Vona ndlela leyi Bibele yi swi hlamulaka hayona swivutiso leswi.

Mitirho 24:15 yi hi byela leswaku ku ta va ni ku “pfuxiwa ka lava lulameke ni ka lava nga lulamangiki.” Lavo lulama hi lava va yingiseke Xikwembu loko va ha hanya kutani mavito ya vona ma tsariwile ebukwini ya vutomi. (Mal. 3:16) Lava nga lulamangiki va katsa lava feke va nga wu kumanga nkarhi lowu eneleke wo dyondza hi Yehovha kutani mavito ya vona a ma tsariwanga ebukwini ya vutomi.

Mintlawa yimbirhi ya vanhu leyi boxiweke eka Yohane 5:28, 29 ka ha ri yona leyi boxiweke eka Mitirho 24:15. Yesu u vule leswaku “lava endleke leswinene” va ta “kuma vutomi, kambe lava a va endla leswo biha va ta pfukela ku avanyisiwa.” Lavo lulama va endle leswinene loko va ha hanya. Va ta pfukela ku kuma vutomi hikuva mavito ya vona ma tsariwile ebukwini ya vutomi. Kambe lava nga lulamangiki va endle swo biha loko va ha hanya. Va ta pfukela ku avanyisiwa. Mavito ya vona a ma si tsariwa ebukwini ya vutomi naswona va ta nyikiwa nkarhi na vona kambe va vekiwe tihlo. Hi nkarhi wolowo, va ta nyikiwa nkarhi wo dyondza hi Yehovha leswaku mavito ya vona ma tsariwa ebukwini ya vutomi.

Nhlavutelo 20:12, 13 yi hlamusela leswaku vanhu hinkwavo lava pfuxiweke swi ta lava va yingisa “leswi tsariweke etibukwini,” ku nga milawu leyintshwa leyi nga ta tirha emisaveni leyintshwa. Lava nga taka va nga yingisi va ta lovisiwa.—Esa. 65:20.

Daniyele 12:2 yi profete leswaku lava feke va ta pfuxeriwa “evuton’wini lebyi nga heriki kasi lavan’wana va ta pfukela ku rhukaniwa ni ku nyenyiwa hilaha ku nga heriki.” Ndzimana leyi yi vulavula hi leswi nga ta endleka eka lava pfuxiweke ku nga leswaku va ta kuma ‘vutomi lebyi nga heriki’ kumbe va “nyenyiwa hilaha ku nga heriki.” Loko malembe ya 1 000 ma hela, van’wana va ta kuma vutomi lebyi nga heriki kasi van’wana va ta loviseriwa makumu.—Nhlav. 20:15; 21:3, 4.

Xiya xikombiso lexi landzelaka. Mitlawa leyimbirhi ya vanhu lava pfuxiweke yi nga fanisiwa ni vanhu lava lavaka ku ya tshama etikweni rin’wana. Lavo lulama va fana ni vanhu lava nyikiwaka vhisa ya ntirho kumbe yo tshama, leyi endlaka leswaku va kuma tshunxeko wo karhi ni ku tiveka enawini. Kasi lava nga lulamangiki va fana ni lava nyikiwaka vhisa ya xinkarhana kumbe ya vaendzi. Vanhu vo tano va fanele va tikombisa leswaku i vanhu va njhani emahlweni ko va va pfumeleriwa ku tshama etikweni rero. Hilaha ku fanaka, lava nga lulamangiki swi ta lava leswaku va yingisa milawu ya Yehovha naswona va swi kombisa ku va lulamile leswaku va ta kota ku hanya eParadeyisini. Van’wana va nga ha hetelela va nyikiwe mpfumelelo wo va vaakatiko kasi van’wana va nga ha hlongoriwa swi nga ri na mhaka leswaku loko va nghena va tirhise vhisa ya njhani. Ku tshama ka vona ni ku hlongoriwa ka vona swi titshege hi matikhomelo ya vona etikweni rero. Swi tano na hi vanhu hinkwavo lava nga ta pfuxiwa, leswi nga ta endleka eka vona swi titshege hi ku tshembeka ni matikhomelo ya vona emisaveni leyintshwa.

Yehovha i Xikwembu xa ntwelavusiwana naswona u lulamile. (Det. 32:4; Ps. 33:5) U ta kombisa leswaku u ni rirhandzu hi ku pfuxa lava lulameke ni lava nga lulamangiki. Kambe u ta lava leswaku hinkwavo va hanya hi milawu yakwe ya leswo lulama ni leswi nga lulamangiki. Lava n’wi rhandzaka ni ku yingisa milawu yakwe, hi vona ntsena lava nga ta pfumeleriwa ku hanya emisaveni leyintshwa.