1. Ku hela matimba swi nga endla hi titwa njhani?

SIKU ni siku hi langutana ni swiphiqo naswona hi ringeta ku swi tiyisela hilaha hi nga kotaka hakona. Kambe swa tika ku tiyisela swiphiqo loko hi hele matimba. Hikwalaho, hi fanele hi teka ku titwa hi hele matimba tanihi khamba leri lavaka ku hi yivela ntsako. Swivuriso 24:10 yi ri: “Loko u hela matimba hi siku ra maxangu, matimba ya wena ma ta va matsongo.” Ku hela matimba swi nga endla hi nga swi koti ku tiyisela swiphiqo.

2. Hi swihi swilo leswi nga hi hetaka matimba naswona hi ta bula hi yini eka nhlokomhaka leyi?

² Ku ni swilo swo tala leswi nga hi hetaka matimba. Swilo sweswo swi katsa xidyoho lexi hi velekiweke na xona, ku tsana ka hina, mavabyi, ku nga byi kumi vutihlamuleri lebyi hi byi lavaka enhlanganweni wa Yehovha ni ku chumayela ensin’wini leyi nga tswaliki mihandzu. Eka nhlokomhaka leyi, hi ta bula hi swilo swin’wana leswi nga hi pfunaka hi hlula ku hetiwa matimba.

3. I yini lexi nga hi pfunaka hi va ni langutelo lerinene hi xidyoho lexi hi velekiweke na xona?

³ Xidyoho lexi hi velekiweke na xona ni ku tsana ka hina swi nga endla hi tivona hi nga pfuni nchumu. Hikwalaho, hi nga tibyela leswaku leswi hi endlaka swihoxo, Yehovha a nge hi amukeli emisaveni leyintshwa. Langutelo ro tano ri ni khombo. Hi rihi langutelo leri hi faneleke hi va na rona loko hi endla swihoxo? Bibele yi vula leswaku vanhu hinkwavo “va dyohile” handle ka Yesu Kreste ntsena. (Rhom. 3:23) Mutsari wa Bibele a hi muxopaxopi wa swihoxo. Kambe i Tatana loyi a hi rhandzaka  naswona u lava ku hi pfuna. Nakambe u ni mbilu yo leha. Wa swi vona leswaku hi khome nyarhi hi timhondzo loko swi ta emhakeni ya ku lwisana ni ku tsana ka hina naswona u lava ku hi pfuna.—Rhom. 7:18, 19.

4-5. Yohane wo Sungula 3:19, 20, yi va pfune njhani vamakwerhu vambirhi vaxisati leswaku va hlula ku hetiwa matimba?

⁴ Twana hi ta Deborah na Maria. * Loko Deborah a ha ri ntsongo, hakanyingi ekaya ka vona a va n’wi khoma hi ndlela leyi a yi endla a titwa a nga pfuni nchumu. A a nga bumabumeriwi niloko a endle swilo leswinene. Hikwalaho, u sungule ku titeka a nga pfuni nchumu. Loko o tshuka a endle xihoxonyana, a a namba a titeka a ri mutsandzeki. Maria na yena a a karhatiwa hi mhaka leyi fanaka. Maxaka yakwe a ma endla xihlekiso hi yena. Sweswo swi endle a tivona a nga pfuni nchumu. Hambiloko se a kume ntiyiso, a a tivona a nga faneleki ku va Mbhoni ya Yehovha!

⁵ Kambe vamakwerhu lava vaxisati a va tshikanga ku tirhela Yehovha. Hikwalahokayini? Va lahlele ndzhwalo wa vona eka Yehovha hi xikhongelo. (Ps. 55:22) Va swi xiyile leswaku Tata wa hina wa le tilweni wa swi tiva swilo leswi hi tshameke hi langutana na swona ni ndlela leyi swi hi khumbeke hayona. Nakambe u tiva swilo leswinene leswi nga etimbilwini ta hina, leswi hina hi nga kotiki ku swi vona.—Hlaya 1 Yohane 3:19, 20.

6. Loko munhu a phindha xihoxo lexi fanaka swi nga endla a titwa njhani?

⁶ Munhu loyi a lwaka hi matimba leswaku a tshika mukhuva wo karhi wo biha lowu se a wu ri engatini, a nga tikuma a tlhelele eka mukhuva wolowo hi xihoxo kutani sweswo swi n’wi heta matimba. I swa ntumbuluko ku titwa nandzu loko hi endle xihoxo. (2 Kor. 7:10) Kambe, a hi fanelanga hi titwa nandzu ku tlula mpimo kutani hi ku: ‘A ndzi pfuni nchumu. Yehovha a nge pfuki a ndzi rivalerile.’ Langutelo ro tano ro biha ri ni khombo naswona ri nga endla hi tshika ku tirhela Yehovha. Tsundzuka marito lama nga eka Swivuriso 24:10, loko hi hela matimba hi nkarhi wa maxangu, matimba ya hina ma ta va matsongo. Ematshan’weni yo hela matimba, “lulamisa timhaka” na Yehovha hi ku khongela u kombela ku rivaleriwa. (Esa. 1:18) Loko a swi xiya leswaku u hundzukile hakunene, u ta ku rivalela. Ku engetela kwalaho, yana eka vakulu u ya kombela ku pfuniwa. Va ta ku pfuna leswaku u tlhela u va ni vuxaka lebyinene na Yehovha.—Yak. 5:14, 15.

7. Hikwalahokayini hi nga fanelanga hi hela matimba loko swi hi tikela ku endla swilo leswinene?

⁷ Jean-Luc, loyi a nga nkulu eFurwa, u byela  lava swi va tikelaka ku endla leswinene u ri: “Munhu wo lulama eka Yehovha, a hi munhu loyi a nga endliki swihoxo kambe i munhu loyi a tisolaka a tlhela a hundzuka hi ku helela endzhaku ka loko a endle xihoxo.” (Rhom. 7:21-25) Hikwalaho, u nga titeki u nga pfuni nchumu loko swi pfa swi ku tikela ku endla swilo leswinene. Tsundzuka, hinkwerhu ha swi endla swihoxo. Hi kota ku va ni vuxaka lebyinene ni Xikwembu hikwalaho ka tintswalo leti xi hi kombeke tona hi ku tirhisa nkutsulo.—Efe. 1:7; 1 Yoh. 4:10.

8. Loko hi titwa hi hele matimba, hi nga wu kuma kwihi mpfuno?

⁸ Vamakwerhu va ta hi pfuna loko hi titwa hi hele matimba! Va ta hi yingisela loko hi ri karhi hi tiphofula va tlhela va hi chavelela. (Swiv. 12:25; 1 Tes. 5:14) Joy, ku nga makwerhu un’wana wa xisati wa le Nigeria loyi a hele matimba, u ri: “A ndzi ta va mani handle ka vamakwerhu? Yehovha u hlamule swikhongelo swa mina hi ku tirhisa vamakwerhu. Va ndzi dyondzise ni ku chavelela van’wana lava heleke matimba.” Kambe hi fanele hi tsundzuka leswaku a hi mikarhi hinkwayo vamakwerhu va nga ta swi vona loko hi lava ku chaveleriwa. Hikwalaho, hi fanele hi ya eka vona kutani hi va byela leswi hi karhataka, va ta hi pfuna.

9. Pisalema 41:3 na 94:19 ti hi chavelela njhani?

⁹ Yehovha u ta hi seketela. Loko hi nga titwi kahle enyameni kumbe hi ri ni vuvabyi lebyi nga tshungulekiki, swi nga endla hi hela matimba. Hambileswi Yehovha a nga ta ka a nga hi hanyisi hi singita sweswi kambe wa hi chavelela ni ku hi nyika matimba yo kota ku tiyisela. (Hlaya Pisalema 41:3; 94:19.) Hi xikombiso, a nga tirhisa vamakwerhu leswaku va hi pfuna hi mitirho ya le kaya ni swin’wana. A nga endla leswaku vamakwerhu va hi katsa eswikhongelweni swa vona. A nga tlhela a endla leswaku hi tsundzuka marito lama chavelelaka lama kumekaka eRitweni rakwe, yo tanihi lama vulavulaka hi ntshembo wo hanya handle ka mavabyi ni switlhavi emisaveni leyintshwa.—Rhom. 15:4.

10. I yini lexi endleke Isang a hlula ku hela matimba endzhaku ka nghozi leyi a veke na yona?

¹⁰ Isang wa le Nigeria u hlangane ni nghozi leyi n’wi siyeke a lamarile. Dokodela u n’wi byele leswaku a nge he pfuki a fambile. Isang u ri: “A ndzi tshoveke mbilu ni ku hela matimba.” Xana u tshame a hele matimba? Doo! I yini lexi n’wi pfuneke? Isang u ri: “Mina ni nghamu ya mina a hi tshikanga ku khongela eka Yehovha ni ku hlaya Rito rakwe. Nakambe a hi tlangela mikateko leyi hi nga na yona, ku katsa ni ntshembo lowu hi nga na wona wo ya hanya emisaveni leyintshwa.”

11. Cindy u wu kume njhani ntsako hi nkarhi lowu a a vabya swinene?

¹¹ Madokodela ma kume leswaku Cindy wa le Mexico, u khomiwe hi vuvabyi lebyi nga ni khombo. I yini lexi n’wi pfuneke a kota ku tiyisela? Loko a ri exibhedlhele, u endle xiboho xo chumayela siku ni siku. U ri: “Ku chumayela swi endle ndzi ehleketa hi ku pfuna van’wana ematshan’weni yo yingisa switlhavi swa mina. A ndzi tirhisa ndlela leyi: Loko ndzi burisana ni madokodela ni vaongori, a ndzi va vutisa leswaku mindyangu ya vona yi pfuke njhani. Endzhaku a ndzi va vutisa leswaku hikwalahokayini va hlawule ntirho lowu wo tika. Sweswo a swi endla ndzi kota ku vona leswaku hi swihi leswi ndzi nga bulaka na vona hi swona. Vo tala va vule leswaku vo sungula ku vutisiwa hi xigulana leswaku, ‘Va pfuke njhani?’ Vo tala va kombise ku tlangela hikwalaho ka leswi a ndzi khathala hi vona. Van’wana va ndzi nyike ni tinomboro leti a ndzi ta vulavurisana na vona eka tona. Yehovha u ndzi tiyisile  ni ku endla leswaku ndzi tsaka hambileswi a ndzi vabya!”—Swiv. 15:15.

12-13. Vamakwerhu van’wana lava vabyaka kumbe lava dyuhaleke va swi kote njhani ku chumayela naswona vuyelo byi ve byihi?

¹² Vamakwerhu lava vabyaka kumbe lava dyuhaleke va nga hela matimba hikwalaho ka leswi va nga swi kotiki ku chumayela hilaha va lavaka hakona. Hambiswiritano, vo tala a va tshiki ku chumayela. Makwerhu wa xisati Laurel wa le United States, u hete malembe ya 37 a ri emuchinini lowu a wu n’wi pfuna leswaku a kota ku hefemula! Hi hala tlhelo a ri ni khensa, a endliwe vuhandzuri byo tala naswona a ri ni vuvabyi bya nhlonge lebyi nga tshungulekiki. Kambe sweswo hinkwaswo a swi n’wi sivelanga ku chumayela. A a chumayela vaongori ni vanhu van’wana lava a va n’wi endzela ekaya. Xana vuyelo byi ve byihi? U pfune 17 wa vanhu leswaku va tiva ntiyiso lowu Bibele yi wu dyondzisaka! *

¹³ Richard wa le Furwa loyi a nga nkulu, u ringanyeta leswi nga pfunaka lava nga swi kotiki ku huma ekaya kumbe lava tshamaka etindhawini leti ku khathaleriwaka vadyuhari. U ri: “Ndzi vona onge swi nga va kahle loko vo kuma xigolonyana xo veka tibuku. Tibuku teto ti ta koka vanhu rinoko kutani sweswo swi nga endla leswaku ku sungula mabulo. Leswi swi nga va pfuna ngopfu vamakwerhu lava nga ha swi kotiki ku chumayela hi yindlu ni yindlu.” Xin’wana lexi nga va pfunaka i ku chumayela hi ku tirhisa mapapila ni foni.

14. Hi dyondza yini eka Hosi Davhida?

¹⁴ Hikwalaho ko dyuhala, mavabyi ni swiyimo swin’wana, a hi nge swi koti ku kuma vutihlamuleri byo karhi enhlanganweni wa Yehovha. Hi nga dyondza swo tala eka Hosi Davhida emhakeni leyi. Loko Davhida a byeriwe leswaku a hi yena loyi a nga ta aka tempele ya Xikwembu, ku nga nchumu lowu a wu lava hi mbilu hinkwayo, u seketele munhu loyi Xikwembu xi n’wi hlawuleke leswaku a xi akela tempele. U tlhele a humesa munyikelo leswaku a seketela ntirho wolowo. Mayana dyondzo yonghasi leyi hi yi kumaka eka Davhida!—2 Sam. 7:12, 13; 1 Tikr. 29:1, 3-5.

15. Hugues u ku hlule njhani ku hela matimba?

¹⁵ Mavabyi ma endle leswaku makwerhu Hugues wa le Furwa a tshika ku va nkulu naswona a a nga ha swi koti ku tiendlela hambi ku ri swintirhwana swa le kaya. U ri: “Eku sunguleni a ndzi tivona ndzi nga pfuni nchumu naswona a ndzi hele matimba. Kambe hi ku famba ka nkarhi ndzi amukele xiyimo naswona ndzi sungule ku tirhela Yehovha ndzi tsakile hambileswi ndzi vabyaka. A ndzi nge tshiki.  Ku fana na Gidiyoni ni vavanuna va 300 lava a va ri na yena lava a va karhele, na mina ndzi ta ya emahlweni ndzi dodombisana na swona!”—Vaav. 8:4.

16. Hi dyondza yini eka tintsumi?

¹⁶ Hi nga dyondza swo tala eka tintsumi. Hi nkarhi wa ku fuma ka Hosi Akabu, Yehovha u kombele tintsumi ti vula mavonelo ya tona mayelana ni ndlela yo yenga hosi yoleyo yo homboloka. Tintsumi to tala ti vule mavonelo ya tona. Kambe Xikwembu xi hlawule ntsumi yin’we kutani xi yi byela leswaku mavonelo ya yona ma ta tirha. (1 Tih. 22:19-22) Xana tintsumi letin’wana ti hele matimba kutani ti tivutisa leswi, ‘Hikwalahokayini ndzi tlange hi nkarhi wa mina?’ Doo! Tintsumi ta titsongahata naswona ti lava leswaku ku dzuneka hinkwako ku ya eka Yehovha.—Vaav. 13:16-18; Nhlav. 19:10.

17. Hi fanele hi endla yini loko hi hele matimba hikwalaho ka leswi hi nga byi kumiki vutihlamuleri lebyi a hi byi lava enhlanganweni wa Yehovha?

¹⁷ Vutihlamuleri lebyikulu lebyi hi nga na byona i ku chumayela hi Mfumo wa Xikwembu ni ku vitaniwa hi vito ra xona. Hi nga kuma vutihlamuleri byo karhi byi tlhela byi hi lahlekela kambe ku va ni vutihlamuleri a hi swona leswi endlaka hi va va risma eka Xikwembu. Lexi endlaka leswaku Yehovha a hi rhandza ni vamakwerhu va hi rhandza, i ku titsongahata. Hikwalaho, kombela Yehovha a ku pfuna u titsongahata mikarhi hinkwayo. Ehleketa hi vanhu vo tala va ku titsongahata lava ku vulavuriwaka ha vona eBibeleni. Tikarhatele ku tirhela vamakwenu hilaha u nga kotaka hakona.—Ps. 138:6; 1 Pet. 5:5.

18-19. U nga wu tsakela njhani ntirho wo chumayela hambiloko nsimu ya ka n’wina yi nga tswali mihandzu?

¹⁸ Xana u tshame u hela matimba hikwalaho ka leswi nsimu ya ka n’wina yi nga tswaliki mihandzu kumbe hikwalaho ka leswi vanhu vo tala va nga kumekiki emakaya? Eka swiyimo swo tano, i yini lexi nga ku pfunaka u kuma ntsako? Bokisi leri nge “ Leswi Nga Endlaka U Tsakela Ntirho Wo Chumayela” ri ni swiringanyeto leswi nga ku pfunaka. I swa nkoka ku va ni langutelo lerinene hi ntirho wo chumayela. Xana sweswo swi vula yini?

¹⁹ Tshama u khomekile hi ku chumayela vanhu hi vito ra Xikwembu ni Mfumo wa xona. Yesu u swi veke erivaleni leswaku a hi vangani vanhu lava nga ta kuma ndlela leyi yaka evuton’wini.  (Mat. 7:13, 14) Loko hi ri entirhweni wo chumayela, hi ni nkateko wo tirha na Yehovha na Yesu swin’we ni tintsumi. (Mat. 28:19, 20; 1 Kor. 3:9; Nhlav. 14:6, 7) Yehovha u koka vanhu lava lavaka ku n’wi tirhela. (Yoh. 6:44) Loko munhu a nga hi yingisi loko hi n’wi endzela ro sungula, siku rin’wana loko hi tlhelela swi nga endleka a hi yingisa.

20. Hi dyondza yini eka Yeremiya 20:8, 9 mayelana ni ku lwisana ni ku hela matimba?

²⁰ Hi nga dyondza swo tala eka muprofeta Yeremiya. A komberiwe ku ya chumayela endhawini leyi swi tikaka swinene ku chumayela eka yona. Vanhu a va n’wi rhuketela ni ku n’wi sandza “siku hinkwaro.” (Hlaya Yeremiya 20:8, 9.) U kale a hela matimba lerova a twa onge a nga tshika ku chumayela. Kambe a nga tshikanga. Hikwalahokayini? Eka Yeremiya “rito ra Yehovha” a ri fana ni ndzilo endzeni ka swirho swakwe naswona a a nga ta swi kota ku tshama hi rona! Na hina hi nga titwa hilaha ku fanaka loko hi hlaya Rito ra Xikwembu siku ni siku hi tlhela hi anakanyisisa hi leswi hi swi hlayaka. Sweswo swi ta endla hi tsakela ntirho wa hina wo chumayela naswona vanhu va ta tsakela ku yingisa rungula ra hina.—Yer. 15:16.

21. Hi nga ku hlula njhani ku hela matimba?

²¹ Debora loyi hi vulavuleke hi yena eku sunguleni, u ri: “Ku hela matimba i tlhari leri Sathana a ri tirhisaka ngopfu.” Kambe matlhari ya Sathana a hi nchumu eka Yehovha Xikwembu. Loko u titwa u hele matimba, khongela eka Yehovha u kombela leswaku a ku tiyisa. U ta ku pfuna u lwisana ni ku tsana ka wena swin’we ni xidyoho lexi u velekiweke na xona. U ta ku seketela loko u vabya. U ta ku pfuna u va ni langutelo lerinene hi ku va ni vutihlamuleri enhlanganweni wakwe. U ta tlhela a ku pfuna u va ni langutelo lerinene hi ntirho wo chumayela. Ku engetela kwalaho, phofulela Tata wa wena wa le tilweni hinkwaswo leswi ku karhataka. U ta ku pfuna leswaku u hlula ku hela matimba.