntshungu lowukulu lowu humaka enhlomulweni lowukulu.’—Nhlav. 7:9, 14.
6. Ku ta endleka yini endzhaku ka loko ntshungu lowukulu wu pone nhlomulo lowukulu? Hlamusela. (Nakambe vona “Swivutiso Swa Vahlayi” eka magazini lowu, leswi vulavulaka hi lava nga ta pfuxeriwa ku hanya laha misaveni.)
6 Hlaya Daniyele 12:2. Ku ta endleka yini endzhaku ka loko ntshungu lowukulu wu pone nkarhi lowu wa maxangu? Vuprofeta lebyi a byi vulavuli hi ku pfuxiwa ko fanekisela ka malandza ya Xikwembu loku endlekaka emasikwini yo hetelela hilaha khale a hi swi twisisa ha kona. * Kambe marito lama ma kombetela eka ku pfuxiwa ka vafi loku nga ta endleka emisaveni leyintshwa. Hikwalahokayini hi vula tano? Xiga lexi nge “entshurini” xi tlhela xi tirhisiwa eka Yobo 17:16 naswona ka ha ri nchumu wun’we ni xiga lexi nge “Sirha.” Leswi swi kombisa leswaku Daniyele 12:2 yi vulavula hi ku pfuxiwa ka xiviri loku nga ta endleka endzhaku ka masiku ya makumu ni loko nyimpi ya Armagedoni yi herile.
7. (a) Van’wana va ta pfukela “evuton’wini lebyi nga heriki” hi ndlela yihi? (b) Loku i ku “pfuxiwa ko antswa” hi ndlela yihi?
7 Daniyele 12:2 yi vula yini loko yi ku van’wana va ta pfukela “evuton’wini lebyi nga heriki”? Swi vula leswaku lava pfuxiweke ivi va tiva kumbe va ya emahlweni va tiva Yehovha na Yesu ni ku tlhela va va yingisa loko malembe ya 1 000 ma ri karhi ma famba, va ta kuma vutomi lebyi nga heriki. (Yoh. 17:3) Koloko ku ta va ku “pfuxiwa ko antswa” ku tlula ka loku tshameke ku va kona ka vanhu vo karhi lava nga tshama va pfuxiwa. (Hev. 11:35) Hikwalahokayini? Hikuva vanhu volavo va tlhele va fa.
8. Van’wana va pfukela “ku rhukaniwa ni ku nyenyiwa hilaha ku nga heriki” hi ndlela yihi?
8 A hi vanhu hinkwavo eka lava pfuxiweke lava nga ta swi amukela loko va dyondzisiwa hi Yehovha. Vuprofeta bya Daniyele byi vula leswaku van’wana va ta pfukela “ku rhukaniwa ni ku nyenyiwa hilaha ku nga heriki.” Leswi va nga ta kombisa moya wo xandzuka, mavito ya vona a ma nge tsariwi ebukwini ya vutomi naswona a va nge byi kumi vutomi lebyi nga heriki. Kutani va ta “nyenyiwa hilaha ku nga heriki” kumbe ku lovisiwa. Hikwalaho Daniyele 12:2 yi vulavula hi leswi nga ta endleka eka hinkwavo lava pfuxiweke hi ku ya hi leswi va nga ta swi endla endzhaku ka loko va pfuxiwile. * (Nhlav. 20:12) Van’wana va ta kuma vutomi lebyi nga heriki; kasi van’wana a va nge byi kumi.
‘KU TISA VO TALA EKU LULAMENI’
9-10. I yini swin’wana leswi nga ta endleka endzhaku ka nhlomulo lowukulu naswona i vamani lava nga “ta vangama ku fana ni ku vangama ka le matilweni”?
9 Hlaya Daniyele 12:3. I yini swin’wana leswi nga ta endleka endzhaku ka “nkarhi wa maxangu”? Loko hi suka eka Daniyele 12:2, ndzimana 3 yi vulavula hi leswi endlekaka endzhaku ka nhlomulo lowukulu.
10 I vamani lava nga “ta vangama ku fana ni ku vangama ka le matilweni”? Hi kuma nhlamulo eka leswi Yesu a swi vuleke eka Matewu 13:43 leyi nge: “Hi nkarhi wolowo lava lulameke va ta vangama swinene kukota dyambu eMfun’weni wa Tata wa vona.” Kwalaho Yesu a a vulavula hi “vana va Mfumo,” ku nga vamakwavo lava hlawuriweke, lava nga ta fuma na yena eMfun’weni wa le tilweni. (Mat. 13:38) Kutani Daniyele 12:3 yi fanele yi vulavula hi vahlawuriwa ni ntirho lowu va nga ta wu endla hi nkarhi wa Mfumo wa Kreste wa Gidi ra Malembe.
Lava 144 000 va ta tirhisana swinene na Yesu Kreste ku kongomisa tsima ro dyondzisa leri nga ta endliwa laha misaveni eka malembe ya 1 000 (Vona ndzimana 11)
11-12. Hi wihi ntirho lowu lava 144 000 va nga ta wu endla eka malembe ya 1 000?
11 Vahlawuriwa va ta ‘tisa vo tala eku lulameni’ hi ndlela yihi? Vahlawuriwa va ta tirhisana swinene na Yesu Kreste ku kongomisa tsima ro dyondzisa leri nga ta endliwa laha misaveni eka malembe ya 1 000. Lava 144 000 va ta va tihosi tlhelo vaprista. (Nhlav. 1:6; 5:10; 20:6) Va ta pfuneta “ku hanyisa matiko” naswona va ta endla leswaku vanhu va nga ha vi na xidyoho hakatsongotsongo. (Nhlav. 22:1, 2; Ezek. 47:12) Hakunene leswi swi ta va tsakisa vahlawuriwa!
12 I vamani lava nga ta va van’wana va ‘lavo tala’ va lava tisiwaka eku lulameni? Va ta katsa lava pfuxiweke ni lava poneke Armagedoni swin’we ni vana lava nga ha tswariwaka emisaveni leyintshwa. Loko malembe ya 1 000 ma hela, vanhu hinkwavo emisaveni va ta va va nga ha ri na xidyoho. Xana mavito ya vona ma ta tsariwa rini hi inki ebukwini ya vutomi ma nga ha suriwi?
NDZINGO WO HETELELA
13-14. Vanhu hinkwavo lava nga riki na xidyoho laha misaveni va fanele va kombisa yini loko va nga si kuma vutomi lebyi nga heriki?
13 Hi fanele hi tsundzuka leswaku loko munhu a nga ri na xidyoho a swi vuli swona leswaku u ta kuma vutomi lebyi nga heriki. Ehleketa hi Adamu na Evha. A va nga ri na xidyoho kambe a va fanele va kombisa leswaku va yingisa Yehovha Xikwembu loko va nga si nyikiwa vutomi lebyi nga heriki. Lexi twisaka ku vava, a va n’wi yingisanga.—Rhom. 5:12.
14 Ku ta endleka yini eka vanhu laha misaveni loko ku hela malembe ya 1 000? Vanhu hinkwavo va ta va va nga ha ri na xidyoho. Xana hinkwavo ka vona va ta seketela vuhosi bya Yehovha hilaha ku nga heriki? Kumbe, xana van’wana va ta fana na Adamu na Evha lava hambileswi a va nga ri na xidyoho va nga tshembekangiki? Swi ta lava hi kuma tinhlamulo ta swivutiso leswi, kambe njhani?
15-16. (a) Vanhu hinkwavo va ta wu kuma rini nkarhi wo kombisa leswaku va tshembekile eka Yehovha? (b) Ku ta endleka yini endzhaku ka ndzingo lowu wo hetelela?
15 Sathana u ta pfaleriwa malembe ya 1 000. Hi nkarhi wolowo, a nge swi koti ku hambukisa vanhu. Hambiswiritano, loko malembe ya 1 000 ma hela, Sathana u ta tshunxiwa. U ta ringeta ku hambukisa vanhu lava nga riki na xidyoho. Hi nkarhi wa ndzingo, vanhu hinkwavo emisaveni va ta va ni nkarhi wo kombisa leswaku va seketela mani loko swi ta emhakeni ya vito ra Xikwembu ni vuhosi bya xona. (Nhlav. 20:7-10) Leswi va nga ta swi endla loko va ringiwa hi Sathana, swi ta kombisa loko mavito ya vona ma ta tsariwa hi inki ebukwini ya vutomi ma nga ha suriwi.
16 Vanhu va nhlayo yo karhi leyi nga boxiwangiki va ta kombisa leswaku va fana na Adamu na Evha, hi ku ala ku seketela vuhosi bya Yehovha. Ku ta endleka yini eka vona? Nhlavutelo 20:15 yi ri: “Mani na mani loyi a nga kumeka a nga tsariwanga ebukwini ya vutomi a lahleriwa etiveni ra ndzilo.” Va ta loviseriwa makumu vaxandzuki volavo. Kambe vanhu vo tala lava nga riki na xidyoho va ta wu hlula ndzingo wolowo wo hetelela. Kutani mavito ya vona ma ta tsariwa hi inki ebukwini ya vutomi.
HI ‘NKARHI WA MAKUMU’
17. Daniyele u byeriwe leswaku a ku ta endleka yini enkarhini wa hina? (Daniyele 12:4, 8-10)
17 Swa tsakisa ku ehleketa hi swilo leswi nga ta endleka enkarhini lowu taka! Kambe ntsumi yi tlhele yi byela Daniyele rungula ra nkoka mayelana ni leswi nga ta endleka enkarhini wa hina, ku nga ‘nkarhi wa makumu.’ (Hlaya Daniyele 12:4, 8-10; 2 Tim. 3:1-5) Ntsumi yi byele Daniyele yi ku: “Vutivi bya ntiyiso byi ta andza.” Vuprofeta lebyi nga ebukwini ya Daniyele a byi ta twisisiwa kahle hi vanhu va Xikwembu. Ntsumi yi tlhele yi vula leswaku enkarhini wolowo “lavo homboloka [a] va ta endla leswo biha naswona a va [nga ta twisisa] nchumu.”
18. Ku ta endleka yini hi vanhu vo homboloka ku nga ri khale?
18 Namuntlha swi nga vonaka onge vanhu vo homboloka a va xupuriwi hikwalaho ka swiendlo swa vona. (Mal. 3:14, 15) Kambe ku nga ri khale Yesu u ta avanyisa vanhu lava fanaka ni timbuti ni ku va hambanisa eka lava fanaka ni tinyimpfu. (Mat. 25:31-33) Vanhu volavo vo homboloka a va nge poni nhlomulo lowukulu naswona a va nge pfuxiwi leswaku va hanya emisaveni leyintshwa. Mavito ya vona a ma nge tsariwi ‘bukwini leyi nga ni mavito ya lava nga ta tsundzukiwa hi Yehovha’ leyi boxiweke eka Malakiya 3:16.
19. Lowu i nkarhi wa leswaku hi endla yini naswona hikwalahokayini? (Malakiya 3:16-18)
19 Sweswi i nkarhi wa leswaku hi tikombisa leswaku a hi fani ni lavo homboloka. (Hlaya Malakiya 3:16-18.) Yehovha u hlengeleta lava a va tekaka va ri “nhundzu yo hlawuleka,” kumbe lava nga va risima. Hi lava ku va van’wana va vona.
Swi ta tsakisa ku vona Daniyele, maxaka ya hina ni van’wana vo tala va “pfuka” leswaku va kuma ndzhaka ya vona emisaveni leyintshwa! (Vona ndzimana 20)
20. Daniyele u tshembisiwe yini naswona hikwalahokayini wena u swi langutele emahlweni ku vona xitshembiso xexo xi endleka?
20 Hakunene hi hanya emikarhini yo tsakisa. Kambe ka ha ri na swo tala swo tsakisa leswi nga ta endleka. Ku nga ri khale hi ta vona vanhu vo homboloka va lovisiwa. Endzhaku ka sweswo, hi ta vona xitshembiso lexi Yehovha a xi tshembiseke Daniyele xi endleka lexi nge: “U ta pfuka u kuma ndzhaka ya wena eku heleni ka masiku.” (Dan. 12:13) Xana u swi langutele emahlweni ku vona Daniyele swin’we ni maxaka ya wena ma “pfuka”? Loko swi ri tano, endla leswi u nga swi kotaka leswaku u tshama u tshembekile naswona u nga tiyiseka leswaku vito ra wena a ri nge suriwi ebukwini ya Yehovha ya vutomi.
RISIMU 80 “Nantswani Mi Vona Leswaku Yehovha Hi Lonene”
^ Nhlokomhaka leyi, yi vulavula hi ku antswisiwa ka matwisiselo ya hina mayelana ni tsima lerikulu ro dyondzisa leri hlamuseriweke eka Daniyele 12:2, 3. Hi ta kambisisa leswaku tsima leri ri ta endliwa rini naswona hi vamani. Hi ta tlhela hi vona ndlela leyi tsima leri ro dyondzisa ri nga ta va pfuna hayona lava nga ta hanya emisaveni leswaku va tilunghiselela ndzingo wo hetelela eku heleni ka Mfumo wa Kreste wa Gidi ra Malembe.
^ Lava va nga fa va tshembekile emasikwini ya makumu swi nga endleka va rhanga va pfuxiwa ivi ku landzela lava nga fa emahlweni ka vona. Loko ku ve swi ta va tano, swi vula leswaku vanhu lava hanyeke hi nkarhi wun’we va ta hoyozelana loko va pfuxiwa. Swi nga ri na mhaka leswaku sweswo swi ta endleka njhani, Matsalwa ma vula leswaku lava pfuxeriwaka ku hanya etilweni va “pfuxiwa hi nkarhi [wa vona]” naswona hi nga vula leswaku lava nga ta pfuxeriwa ku hanya emisaveni na vona va ta pfuxiwa hi ndlela yo hleleka.—1 Kor. 14:33; 15:23.
^ Loku i ku antswisiwa ka matwisiselo ya hina lama kumekaka ebukwini leyi nge, Nyikela Nyingiso Eka Vuprofeta Bya Daniyele! ndzima 17, na Xihondzo xo Rindza xa July 1, 1987, matl. 21-25.
^ Xiga lexi nge “lava lulameke” ni lexi nge “lava nga lulamangiki” leswi kumekaka eka Mitirho 24:15 ni marito lama nge “lava endleke leswinene” ni lama nge “lava a va endla leswo biha” lama nga eka Yohane 5:29 ma vulavula hi swilo leswi lava pfuxiweke va swi endleke loko va nga si fa.
