Doo, leswi a swi kona eBibeleni hambi ku ri etibukwini ta matimu.

Ndlela leyi tsalwa leri ri hlayekaka hayona eka Tibibele to tala, ri endle van’wana va ehleketa leswaku ku khuvuriwa hi mati hi xikongomelo xo yimela vanhu lava feke va nga khuvuriwanga a swi endliwa enkarhini wa Pawulo. Hi xikombiso, Tibibele tin’wana ti ri: “Kutani loko vafi va nga ta pfuxiwa, va ta endla yini lava khuvuriwaka hi xikongomelo xo yimela vafi?”

Hambiswiritano, xiya nhlamuselo ya swidyondzi swimbirhi swa Bibele. Dok. Gregory Lockwood u vula leswaku miehleketo ya leswaku lava hanyaka a va khuvuriwa “hi xikongomelo xo yimela vanhu lava se va feke” yi nga vula “nkhuvulo wa muxaka wun’wana, lowu loko ku kambisisiwa, wu nga kumekiki eka matimu kumbe eBibeleni.” Hilaha ku fanaka, Profesa Gordon D. Fee u te: “Nkhuvulo wo tano a ku kona laha ku vulavuriwaka ha wona ematin’wini kumbe eBibeleni. Testamente Leyintshwa a yi wu khumbi ni ku wu khumba; ku hava laha wu tshameke wu endliwa eka yihi ni yihi ya tikereke letin’wana hambi ku ri eka kereke yihi ni yihi ya Orthodox eka madzana ya malembe lama landzeleke hi ku hatlisa.”

Bibele yi vula leswaku valandzeri va Yesu a va ta ‘endla vanhu va matiko hinkwawo va va vadyondzisiwa, va va khuvula va tlhela va va dyondzisa ku yingisa swilo hinkwaswo’ leswi a va leriseke swona. (Mat. 28:19, 20) Loko munhu a nga si khuvuriwa, a fanele a rhanga hi ku dyondza hi Yehovha ni N’wana wa Yena, a pfumela eka vona a tlhela a va yingisa. Munhu loyi a feke naswona a nga esirheni a nga ta swi kota ku endla leswi; hambi ku ri Mukreste loyi a hanyaka a nga ta swi kota ku n’wi endlela leswi.—Ekl. 9:5, 10; Yoh. 4:1; 1 Kor. 1:14-16.

Kutani, Pawulo a vula yini?

Vakreste van’wana a va ala leswaku vafi va ta pfuxiwa. (1 Kor. 15:12) Pawulo u swi bakanyile sweswo. U vule leswaku ‘siku ni siku a a langutana ni rifu.’ Kambe, a a nga si fa. Hambileswi a a langutana ni makhombo, a tiyiseka leswaku loko o fa u ta pfuxiwa a ya va xivumbiwa xa moya lexi nga ni matimba etilweni, ku fana na Yesu.—1 Kor. 15:30-32, 42-44.

Vakorinto a va fanele va swi tiva leswaku ku va Mukreste loyi a hlawuriweke a swi vula leswaku a va ta langutana ni miringo siku ni siku naswona a va ta fa ku ri kona va nga ta pfuxiwa. Ku “[khuvuriwa] eka Kreste Yesu” a swi katsa ku “[khuvuriwa] eka rifu ra yena.” (Rhom. 6:3) Leswi swi vula leswaku ku fana na Yesu, a va ta langutana ni miringo naswona a va ta fa leswaku va ta pfuxeriwa etilweni.

Emalembeni yo tlula mambirhi endzhaku ka loko Yesu a khuvuriwile ematini, u byele vaapostola vakwe vambirhi a ku: “Nkhuvulo lowu ndzi khuvuriwaka ha wona mi ta khuvuriwa ha wona.” (Mar. 10:38, 39) Loko Yesu a vula marito wolawo a nga ri eku khuvuriweni. A a vula leswaku ku tshembeka kakwe a ku ta endla leswaku a dlayiwa. Pawulo u vule leswaku Vakreste lava hlawuriweke a va ta “xaniseka swin’we leswaku [va ta tlhela va] vangamisiwa swin’we.” (Rhom. 8:16, 17; 2 Kor. 4:17) Xisweswo na vona a va ta fanela ku fa leswaku va ta pfuxeriwa ku ya hanya etilweni.

Kahlekahle, marito ya Pawulo ma nga vekiwa hi ndlela leyi: “Loko swi nga ri tano, lava khuvuriwaka leswaku va va lava feke, va ta endla yini? Loko vafi va nga ta pfuxiwa nikatsongo, hikwalahokayini lava hanyaka va khuvuriwela ku va lava feke?”